អន្តរជាតិ
ក្រុមហ៊ុន Google ចង់បើកការិយាល័យក្នុងវៀតណាម
× ក្រុមហ៊ុន Google កំពុងសិក្សាឆ្ពោះទៅរកការបើកការិយាល័យតំណាងមួយក្នុងប្រទេសវៀតណាម។ នេះជាការបញ្ជាក់របស់រដ្ឋាភិបាលទីក្រុងហាណូយចុះផ្សាយនៅលើវេបសាយផ្លូវការរបស់ខ្លួន នៅថ្ងៃអង្គារទី ១១ ខែធ្នូ ដោយដកស្រង់សម្តីរបស់ លោក Kent Walker អនុប្រធានជាន់ខ្ពស់របស់ក្រុមហ៊ុន Google ។ ជាមួយគ្នានេះ លោកក៏បានបញ្ជាក់ទៀតថា ក្រុមហ៊ុន Google នឹងគោរពតាមច្បាប់របស់វៀតណាម ខណៈខ្លួនក៏បានធានាថា មិនធ្វើឲ្យផ្ទុយនឹងច្បាប់អន្តរជាតិនោះឡើយ។
ទោះបីជាកំណែទម្រង់សេដ្ឋកិច្ច និងកំណើននៃការបើកចំហផ្នែកបណ្តាញសង្គម គណបក្សកុម្មុយនីស្តវៀតណាម នៅតែបន្តរឹតបន្តឹងផ្នែកប្រព័ន្ធផ្សព្វផ្សាយ និងរឹតត្បិតការបញ្ចេញមតិ។
ដំណឹងទាក់ទិននឹងគោលបំណងបើកការិយាល័យរបស់ក្រុមហ៊ុន Google នេះ គឺមកចំពេលដែល ច្បាប់សន្តិសុខបច្ចេកវិទ្យាដ៏ចម្រូងចម្រាស់របស់វៀតណាម កៀកនឹងចូលជាធរមាន នាដើមឆ្នាំ២០១៩ខាងមុខ។ ក្រោមច្បាប់នេះ ក្រុមហ៊ុនបច្ចេកវិទ្យាណាដែលបើកការិយាល័យក្នុងប្រទេសវៀតណាម នឹងតម្រូវឲ្យរក្សាទិន្នន័យទាំងអស់នៅក្នុងប្រទេស។
បើតាមទីភ្នាក់ងារព័ត៌មាន Reuters អ្នកនាំពាក្យរបស់ក្រុមហ៊ុនបច្ចេកវិទ្យាយក្ស Google បានគូសបញ្ជាក់នៅក្នុងសេចក្តីថ្លែងការណ៍នៅថ្ងៃពុធថា៖«យើងពិតជាសប្បាយចិត្តនៅពេលឃើញក្រុមអ្នកជំនាញ និងប្រជាជនវៀតណាមប្រើប្រាស់បច្ចេកវិទ្យា។ វាមានកត្តាមួយចំនួនទៀត ដែលយើងត្រូវសិក្សាស្វែងយល់ មុននឹងយើងចាប់ផ្តើមបើកការិយាល័យនៅក្នុងប្រទេសនេះ។ ប៉ុន្តែយើងពុំមានអ្វីនឹងប្រកាសនៅពេលនេះនៅឡើយទេ»។
មែនទែនទៅ ច្បាប់ថ្មីរបស់វៀតណាមនេះ បានរងការជំទាស់ពីក្រុមបច្ចេកវិទ្យាធំៗ, ក្រុមសិទ្ធិមនុស្ស និងរដ្ឋាភិបាលលោកខាងលិច រួមមាន សហរដ្ឋអាមេរិកជាដើម។
ហ្វេសបុក និង Google ដែលត្រូវបានប្រើប្រាស់យ៉ាងទូលំទូលាយនៅក្នុងប្រទេសវៀតណាម និងត្រូវបានគេចាត់ទុកជាវេទិកាសម្រាប់បង្ហាញមតិប្រឆាំងនឹងគោលនយោបាយរបស់រដ្ឋាភិបាល ពុំមានការិយាល័យ និងទីតាំងផ្ទុកទិន្នន័យនៅក្នុងប្រទេសនោះឡើយ។ ក្នុងឆ្នាំនេះ វៀតណាមបានស្នើឲ្យក្រុមហ៊ុនហ្វេសបុកបើកការិយាល័យតំណាងមួយក្នុងប្រទេស។
សេចក្តីសម្រេចនៃច្បាប់ដែលបានចេញផ្សាយកាលពីខែមុន នឹងតម្រូវឲ្យក្រុមហ៊ុនផ្តល់សេវាកម្មរួមមាន អ៊ីម៉េល និងបណ្តាញសង្គម បើកការិយាល័យរបស់ពួកគេក្នុងប្រទេសវៀតណាម ប្រសិនបើពួកគេចប្រមូល ឬវិភាគទិន្នន័យរបស់អ្នកប្រើប្រាស់៕
Tag:
វៀតណាម
ក្រុមហ៊ុន Google
© រក្សាសិទ្ធិដោយ thmeythmey.com