ភ្នំពេញ៖ យុវជនខ្មែរមួយក្រុម ត្រូវបានអ្នកលេងហ្វេសប៊ុក ហៅថាជាក្រុមជ្រុលនិយម ក្រោយពួកគេ យកចង្ហាន់និងសម្ភារទៅប្រគេនព្រះសង្ឃ ដើម្បីឧទ្ទិសបុណ្យឲ្យវិញ្ញាណក្ខន្ធតារាកូរ៉េម្នាក់។ តែអ្នកជំនាញផ្នែកវប្បធម៌ មិនរិះគន់យុវជនទាំងនោះទេ តែបែរជាចាត់ទុកទង្វើរបស់ពួកគេ ថាល្អប្រពៃទៅវិញ។
វា ជារឿងគួរឲ្យភ្ញាក់ផ្អើលសម្រាប់អ្នកប្រើប្រាស់បណ្តាញសង្គមហ្វេសប៊ុក នៅពេលឃើញអ្នកគាំទ្រខ្មែរមួយក្រុម បានធ្វើបុណ្យរម្លឹកខួបមួយឆ្នាំនៃមរណភាពលោក Kim Jonghyun តារាចម្រៀងកូរ៉េដ៏មានប្រជាប្រិយមា្នក់របស់ក្រុម K-Pop SHINee។ យុវជនខ្មែរទាំងនោះ បានយកចង្ហាន់និងសម្ភារមួយចំនួន ទៅប្រគេនព្រះសង្ឃ ដើម្បីឧទ្ទិសបុណ្យកុសលជូនវិញ្ញាណក្ខន្ធលោក Kim Jonghyun។
សមានចិត្តរបស់ពួកគេ មិនត្រឹមតែមិនទទួលបានការកោតសរសើរពីអ្នកប្រើប្រាស់បណ្តាញសង្គមហ្វេសប៊ុកនោះទេ តែផ្ទុយទៅវិញ ថែមទាំងទទួលបានការសើចចំអកទៀតផង។ រូបភាព ដែលយុវជនខ្មែរទាំងនោះ យកចង្ហាន់និងសម្ភារទៅប្រគេនព្រះសង្ឃ ត្រូវបានអ្នកប្រើសប្រាស់បណ្តាញសង្គមហ្វេសប៊ុកចែករំលែកតៗគ្នាយ៉ាងព្រោងព្រាត។
អ្នកខ្លះ ពេបជ្រាយថា ពួកគេ ស៊ីជោរ ហើយអ្នកខ្លះ រិះគន់ថា ពួកគេ ជ្រុលនិយម។ «អ្វីក៏មានដែរ ស្រុកខ្មែរ។ ថ្មីចេះតែម្តង»។ ទាំងនេះ គឺជាពាក្យបែបហួសចិត្តនិងជាការបង្អាប់របស់អ្នកប្រើប្រាស់ហ្វេសប៊ុក ទៅឲ្យក្រុមយុវជន ដែលធ្វើបុណ្យរម្លឹកខួបឲ្យតារាកូរ៉េ។
យ៉ាងណាក៏ដោយ អ្នកជំនាញផ្នែកវប្បធម៌ មើលឃើញផ្ទុយពីអ្នកប្រើប្រាស់ហ្វេសប៊ុក។ អ្នកជំនាញទាំងនោះ មិនចាត់ទុកទង្វើរបស់ក្រុមយុវជនខ្មែរ ថាខុសឆ្គង ឬប៉ះពាល់ដល់វប្បធម៌ខ្មែរឡើយ។ ម្យ៉ាងទៀត ពួកគេ ក៏មិនយល់ថា ទង្វើបែបនេះ ជាទង្វើជ្រុលនិយមដែរ។
លោក ថៃ នរៈសត្យា អ្នកនាំពាក្យក្រសួងវប្បធម៌និងវិចិត្រសិល្បៈ បានប្រាប់អ្នកសារព័ត៌មានថ្មីៗតាមទូរសព្ទថា ទង្វើរបស់យុវជនខាងលើ មិនខុសច្បាប់អ្វីទេ។ លោក បានចាត់ទុកថា ជាសិទ្ធិរបស់បុគ្គលម្នាក់ៗ ដែលអាចឲ្យពួកគេ ធ្វើតាមចំណង់ចំណូលចិត្ត។
អ្នកនាំពាក្យរូបនេះ ពន្យល់យ៉ាងដូច្នេះថា៖«វា ជាសន្តានចិត្តរបស់ពួកគេ។ គេ អាចប្រើចំណង់ចំណូលធ្វើបាន បើគេស្រឡាញ់គាំទ្រតារាណាម្នាក់។ ពួកយើង មិនអាចបន្ទាសពួកគាត់បានឡើយ ដោយសារតែវាជាអំពើមនុស្សធម៌។ ជួនណា គេអាចធ្វើទង្វើនេះ ទៅដាក់តារាខ្មែរផងដែរ។ ប្រសិនបើគេធ្វើទង្វើនេះមកលើតារាខ្មែរទៀត ក៏ជាការល្អដែរ»។
