ជាតិ
លោក Eric Delobe នាយកប្រតិបត្តិក្រុមហ៊ុនVinci នៃព្រលានយន្តហោះ Cambodia Airport
×![]()
ដោយ: ថ្មីៗ
ភ្នំពេញ៖ គិតត្រឹមថ្ងៃទី១៩ ធ្នូនេះ អាកាសយាន្តដ្ឋាន Cambodia Airport បានទទួលអ្នកដំណើរ ចំនួន១០លាននាក់ហើយ ដោយបូកសរុបទាំងនៅភ្នំពេញ សៀមរាប និងព្រះសីហនុ។ នេះបើតាមសេចក្តីប្រកាសរបស់ក្រុមហ៊ុនVinci នៃព្រលានយន្តហោះ Cambodia Airport។
ក្រុមហ៊ុន Vinci គឺជាក្រុមហ៊ុនមួយ ដែលវិនិយោគលើវិស័យអាកាសចរណ៍ដ៏ធំមួយនៅលើពិភពលោក។ បច្ចុប្បន្នក្រុមហ៊ុននេះ កំពុងមានអាកាសយានដ្ឋានចំនួន៤៤ នៅក្នុងប្រទេស១១ សម្រាប់ដឹកជញ្ជូនអ្នកដំណើរ ដែលអាចរកចំណូលបានជាង៤ពាន់លានអឺរ៉ូ (ជិត៣,៥ពាន់លានដុល្លារ) ពីការដឹកជញ្ជូនអ្នកដំណើរ២០០លាននាក់កាលពីឆ្នាំ២០១៧។
ក្រុមហ៊ុន Vinci Airport បានចាប់ផ្ដើមបោះទុនវិនិយោគនៅកម្ពុជា ក្នុងឆ្នាំ១៩៩៣ តាមរយៈអាកាសយានដ្ឋានព្រលានយន្តហោះពោធិ៍ចិនតុង (បច្ចុប្បន្នព្រលានយន្តហោះអន្តរជាតិភ្នំពេញ) ដែលអន្តរជាតិនិយមហៅថា Cambodia Airport ។ ក្រោយពីដំណើរការបានរយៈ៨ឆ្នាំ ក្រុមហ៊ុន Vinci Airport ក៏បានបន្តវិនិយោគនៅព្រលានយន្តហោះសៀមរាបនៅឆ្នាំ២០០១ មុននឹងវិនិយោគនៅព្រលានយន្តហោះកងកេង ក្នុងខេត្តព្រះសីហនុ នៅឆ្នាំ២០០៦។
លោក Eric Delobe នាយកប្រតិបត្តិក្រុមហ៊ុនVinci នៃព្រលានយន្តហោះ Cambodia Airport បាននិយាយថា បច្ចុប្បន្ននេះក្រុមហ៊ុនអាកាសចរណ៍លោក បានពង្រីកខ្លួន និងភ្ជាប់ទំនាក់ទំនងយ៉ាងល្អ ជាមួយក្រុមហ៊ុនអាកាសជាង២៥០ នៅលើពិភពលោក។ ដោយសារភាពរីកចម្រើនបែបនេះហើយ ទើបលោក Eric លើកឡើងថា ក្រុមហ៊ុន Vinci Airport បានរីកមុខមាត់ ដោយសារផ្ដើមចេញពីការវិនិយោគវិស័យអាកាសនៅកម្ពុជា។
« Vinci Airport គឺបង្កើតឡើងនៅក្នុងប្រទេសកម្ពុជា ហើយការរីកសាយភាយបណ្ដាញនេះ គឺមានដើមកំណើតដំបូងកើតចេញពីប្រទេសកម្ពុជា។ ហើយយើងក៏មានកិត្តិយស និងមោទកភាពចំពោះការរីកចម្រើនបែបនេះ»។ នេះជាការលើកឡើងរបស់លោក Eric ប្រាប់ដល់ក្រុមអ្នកកាសែត ដែលទស្សនកិច្ចអាកាសយានដ្ឋានព្រលានយន្តហោះខេត្តសៀមរាប។
កាលពីឆ្នាំ២០១៧កន្លងមក អាកាសយានដ្ឋានទាំង៣នេះ អាចទទួលបានចំនួនភ្ញៀវទេសចរណ៍ធ្វើដំណើរបាន ៨,៨លាននាក់ ដែលកើនឡើង២៥ភាគរយ បើធៀបកាលពីឆ្នាំ២០១៦។ ដោយឡែកនៅឆ្នាំ២០១៨នេះ ក្រុមហ៊ុន Vinci តាមរយៈអាកាសយានដ្ឋានទាំង៣ អាចទទួលបានភ្ញៀវ ឬអ្នកធ្វើដំណើរបាន១០លាននាក់។ ក្រៅពីការទទួលភ្ញៀវទេសចរ ក្រុមហ៊ុនក៏បានទទួលការផ្ញើទំនិញ៦០ពាន់តោន ដែលមានកំណើនកើនឡើងរហូតដល់៤០ភាគរយផងដែរ។
ក្រុមហ៊ុន Vinci Airport គឺបុត្រសម្ព័ន្ធរបស់ក្រុមហ៊ុន Vinci Group ដែលជាក្រុមហ៊ុនវិនិយោគដ៏ធំរបស់បារាំង នៅទូទាំងពិភពលោក ដែលផ្ដោតទៅលើការវិនិយោគជាពីរផ្នែក ដោយផ្នែកទី១ លើការសាងសង់ ដូចជា ការដឹកជញ្ជូន ហេដ្ឋារចនាសម្ព័ន្ធ ថាមពលជាដើម។ រីឯផ្នែកទី២ ផ្ដោតលើការទទួលបានសិទ្ធិសម្បទានពីរដ្ឋាភិបាលនៅក្នុងប្រទេសនីមួយៗ សម្រាប់ដំណើរការវិនិយោគរបស់ក្រុមហ៊ុន៕
Tag:
Cambodia Airport
យន្តហោះ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
