កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ក្រុមកីឡាបាល់ទាត់ជម្រើសជាតិវៀតណាមបានក្លាយជាម្ចាស់ជើងឯកពានរង្វាន់ AFF Suzuki Cup ឆ្នាំ២០១៨ បន្ទាប់ពីយកឈ្នះគូប្រជែងម៉ាឡេស៊ីដោយលទ្ធផលទាំងពីរជើង ៣-២ (ជើងទីមួយ ២-២ និងជើងជើងទីពីរវៀតណាមឈ្នះ ១-០)។ សម្រាប់ឆ្នាំ២០១៨នេះ ក្រុមហ៊ុន Suzuki បានផ្តល់ប្រាក់រង្វាន់ដល់ក្រុមជើងឯកដល់ទៅ ៣០ម៉ឺនដុល្លារ ហើយក្រុមជើងឯករង ១០ម៉ឺនដុល្លារ និងក្រុមធ្លាក់ត្រឹមវគ្គពាក់កណ្តាលផ្តាច់ព្រ័ត្របាន៥ម៉ឺនដុល្លារ។
នេះគឺជាការកើនឡើងគួរឲ្យកត់សម្គាល់សម្រាប់ប្រាក់រង្វាន់ដែលផ្តល់ឲ្យដល់ក្រុមជើងឯកនៃព្រឹត្តិការណ៍តំបន់អាស៊ានដែលមានការសហការរវាងសហព័ន្ធកីឡាបាល់ទាត់អាស៊ី AFF ជាមួយក្រុមហ៊ុន Suzuki Motors។ ក្នុងឆ្នាំ ២០១២, ២០១៤ និង ២០១៦ ក្រុមហ៊ុនយានយន្តរបស់ជប៉ុនមួយនេះបានផ្តល់ប្រាក់រង្វាន់សម្រាប់ក្រុមជើងឯកចំនួន ២០ម៉ឺនដុល្លារ ខណៈកាលពីឆ្នាំ២០០៨ និង២០១០ ពួកគេឧបត្ថម្ភត្រឹមតែ១០ម៉ឺនដុល្លារប៉ុណ្ណោះ។
មិនត្រឹមតែប្រាក់រង្វាន់៣០ម៉ឺនដុល្លារពី Suzuki នោះទេ សហព័ន្ធកីឡាបាល់ទាត់វៀតណាម VFF ក៏បានផ្តល់ប្រាក់លើកទឹកចិត្តដល់ក្រុមកីឡាកររបស់ខ្លួនចំនួន ១៤៦០០០ដុល្លារអាមេរិកបន្ថែម រួមទាំងក្រុមហ៊ុនក្នុងស្រុកបានឧបត្ថម្ភជាច្រើនទៀតប្រមាណ ៧៧៥០០ម៉ឺនដុល្លារ។ សរុបប្រាក់រង្វាន់ទាំងអស់ក្រុមជម្រើសជាតិវៀតណាមទទួលបាន ៥៦៦៥០០ ដុល្លារអាមេរិក។
អ្វីដែលពិសេសជាងនេះទៅទៀតក្រុមហ៊ុនមួយក្នុងប្រទេសវៀតណាម បានផ្តល់ប្រាក់រង្វាន់ដល់គ្រូបង្វឹកលោក Park Hang Seo ក្នុងការនាំក្រុមលើកពាន AFF Suzuki Cup ឆ្នាំ២០១៨ និងជាការឈ្នះលើកទី២សម្រាប់ក្រុមរហស្សនាមផ្កាយមាសផងដែរ។
វៀតណាមឈ្នះពាននេះលើកដំបូងក្នុងឆ្នាំ២០០៨ ហើយក្រោយរយៈពេល១០ឆ្នាំ ពួកគេអាចលើកពាននេះម្តងទៀតនៅក្រុងទឹកដីខ្លួនឯងតែម្តង។
ចាប់តាំងពីកកើតពាន AFF Championship នេះពីឆ្នាំ១៩៩៦មក ថៃជាក្រុមដែលឈ្នះជើងឯកច្រើនជាងរហូតដល់ទៅ៥ដង (១៩៩៦, ២០០០, ២០០២, ២០១៤, ២០១៦) តាមពីក្រោយដោយសិង្ហបុរីចំនួន៤ដង (១៩៩៨, ២០០៤/០៥, ២០០៧, ២០១២)។ វៀតណាមឈ្នះ២លើក (២០០៨ និង២០១៨) និងម៉ាឡេស៊ីមួយលើកកាលពីឆ្នាំ២០១០៕
Tag:
បាល់ទាត់
AFF Suzuki Cup
© រក្សាសិទ្ធិដោយ thmeythmey.com