មន្ត្រីជាន់ខ្ពស់របស់ក្រសួងវប្បធម៌ដដែល បានបន្ថែមថា សកម្មភាពរបស់យុវជនខ្មែរទាំងនោះ ក៏មិនខុសក្រមសីលធម៌ ឬប៉ះពាល់អ្វីដែរ។ លោក បញ្ជាក់បែបនេះថា៖«វាដូចជាមិនជ្រុលនិយមនោះទេ គ្រាន់តែពួកគេមានសន្តានចិត្ត ដោយសារពួកគេនិយមស្រឡាញ់ចំពោះសិល្បករហ្នឹងតែប៉ុណ្ណោះ ទើបពួកគេមូលមតិគ្នាធ្វើទៅ»។
ចំណែក លោក សេង សុមុនី អ្នកនាំពាក្យក្រសួងធម្មការនិងសាសនា បកស្រាយថា ព្រះពុទ្ធសាសនា មិនឲ្យប្រកាន់ពូជសាសន៍ឡើយ។ តាមរយៈសារព័ត៌មានថ្មីៗ លោក បានលើកឡើងថា ការធ្វើបុណ្យនេះ គឺជាទឹកចិត្តនិងក្តីរីករាយរបស់ពួកគេ មិនមែនជារឿងជ្រុលនិយមទេ។
លោក អធិប្បាយបែបនេះថា៖«ព្រះពុទ្ធ មិនគិតថា អ្នកនោះជាជាតិសាសន៍ណាទេ គឺព្រះអង្គឲ្យយើងមានអធ្យាស្រ័យនឹងគ្នា ហើយអាចឧទ្ទិសបុណ្យដល់អ្នកស្លាប់ និងសព្វសត្វទាំងអស់។ យើងមើលមើល៍ ព្រះពុទ្ធ មិនមែនខ្មែរឯណា តែព្រះអង្គ ឲ្យមនុស្ស [គ្រប់ជាតិសាសន៍] ចេះស្រឡាញ់គ្នា»។
ដោយឡែក លោក ឃួន ឈន់ ដែលជាអាចារ្យនៅវត្តបទុមវត្តី យល់ឃើញថា ការឧទ្ទិសកុសលផលបុណ្យ ទៅជនដែលបានចែកឋាន ជាទង្វើល្អទៅវិញទេ ទោះបីមនុស្សមានសាសនានិងមានជាតិសាសន៍ខុសគ្នាក្តី។ លោកអាចារ្យរូបនេះ បានប្រាប់សារព័ត៌មានថ្មីៗថា៖«គ្រប់គ្នាធ្វើហ្នឹងល្អហើយ យើងចេះធ្វើបុណ្យ វានឹងហុចផលបុណ្យកុសលឲ្យយើងវិញជាមិនខាន»។
លោកអាចារ្យ បានបរិយាយទៀតថា បើនិយាយតាមផ្លូវធម៌ក្នុងព្រះពុទ្ធសាសនា មនុស្សគ្រប់រូប អាចធ្វើបុណ្យឧទ្ទិសកុសលដល់មនុស្សពីរប្រភេទ គឺ ឧទ្ទិសឲ្យមនុស្សដែលនៅរស់ និងឧទ្ទិសឲ្យមនុស្សដែលបានស្លាប់។ លោក មានប្រសាសន៍ថា ទោះបីមនុស្សជុំវិញពិភពលោក កាន់សាសនាខុសគ្នាក្តី តែមនុស្សអាចធ្វើបុណ្យសន្សំកុសលតាមរយៈអំពើមនុស្សធម៌ផ្សេងៗគ្នា។
សូមបញ្ជាក់ តារាចម្រៀង Kim Jonghyun ដែលជាសមាជិកម្នាក់ក្នុងចំណាម៥នាក់របស់ក្រុម SHINee បានទទួលមរណភាពក្នុងវ័យ២៧ឆ្នាំ កាលពីថ្ងៃទី១៨ ខែឆ្នូ ឆ្នាំ២០១៨។ គេ ប្រទះឃើញសពលោក ក្នុងអាគារមួយ នៅក្រុងសេអ៊ូល។ បងស្រីរបស់លោក បានអះអាងថា លោក ទំនងជាស្លាប់ដោយសារតែការធ្វើអត្តឃាត ហើយលោក ទំនងជាមានវិបត្តិធ្ងន់ធ្ងរ។ មុនធ្វើអត្តឃាត លោក បានសរសេរសារខ្លីចម្លែកៗ ទៅកាន់បងស្រីថា៖«សូមឲ្យខ្ញុំចាកចេញទៅ។ ប្រាប់ខ្ញុំមកថា ខ្ញុំធ្វើបានល្អហើយ»៕