ជាតិ
ក្រសួងធម្មការ ហាមអាជីវករលក់សាច់សត្វ និងសត្វមានជីវិតបែបអនាធិបតេយ្យលើផ្លូវសាធារណៈ រូបគោដុត នៅទល់មុខហាងបាយមួយ នៅខេត្តកំពង់ចាម
× ភ្នំពេញ៖ ដើម្បីបណ្ដុះស្មារតីសីលធម៌សង្គម ក្រសួងធម្មការនិងសាសនា បានចេញសារាចរណែនាំដល់អាជីវករ ហាមលក់ដូរសត្វមានជីវិត និងសាច់សត្វនៅទីកន្លែង និងទីតាំងលើផ្លូវសាធារណៈ។
ក្រសួងធម្មការនិងសាសនា ហាមដាច់ខាតនូវសកម្មភាពរូបភាពអាជីវកម្ម «គោដុត» នៅទីសាធារណៈដូចជាមុខហាងជាដើម ដែលបានបង្ហាញនូវសកម្មភាពហិង្សាឃោរឃៅ ផ្ទុយនឹងគោលការណ៍អហិង្សាធម៌របស់ព្រះពុទ្ធសាសនា។ ក្រៅពីបញ្ហាអាជីវកម្ម«គោដុត»នេះ ក្រសួងធម្មការ ក៏ហាមឃាត់ការនេសាទត្រី ឬប្រមាញ់សត្វគ្រប់ប្រភេទ នៅតំបន់មុខព្រះបរមរាជវាំង ដែលទុកជាដែនដីអភ័យភូមិ។ ជាពិសេសការចរាចរសត្វទ្វេបាទ ចតុប្បាទ សត្វមានជីវិតដទៃទៀត តាមរថយន្ត ទោចក្រយានយន្ត ត្រីចក្រយាន និងមធ្យោបាយនានា ត្រូវមានការបិទបាំងឱ្យបានត្រឹមត្រូវហ្មត់ចត់ ពោលគឺចៀសវាងការចងខ្សែព្យួរដាក់ក្នុងទីវាល ឬក៏ចងទម្លាក់តាមផ្លូវ ដែលជារូបភាពសម្ដែងនូវភាពហិង្សា ធ្វើឱ្យប៉ះពាល់ដល់ស្មារតីសីលធម៌សង្គមកម្ពុជា។
ក្រសួងធម្មការ បានសរសេរដូច្នេះថា៖«សាច់សត្វដែលបានពិឃាតហើយ ការដឹកជញ្ជូនចរាចរតាមដងផ្លូវ ត្រូវមានការវេចខ្ចប់ បិទបាំងឱ្យបានជិតល្អ ចៀសវាងការដឹកជញ្ជូនដោយគ្មានការវេចខ្ចប់ និងបិទបាំង ឬដាក់ចំហរដែលធ្វើឱ្យប៉ះពាល់សុខភាពសាធារណៈ និងបង្ហាញពីភាពហិង្សាក្នុងសង្គម។ ចំពោះអាជីវករលក់ដូរសត្វ និងសាច់សត្វគ្រប់ប្រភេទ ត្រូវលក់តែក្នុងទីរានផ្សារ កន្លែងលក់ម្ហូបអាហារ មិនត្រូវដាក់លក់តាមផ្លូវសាធារណៈ ដោយរូបភាពចងព្យួរ ដាក់ផ្ទាល់ដី លើគ្រែ លើយានជំនិះ លើតុ ក្នុងទ្រុង ការុង បាវ កញ្ច្រែង ជាដើមជាដាច់ខាត»។
ក្រសួងធម្មការនិងសាសនា សង្ឃឹមនិងជឿជាក់ថា ក្រោយពីទទួលបានសារាចរណែនាំខាងលើនេះ អាជ្ញាធរពាក់ព័ន្ធគ្រប់លំដាប់ថ្នាក់ នឹងសហការអនុវត្តឱ្យបានល្អប្រសើរ៕
Tag:
ភ្នំពេញ
ក្រសួងធម្មការនិងសានា
សត្វ
សារាចរណែនាំ
© រក្សាសិទ្ធិដោយ thmeythmey.com