ជាតិ
នយោបាយជាតិ
តុលាការកំពូល នៅតែឲ្យលោក សម រង្ស៊ី បង់ប្រាក់១លានដុល្លារជូនសម្តេច ហ៊ុន សែន ពីបទបរិហារ សម្តេច ហ៊ុន សែន និង លោក សម រង្ស៊ី ចូលរួមក្នុងព្រះរាជពិធីបុណ្យអុំទូកជាមួយគ្នា កាលពីឆ្នាំ២០១៤
× តុលាការកំពូល យល់ស្របនឹងសាលាដំបូងរាជធានីភ្នំពេញនិងសាលាឧទ្ធរណ៍ ដែលតម្រូវឲ្យលោក សម រង្ស៊ី បង់ប្រាក់២៥០០ដុល្លារ ចូលទៅរដ្ឋ និង បង់១លានដុល្លារ ទៅឲ្យសម្តេច ហ៊ុន សែន ដែលជាដើមបណ្តឹង ទុកជាការសងជំងឺចិត្ត ក្នុងសំណុំរឿងបរិហារកេរ្តិ៍។ តុលាការកំពូល បានប្រកាសដីការបស់ខ្លួនលើសំណុំរឿងនេះ នៅព្រឹកថ្ងៃទី១៩ ខែធ្នូ ឆ្នាំ២០១៨នេះ។
លោក នៅ មុនីជោត អ្នកនាំពាក្យតុលាការកំពូល បានប្រាប់សារព័ត៌មានថ្មីៗតាមទូរសព្ទថា ក្រោយប្រកាសរួច សាលដីកានេះ ត្រូវចូលជាស្ថាពរភ្លាមតែម្តង។ ចំណែក លោក សំ សុគង់ មេធាវីរបស់លោក សម រង្ស៊ី បានប្រាប់សារព័ត៌មានថ្មីៗយ៉ាងដូច្នេះថា៖«ក្នុងនាមខ្ញុំជាមេធាវី ខ្ញុំមិនអាចទទួលយកបានទេ ព្រោះការសម្រេចនេះ មិនមានយុត្តិធម៌សម្រាប់កូនក្តីរបស់ខ្ញុំ»។
លោកមេធាវី បន្តថា លោក នឹងជូនដំណឹងនេះ ទៅកាន់លោក សម រង្ស៊ី ហើយនឹងសួរយោបល់ពីលោក សម រង្ស៊ី ពីការប្តឹងសើរើលើសំណុំរឿងនេះ។ លោក ពន្យល់បែបនេះថា៖«បើគាត់ យល់ព្រម ខ្ញុំ នឹងដាក់បណ្តឹងសុំសើរើ គឺសុំឲ្យជម្រះក្តីឡើងវិញ។ ប៉ុន្តែ យើង ត្រូវមានភស្តុងតាងថ្មី ដើម្បីបញ្ជាក់ថា ការកាត់ក្តីរបស់តុលាការកំពូល មិនត្រឹមត្រូវ»។
មូលហេតុដែលលោក សម រង្ស៊ី រងបទបរិហារកេរ្តិ៍ គឺដោយសារតែលោក ចោទសម្តេច ហ៊ុន សែន ថា បានផ្តល់ប្រាក់១លានដុល្លារទៅកញ្ញា ធី សុវណ្ណថា ដែលជាអ្នកគាំទ្រគណបក្សប្រជាជនកម្ពុជា ដើម្បីឲ្យនាងធ្វើបាតុកម្មប្រឆាំងនឹងគណបក្សសង្គ្រោះជាតិ កាលពីមិនទាន់ត្រូវបានរំលាយ។ បទចោទនេះ បានកើតឡើងកាលពីដើមឆ្នាំ២០១៧។
លោក សម រង្ស៊ី បានរងបណ្តឹងមិនតិចជាង១០នោះទេ ហើយបណ្តឹងទាំងនោះ ភាគច្រើនសុទ្ធតែប្តឹងដោយថ្នាក់ដឹកនាំនៃគណបក្សកាន់អំណាច។ សូម្បីតែកញ្ញា ធី សុវណ្ណថា ក៏បានប្តឹងលោក សម រង្ស៊ី ដែរ ហើយបច្ចុប្បន្ន បណ្តឹងរបស់នាង កំពុងស្ថិតក្នុងចំណាត់ការរបស់តុលាការ។
កាលពីអំឡុងខែកុម្ភៈ ឆ្នាំ២០១៨ សាលាដំបូងរាជធានីភ្នំពេញ បានចេញដីកាមួយ ដោយសម្រេចរឹបអូសជាបណ្តោះអាសន្តនូវទ្រព្យសម្បត្តិរបស់លោក សម រង្ស៊ី នៅប្រទេសកម្ពុជា ដូចជា ដីនិងអគារ ជាដើម ដែលដីនិងអគារនោះ គឺសំដៅលើទីស្នាក់ការកណ្តាលរបស់អតីតគណបក្សសង្គ្រោះជាតិ។
ការសម្រេចបែបនេះ គឺដោយសារតែលោក សម រង្ស៊ី ដែលកំពុងនិរទេស មិនព្រមបង់ប្រាក់សងជំងឺចិត្តដល់ សម្តេច ហ៊ុន សែន និងសម្តេច ហេង សំរិន។ ចៅក្រម បានប្រាប់លោក សម រង្ស៊ី ក្នុងសេចក្តីសម្រេច យ៉ាងដូច្នេះថា៖«ដើម្បីឲ្យមានការលុបចោលនូវការរឹបអូសនេះ លោក សម រង្ស៊ី ត្រូវផ្ញើប្រាក់តម្កល់៤២៥០លានរៀល (ជាង១លានដុល្លារ) នៅសាលាដំបូងរាជធានីភ្នំពេញ ជាប្រាក់រំដោះ»៕
Tag:
សម រង្ស៊ី
ហ៊ុន សែន
តុលាការ
© រក្សាសិទ្ធិដោយ thmeythmey.com