ជាតិ
សង្គមជាតិ
សមត្ថកិច្ច ចាប់បរទេសពីរនាក់និងខ្មែរម្នាក់ ដែលមានថ្នាំញៀនជាង១៥០០គ្រាប់នៅនឹងខ្លួន
× លោក នេត សាវឿន អគ្គស្នងការនគរបាលជាតិ បញ្ជាផ្ទាល់តែម្តង ឲ្យចុះទៅបង្ក្រាបជនល្មើសបីនាក់ ដោយក្នុងនោះ មានជនបរទេសពីរនាក់ និងជនជាតិខ្មែរម្នាក់ ដែលពាក់ព័ន្ធនឹងការជួញដូរគ្រឿងញៀនទ្រង់ទ្រាយធំ។
គេហទំព័ររបស់អគ្គស្នងការនគរបាលជាតិ បានចុះផ្សាយថា អ្នកទាំងបី ត្រូវបានចាប់ខ្លួននៅ សង្កាត់កំពង់កណ្តាល ក្រុងកំពត នារសៀលថ្ងៃទី១៨ ខែធ្នូ ឆ្នាំ២០១៨នេះ ដោយបានដកហូតថ្នាំញៀនអ៊ិចស្ត្រាស៊ីល១៥០៣គ្រាប់ និងសារធាតុញៀនប្រភេទមេតំហ្វេតតាមីន១កញ្ចប់ធំទៀត។
ជនបរទេសទាំងពីរនាក់នោះឈ្មោះ Tasdelen Onder ភេទប្រុស អាយុ៣៧ឆ្នាំ និងឈ្មោះ Anjerla Oribjanovna ភេទស្រី អាយុ២៩ឆ្នាំ។ ចំណែក ជនជាតិខ្មែរឈ្មោះ មុំ សុភា ភេទស្រី អាយុ២៨ឆ្នាំ។ យ៉ាងណា អគ្គស្នងការនគរបាលជាតិ ពុំបានបញ្ជាក់នោះទេថា ជនបរទេសទាំងពីរនាក់ ជាជនជាតិអ្វី។
បន្ទាប់ពីឃាត់ខ្លួនជនសង្ស័យទាំងបីរួចហើយ សមត្ថកិច្ច បានបន្តទៅឆែកឆេរនៅហាងមួយ ដែលស្ថិតក្នុងក្រុងកំពតដដែល ដោយដកហូតបានថ្នាំញៀនមេតំហ្វេតាមីន៥០០គ្រាប់ រួមនឹងសារធាតុញៀន១៨០គ្រាប់ និងម៉ាទឹកកកទម្ងន់២៦៤,៨៦ក្រាមបន្ថែមទៀត៕
© រក្សាសិទ្ធិដោយ thmeythmey.com