អន្តរជាតិ
រូបភាព៖ មហាសន្និបាតបក្សកុម្មុយនីស្តលើកទី ១៩ នាខែតុលាឆ្នាំ ២០១៧
×![]()
ក្រុងប៉េកាំង នៅថ្ងៃអង្គារទី១៨ ខែធ្នូ កំពុងប្រារព្ធពិធីអបអរសាទរខួបទី៤០ឆ្នាំនៃគោលនយោបាយកំណែទម្រង់ និងបើកចំហសេដ្ឋកិច្ចរបស់ខ្លួន ដែលប្រែក្លាយប្រជាជាតិក្រីក្រមួយនេះទៅជាយក្សសេដ្ឋកិច្ច។ ជាមួយគ្នានេះ ប្រធានាធិបតីចិន ស៊ី ជិនភីង ក៏ថ្លែងសុន្ទរកថានៅវិមានប្រជាជនចិន ដើម្បីបើកកម្មវិធីខួបកំណែទម្រង់សេដ្ឋកិច្ចនៅព្រឹកថ្ងៃអង្គារនេះដែរ។ 
កាលពី៤០ឆ្នាំមុន ថ្ងៃទី១៨ ខែធ្នូ ក្នុងឆ្នាំ១៩៧៨ បក្សកុម្មុយនីស្តចិនក្រោមការដឹកនាំរបស់លោក តេង ស៊ាវភីង បានសម្រេចអនុវត្តកំណែទម្រង់សេដ្ឋកិច្ចបើកទ្វារទទួលវិនិយោគបរទេស និងរកស៊ីជាមួយបណ្តារដ្ឋនានាលើពិភពលោក។ កំណែទម្រង់សេដ្ឋកិច្ចជាប្រវតិ្តសាស្ត្រនេះ បង្កើតលទ្ធផលផ្លែផ្កាច្រើនសម្រាប់ចិន ហើយអ្វីដែលសំខាន់វាបានជួយរំដោះប្រជាជនចិនរាប់រយលាននាក់ឲ្យរួចផុតពីភាពក្រីក្រ និងប្រែក្លាយរដ្ឋអាស៊ីបូព៌ានេះ ទៅជាមហាអំណាចសេដ្ឋកិច្ចពិភពលោកលំដាប់ទី ២ តាមពីក្រោយសហរដ្ឋអាមេរិកផង។
និយាយដល់ការកែទម្រង់នេះ មេដឹកនាំចិនបច្ចុប្បន្នតែងតែរម្លឹកគុណមេដឹកនាំជំនាន់ទីពីរ គឺលោក តេង ស៊ាវភីង ដ្បិតថា បើគ្មានគោលនយោបាយរបស់លោកទេ វាក៏ទំនងជាគ្មានចិនដែលមានសេដ្ឋកិច្ចធំសម្បើមដូចសព្វថ្ងៃដែរ។ ក្នុងមហាសន្និបាត ឆ្នាំ១៩៧៨ បក្សកុម្មុយនីស្តចិនបានដាក់ចេញគោលនយោបាយកែទម្រង់ទ្រង់ទ្រាយធំលើវិស័យសេដ្ឋកិច្ច តាមបែបមូលធននិយម ប៉ុន្តែនៅរក្សាប្រព័ន្ធនយោបាយបែបសង្គមនិយមដដែល។ លោក តេង ដែលបន្តដឹកនាំពីប្រធាន ម៉ៅ សេទុង ជឿថា ចិនមិនរីកចម្រើនទៅរួចឡើយ បើសិនជាមិនបើកចំហទៅកាន់ពិភពលោកជាពិសេសសេដ្ឋកិច្ច។
ក្រោមការកែទម្រង់សេដ្ឋកិច្ចនេះ វិស័យកសិកម្មត្រូវបានរដ្ឋយកចិត្តទុកដាក់ខ្លាំង។ ដីស្រែធំៗលែងជាកម្មសិទ្ធិផ្តាច់មុខរបស់រដ្ឋហើយ។ វាត្រូវបានបែងចែកឲ្យប្រើប្រាស់ជាលក្ខណៈបុគ្គលផង និងជាសមូហភាពផង ដើម្បីធានាសង្វាក់ផលិតកម្មកសិកម្មដែលជាកម្លាំងចលករជំរុញកំណើនសេដ្ឋកិច្ច។ កសិករទូទៅមានសិទ្ធិលើដីឯកជនកាន់តែច្រើនឡើយ និងអាចលក់បានទៀតបើសិនជាចាំបាច់។ ចំពោះវិស័យឧស្សាហកម្មវិញ រដ្ឋាភិបាលចិនបានព្យាយាមកាត់បន្ថយការគ្រប់គ្រងលើរោងចក្រ និងក្រុមហ៊ុនរដ្ឋធំៗដែរ។ ចំនួនក្រុមហ៊ុនរដ្ឋគ្រប់គ្រងបានបន្តធ្លាក់ចុះគួរឲ្យកត់កម្គាល់ ហើយម្ចាស់រោងចក្រក៏អាចចាត់ចែងការងារបានដោយមិនចាំបាច់មានការណែនាំពីបក្ស ឬធ្វើតាមផែនការកំណត់របស់រដ្ឋាភិបាលដែរ។
គេឃើញទំនិញរបស់ចិនកាន់តែច្រើនចាប់ផ្ដើមវាយលុកចូលទីផ្សារពិភពលោក ឯប្រជាជនចិនចាប់ផ្ដើមមានជីវភាពធូរធារ។ ក្រុមហ៊ុនធំៗបានកើតឡើងស្អេកស្កះ និងចេញទៅបោះទុនរកស៊ីនៅបរទេសទៀតផង។ ឥទ្ធិពលចិនកាន់តែរីកធំទាំងនយោបាយ ការទូត ជាពិសេសសេដ្ឋកិច្ច និងបានក្លាយជាគូប្រជែងធំជាងគេរបស់អាមេរិកទៀត។ ការកែទម្រង់នេះបន្តរហូតដល់សម័យលោក ស៊ី ជិនភីង ដែលបច្ចុប្បន្នមានអំណាចដូចប្រធាន ម៉ៅ និងលោក តេង ទៅហើយនោះ។
ក្នុងឆ្នាំនេះ លោក ស៊ី ជិនភីង ដែលអាចកាន់អំណាចអស់មួយជីវិត ដ្បិតទើបតែលុបចោលចំនួនកំណត់អាណត្តិប្រធានាធិបតីនោះ បានប្រកាសជារឿយៗថា ចិននឹងបន្តបើកចំហទីផ្សាររបស់ខ្លួនសម្រាប់ក្រុមហ៊ុនបរទេស។ ហើយចិនស្វាគមន៍ជានិច្ចចំពោះអ្នកវិនិយោគបរទេសនានាដែលរកស៊ីក្នុងទឹកដីចិន។ ស្របពេលដែលអាមេរិក ក្រោមរដ្ឋបាលលោក ដូណាល់ ត្រាំ អនុវត្តនយោបាយគាំពារនិយមនោះ ចិនដែលសម្បូរដោយលុយ និងឥទ្ធិពលពេញពិភពលោក ប្រាកដជាឆ្លៀតឱកាសនេះដើម្បីឈោងតំណែងមហាអំណាចទីមួយមិនខាន៕
Tag:
ចិន
គោលនយោបាយ
កំណែទម្រង់និងបើកចំហ
© រក្សាសិទ្ធិដោយ thmeythmey.com
