ជាតិ
សេដ្ឋកិច្ច
ក្រសួង៩គាំទ្រគម្រោងអាជីវកម្មខ្សាច់សំណង់ និងដីល្បាយខ្សាច់លើផ្ទៃដី២០ហិកតានៅកំពង់ចាម
កិច្ចប្រជុំអន្តរក្រសួង ជាមួយអង្គការ និងភាគីពាក់ព័ន្ធ ដើម្បីពិនិត្យ និងផ្តល់យោបល់លើគម្រោងអាជីវកម្មខ្សាច់សំណង់ និងដីល្បាយខ្សាច់នៅខេត្តកំពង់ចាម នៅទីស្តីការក្រសួងបរិស្ថាន កាលពីថ្ងៃទី១៧ធ្នូ ឆ្នាំ២០១៨
×![]()
ភ្នំពេញ៖ ក្រសួងចំនួន៩បានសម្រេចនាំគ្នា គាំទ្រលើគម្រោងអាជីវកម្មខ្សាច់សំណង់ និងដីល្បាយខ្សាច់ ក្នុងទំហំផ្ទៃដី ២០ហិកតា ដែលមានទីតាំងស្ថិតនៅតាមដងទន្លេមេគង្គ ក្នុងភូមិកោះប៉ែន ឃុំកោះមិត្ត ស្រុកកំពង់សៀម ខេត្តកំពង់ចាម។ គម្រោងអាជីវកម្មនេះ គឺជារបស់សហគ្រាសកងម៉ារ៉ែន ដែលបានសិក្សាវាយតម្លៃដោយក្រុមហ៊ុនទីប្រឹក្សាស៊ី អ៊ី អេស ខូ អិលធីឌី។
អ្នកតំណាងក្រសួង អង្គការ និងស្ថាប័ននីមួយៗ បានឯកភាពគ្នាកំណត់ និងអនុវត្តនូវសកម្មភាព៥ចំណុច នៃអាជីវកម្មខាងលើ ឲ្យខាងតែបាន។ ក្នុងនោះរួមមានទី១.ត្រូវកំណត់បរិមាណនៃការធ្វើអាជីវកម្មបូមខ្សាច់ក្នុងមួយឆ្នាំ ឱ្យបានលម្អិត។ ទី២.ត្រូវផ្អាក ឬកាត់បន្ថយសកម្មភាពអាជីវកម្មនៅក្នុងរដូវត្រីពងកូន។ ទី៣. ត្រូវដាំដើមឈើនៅទីតាំងការដ្ឋានស្តុកខ្សាច់ និងការដឹកជញ្ជូនខ្សាច់ត្រូវគ្របប៉ាតង់ឱ្យបានត្រឹមត្រូវ ដើម្បីកាត់បន្ថយការហុយធូលី ព្រមទាំងគោរពច្បាប់ស្តីពីចរាចរណ៍ផ្លូវគោក និងច្បាប់ស្តីពីផ្លូវថ្នល់។ ទី៤. ត្រូវបំពាក់ប្រព័ន្ធGPS នៅពេលបូមខ្សាច់ និងស្លាកលេខទូកបូមខ្សាច់ ដើម្បីងាយស្រួលតាមដានសកម្មភាពបូមរបស់សហគ្រាស និងទី៥.ត្រូវសហការជាមួយក្រុមហ៊ុនទីប្រឹក្សាធ្វើការកែសម្រួលនូវចំណុចខ្វះខាតនៅក្នុងរបាយការណ៍វាយតម្លៃហេតុ ដែលនាំឲ្យប៉ះពាល់បរិស្ថាន និងសង្គម ។
ការសម្រេចគាំទ្រនេះ បានធ្វើឡើងក្នុងកិច្ចប្រជុំអន្តរក្រសួងកាលពីថ្ងៃទី១៧ធ្នូ ដើម្បីពិនិត្យ និងផ្តល់យោបល់លើគម្រោងអាជីវកម្មខ្សាច់សំណង់ និងដីល្បាយខ្សាច់នៅខេត្តកំពង់ចាម នៅទីស្តីការក្រសួងបរិស្ថាន ដែលមានអ្នកតំណាងមកពីក្រសួងទាំង៩ រួមជាមួយតំណាងអង្គការDPA, តំណាងម្ចាស់គម្រោង និងភាគីពាក់ព័ន្ធ។
ក្រសួងទាំង៩ដែលគាំទ្រនោះ មានក្រសួងបរិស្ថាន, ក្រសួងរៀបចំដែនដី នគរូបនីយកម្ម និងសំណ, ក្រសួងសេដ្ឋកិច្ច និងហិរញ្ញវត្ថុ ,ក្រសួងរ៉ែ និងថាមពល ,ក្រសួងសាធារណការ និងដឹកជញ្ជូន ,ក្រសួងធនធានទឹក និងឧតុនិយម ,ក្រសួងកសិកម្ម រុក្ខាប្រមាញ់ និងនេសាទ, ក្រសួងការងារ និងបណ្តុះបណ្តាលវិជ្ជាជីវៈ និងក្រសួងវប្បធម៌ និងវិចិត្រសិល្បៈ៕
Tag:
ខ្សាច់
គម្រោង
កំពង់ចាម
© រក្សាសិទ្ធិដោយ thmeythmey.com
