ជាតិ
ប៉ូលិសនៅត្បូងឃ្មុំ ដែលរារាំងមន្ត្រី មិនឲ្យបង្ក្រាបបទល្មើសព្រៃឈើ ត្រូវបញ្ជូនទៅតុលាការ
×![]()
ភ្នំពេញ៖ លោក យ៉ា សុផល នាយរងប៉ុស្តិ៍ស្អំ ក្នុងខេត្តត្បូងឃ្មុំ ត្រូវបានសមត្ថកិច្ចបញ្ជូនទៅ អយ្យការអមសាលាដំបូងខេត្តត្បូងឃ្មុំ នារសៀលថ្ងៃទី១៨ ខែធ្នូ ឆ្នាំ២០១៨នេះ ពីបទប្រមាថ និងបង្កហិង្សាទៅលើក្រុមសមត្ថកិច្ចចម្រុះ ខណៈក្រុមសមត្ថកិច្ចទាំងនោះ ចុះប្រតិបត្តិការបង្ក្រាបបទល្មើសព្រៃឈើ កាលពីយប់ថ្ងៃទី ១៥ ខែធ្នូ។ អំពើហិង្សានោះ បានបណ្ដាលឲ្យមានជនរងគ្រោះម្នាក់។
លោក ហាក់ សៀកលីម ព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងខេត្តត្បូងឃ្មុំ បានប្រាប់សារព័ត៌មានថ្មីៗតាមទូរសព្ទថា តុលាការមិនទាន់មានចំណាត់ការនិងនីតិវិធីអ្វីឡើយចំពោះលោក យ៉ា សុផល ដោយត្រូវរង់ចាំការបំពេញបែបបទរដ្ឋបាលចប់។
ក្នុងប្រតិបត្តិការបង្ក្រាបបទល្មើសព្រៃឈើត្រង់ចំណុចភូមិបុស្សចេក ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ កាលពីថ្ងៃទី១៥ ខែធ្នូ ក្រុមកម្លាំងសមត្ថកិច្ចចម្រុះដែលមកពីរដ្ឋបាលព្រៃឈើខេត្តត្បូងឃ្មុំ សង្កាត់រដ្ឋបាលព្រៃឈើតំបែរ កងរាជអាវុធហត្ថ ស្នាក់ការ៧០១ ស្នងការដ្ឋាននគរបាលខេត្តត្បូងឃ្មុំ និងផ្នែកសឹករងខេត្តត្បូងឃ្មុំ បានចាប់ឃាត់រថយន្ត២គ្រឿងដែលដឹកជញ្ជូនឈើគ្រញូងសរុប៥៩ដុំ ស្មើ១០៨៨គីឡូក្រាម ដោយគ្មានលិខិតអនុញ្ញាត។
ក្នុងប្រតិបត្តិការនោះ លោក យ៉ា សុផល បានមកគំរាមកំហែង និងវាយតប់ ហើយបង្កឲ្យមានរបួសស្នាមទៅលើលោក ឆេន សុផាត និងប្រទូសរ៉ាយជាមួយលោក ឃឹម ប៊ុនធឿន នាយរងសង្កាត់រដ្ឋបាលព្រៃឈើតំបែរផងដែរ ដោយមានការចង្អុលមុខ និងជេរប្រមាថក្នុងន័យរារាំង និងកាងបទល្មើសព្រៃឈើ។ ប៉ុន្តែ លោក យ៉ា សុផល មិនបានប៉ះពាល់និងបង្ករបួសស្នាមមកលើមន្ត្រីរដ្ឋបាលព្រៃឈើឡើយ៕
Tag:
តុលាការ
បទល្មើសព្រៃឈើ
© រក្សាសិទ្ធិដោយ thmeythmey.com
