សម្ដេច ហ៊ុន សែន បញ្ជាឲ្យអាជ្ញាធរអគ្គិសនី ចុះដោះស្រាយតម្លៃភ្លើងនៅតាមផ្សារ ឲ្យស្របតាមរដ្ឋាភិបាលកំណត់

ជាតិ

សម្ដេច ហ៊ុន សែន បញ្ជាឲ្យអាជ្ញាធរអគ្គិសនី ចុះដោះស្រាយតម្លៃភ្លើងនៅតាមផ្សារ ឲ្យស្របតាមរដ្ឋាភិបាលកំណត់

19, Dec 2018 , 12:22 pm

រូបភាព

ដោយ: ថ្មីៗ

ភ្នំពេញ៖ ពីពិធីប្រជុំមហាសន្និបាតគណៈកម្មាធិការកណ្តាលគណបក្សប្រជាជនកម្ពុជា នៅព្រឹកថ្ងៃទី១៩ ធ្នូនេះ សម្ដេចនាយករដ្ឋមន្ត្រី ហ៊ុន សែន បានបញ្ជាយ៉ាងកំហិតដល់មន្ត្រីពាក់ព័ន្ធ និង អគ្គិសនី ឲ្យចុះជាបន្ទាន់ដោះស្រាយនូវបញ្ហាតម្លៃភ្លើងនៅតាមទីផ្សារ ឲ្យមានតម្លៃដូចរាជរដ្ធាភិបាលបានកំណត់។ នេះបើតាមលោក ផៃ ស៊ីផាន អ្នកនាំពាក្យរដ្ឋាភិបាល។

ប្រជាពលរដ្ឋ ដែលប្រើប្រាស់អគ្គិសនីចាប់១គីឡូវ៉ាត់ដល់១០គីឡូវ៉ាត់ក្នុងមួយខែ ហើយត្រូវបង់ថ្លៃ៤៨០រៀលនោះ នឹងត្រូវបញ្ចុះតម្លៃមកបង់ត្រឹម៣៨០រៀល ។ ចំណែកពលរដ្ឋប្រើប្រាស់ពី១១ ដល់៥០គីឡូវ៉ាត់មួយខែ ដែលត្រូវបង់ថ្លៃ៦១០រៀល ត្រូវបញ្ចុះថ្លៃមកត្រឹម៤៨០រៀលវិញ នៅក្នុងឆ្នាំ២០១៩ និងឆ្នាំ២០២០។ នេះបើតាមការសម្រេចរបស់សម្ដេចនាយករដ្ឋមន្ត្រី ហ៊ុន សែន ដែលបានប្រកាសកាលពីថ្ងៃទី១៧ ធ្នូ ក្នុងពិធីសម្ពោធដាក់ឲ្យប្រើប្រាស់វារីអគ្គិសនីសេសានក្រោម២។

អត្ថបទទាក់ទង

កម្ពុជាមានវារីអគ្គិសនីចំនួន៧ ផ្ដល់ថាមពលអគ្គិសនីចំនួន ២, ៦៤៨មេហ្គាវ៉ាត់

រដ្ឋាភិបាល សម្រេចបញ្ចុះតម្លៃអគ្គិសនីនៅឆ្នាំ២០១៩ និង២០២០

សម្ដេច ហ៊ុន សែន ក៏បានកំណត់តម្លៃអគ្គិសនី សម្រាប់ពលរដ្ឋដែលប្រើប្រាស់អគ្គិសនីចាប់ពី៥១គីឡូវ៉ាត់ឡើងទៅដល់២០០គីឡូវ៉ាត់ ដែលបញ្ចុះពីតម្លៃ៧៧០រៀលនោះ នឹងត្រូវចុះមកត្រឹម៦១០រៀលវិញ។ រីឯពលរដ្ឋដែលប្រើប្រាស់ភ្លើងចាប់ពី២០១គីឡូវ៉ាត់ឡើងទៅ ដែលបង់ថ្លៃ៧៧០រៀល នឹងត្រូវចុះមកបង់ថ្លៃត្រឹម៧៤០រៀលនៅឆ្នាំ២០១៩ និងតម្លៃ៧៣០រៀល នៅឆ្នាំ២០២០។

បច្ចុប្បន្ន កម្ពុជាមានទំនប់វារីអគ្គិសនី កំពុងដំណើរការចំនួន៧ រួមមាន ទំនប់វារីអគ្គិសនីគីរីរម្យ I (១២ មេហ្កាវ៉ាត់) ស្ថិតក្នុងខេត្តកំពង់ស្ពឺ។ ទំនប់វារីអគ្គិសនីកំចាយ (១៩៣ មេហ្កាវ៉ាត់) ស្ថិតក្នុងខេត្តកំពត ដែលបានចាប់ដំណើរការនៅឆ្នាំ ២០១១។ ទំនប់វារីអគ្គិសនីគីរីរម្យ III (១៨ មេហ្កាវ៉ាត់) បានចាប់ដំណើរការនៅឆ្នាំ ២០១៣។ ទំនប់វារីអគ្គិសនីស្ទឹងអាតៃ (១២០ មេហ្កាវ៉ាត់) ស្ថិតក្នុងខេត្តពោធិសាត់ ដែលបានចាប់ដំណើរការនៅឆ្នាំ ២០១៣។ទំនប់វារីអគ្គិសនីឫស្សីជ្រុំក្រោម (៣៣៨ មេហ្កាវ៉ាត់) ស្ថិតក្នុងខេត្តកោះកុង ដែលបានចាប់ដំណើរការនៅឆ្នាំ ២០១៤។

ទំនប់វារីអគ្គិសនីស្ទឹងតាតៃ (២៤៦ មេហ្កាវ៉ាត់) ស្ថិតក្នុងខេត្តកោះកុង ដែលបានដំណើរការក្នុងឆ្នាំ ២០១៤ និងចុងក្រោយវារីអគ្គិសនីសេសានក្រោម២ ផ្ដល់ថាមពលបាន ៤០០មេហ្គាវ៉ាត់ ស្ថិតនៅក្នុងខេត្តស្ទឹងត្រែង ដែលទើបសម្ពោធដាក់ឲ្យប្រើប្រាស់ជាផ្លូវការក្នុងថ្ងៃទី ១៧ ខែធ្នូ ឆ្នាំ២០១៨នេះ។ នេះបើតាមលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។

រដ្ឋាភិបាល កំពុងសិក្សាលទ្ធភាពលើគម្រោងវារីអគ្គិសនីជាច្រើនទៀត (២០១៧ដល់ ២០២៥) ក្នុងតំបន់ភាគឦសាន និងដងទន្លេមេគង្គ ដូចជាទន្លេសេសានក្រោម៣, ទន្លេសេសានក្រោម ១, ទន្លេស្រែពក ៣ និង៤ និងព្រែកល្អាង ១ និង ២, ជាយអារ៉ែង, ស្ទឹងពោធិ៍សាត់១, ស្ទឹងបាត់ដំបង២, ព្រែកឆ្លូង២, សេកុង, សំបូរ និងរោងចក្រដើរដោយធ្យូងថ្មចំនួន៤គម្រោង និងដោយយថាមពលកំដៅចំនួន១ផងដែរ៕