លោក ថោង ខុន ជំរុញក្រុមហ៊ុនវៀតណាមពង្រីកជើងហោះហើរកម្ពុជា-វៀតណាម ឲ្យកាន់តែច្រើន

ជាតិ

សេដ្ឋកិច្ច

លោក ថោង ខុន ជំរុញក្រុមហ៊ុនវៀតណាមពង្រីកជើងហោះហើរកម្ពុជា-វៀតណាម ឲ្យកាន់តែច្រើន

20, Dec 2018 , 9:39 pm

រូបភាព

រូបពីក្រសួងទេសចរណ៍

ដោយ:

ភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន បានជំរុញឲ្យក្រុមហ៊ុនវៀតណាម ពង្រីកជើងហោះហើររវាងកម្ពុជា និងវៀតណាម ឲ្យកាន់តែច្រើនបន្ថែមទៀត ដើម្បីជំរុញសកម្មភាពពាណិជ្ជកម្ម និងទេសចរណ៍ទ្វេរភាគី ឲ្យកាន់តែផុសផុល។

នៅក្នុងពិធីចែកពានរង្វាន់ជូនទីភ្នាក់ងារទេសចរណ៍ដែលមានស្នាដៃល្អក្នុងលក់សំបុត្រ ជូនដល់ក្រុមហ៊ុនអាកាសចរ Vietnam Airlines នៅថ្ងៃទី១៩ខែធ្នូ លោក ថោង ខុន បានស្នើឲ្យក្រុមហ៊ុននេះពង្រីកជើងហោះហើរពីប្រទេសវៀតណាម មកកាន់រាជធានីភ្នំពេញ តំបន់សៀមរាប និងតំបន់ឆ្នេរសមុទ្ររបស់កម្ពុជា ឲ្យកាន់តែខ្លាំងក្លាថែមទៀត។

បច្ចុប្បន្នការហោះហើររវាងកម្ពុជា និងវៀតណាម មានចំនួន ២៣ជើងក្នុងមួយថ្ងៃ ក្នុងនោះសៀមរាប-ហូជីមិញ ៦ជើង សៀមរាប-ហាណូយ៦ជើង ភ្នំពេញ-ហូជីមិញ ៥ជើង ព្រមទាំងជើងហោះហើរមួយចំនួនទៀត សៀមរាប-ដាណាង និងព្រះសីហនុ-ហូជីមិញ ដែលភាគច្រើនប្រតិបត្តិការដោយក្រុមហ៊ុន Vietname Airline ក្រុមហ៊ុនអង្គរអ៊ែរ ក្រុមហ៊ុន Vietjet ក្រុមហ៊ុន SilK Air និងក្រុមហ៊ុន Qatar Airways ។ នេះបើតាមក្រសួងទេសចរណ៍។

លោក ថោង ខុន បានថ្លែងយ៉ាងដូច្នេះថា៖«បច្ចុប្បន្នឧស្សាហកម្មដឹកជញ្ជូន និងធ្វើដំណើរជាដៃគូមិនអាចខ្វះបានក្នុងការរុញដោល និងអភិវឌ្ឍន៍វិស័យទេសចរណ៍ ពាណិជ្ជកម្ម ទំនាក់ទំនងប្រជាជន ក្នុងនោះការដឹកជញ្ជូនតាមផ្លូវអាកាសមានការកើនឡើងគួរឲ្យកត់សម្គាល់ ដោយឈរលើគោលការណ៍សុវត្ថិភាពខ្ពស់ និងចំណេញពេលវេលា»។

តួលេខពីក្រសួងទេសចរណ៍បង្ហាញថា ទេសចរវៀតណាមមកកម្ពុជា ក្នុងរយៈពេល៩ខែដើមឆ្នាំ២០១៨ មានចំនួន ៥៨,៤ម៉ឺននាក់ ថយចុះ ១,៦ ភាគរយ៕