លោក ហ៊ុន ម៉ាណែត និងមន្ត្រីជាន់ខ្ពស់៦រូបទៀត ក្លាយជាសមាជិកគណៈអចិន្ត្រៃយ៍ CPP

ជាតិ

លោក ហ៊ុន ម៉ាណែត និងមន្ត្រីជាន់ខ្ពស់៦រូបទៀត ក្លាយជាសមាជិកគណៈអចិន្ត្រៃយ៍ CPP

20, Dec 2018 , 10:57 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ លោក ហ៊ុន ម៉ាណែត ត្រូវបានជ្រើសតាំងជាសមាជិកគណៈកម្មាធិការអចិន្ត្រៃយ៍នៃគណបក្សប្រជាជនកម្ពុជា។ ការជ្រើសតាំងនេះ ធ្វើឡើងនៅក្នុងសន្និបាតគណៈកម្មាធិការកណ្ដាលបក្សលើកទី៤១ អាណត្តិទី៥ រយៈពេល៣ថ្ងៃនេះ។

មុនទទួលបានការជ្រើសតាំងនេះ លោក ហ៊ុន ម៉ាណែត គឺជាសមាជិកគណៈកម្មាធិការកណ្ដាលគណបក្សប្រជាជនកម្ពុជា និងប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជា នៅក្រៅប្រទេស។

ក្រៅពីលោក ហ៊ុន ម៉ាណែត ដែលជាកូនប្រុសច្បងរបស់សម្តេចនាយករដ្ឋមន្ត្រី ហ៊ុន សែន ក៏មានបេក្ខជន៦រូបទៀត ដែលទទួលបានជ្រើសតាំងជាសមាជិកស្ថាប័នកំពូលរបស់គណបក្សកាន់អំណាចនេះផងដែរ ដែលក្នុងនោះរួមមានលោក ប្រាក់ សុខុន លោក អូន ព័ន្ធមុនីរ័ត្ន លោក ជា សុផារ៉ា លោក សៅ សុខា លោក ឥត សារ៉ាត់ និងលោក វង្ស ពិសេន។ នេះជាការបញ្ជាក់របស់លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា ដែលបានបន្ថែមថា ការជ្រើសតាំងអ្នកទាំងនេះ គឺដោយសារតែពួកគេមានគុណសម្បត្តិគ្រប់គ្រាន់ ក្នុងជួរគណបក្សប្រជាជនកន្លងមក។

បច្ចុប្បន្ននេះសមាជិកគណៈអចិន្ត្រៃយ៍គណបក្សប្រជាជនកម្ពុជា មានជាង៣០រូប ប៉ុន្តែក្នុងនោះក៏មានសមាជិកខ្លះ បានទទួលមរណភាព ដូចជាសម្ដេច ជា ស៊ីម សម្ដេច សុខ អាន លោក នៃ ប៉េណា លោក សាយ ភូថង ជាដើម៕