ភ្នំពេញ៖ ប្រទេសទន់ខ្សោយនៅតែរងការបំពានសិទ្ធិស្វ័យសម្រេច ពីប្រទេសមហាអំណាច ដែលប្រើប្រាស់តម្លៃសិទ្ធិមនុស្ស និងប្រជាធិបតេយ្យ ដើម្បីជ្រៀតជ្រែកចូលកិច្ចការផ្ទៃក្នុងប្រទេសដទៃ។ នេះជាការយល់ឃើញរបស់សន្និបាតគណៈកម្មាធិការកណ្ដាលគណបក្សប្រជាជនកម្ពុជា ដែលបានលើកយកបញ្ហានយោបាយជាតិ និងអន្តរជាតិទៅពិភាក្សា ក្នុងកិច្ចប្រជុំផ្ទៃក្នុងបក្ស។
ក្រោយបញ្ចប់កិច្ចប្រជុំពិភាក្សាផ្ទៃក្នុងបក្ស រយៈពេល៣ថ្ងៃមកនេះ គណបក្សប្រជាជន បានសម្រេចលទ្ធផលចំនួន១១ចំណុច ដែលមានទាំងការកែសម្រួលរចនាសម្ព័ន្ធក្បាលម៉ាស៊ីនបក្ស ,បញ្ហានយោបាយជាតិ និងអន្តរជាតិ។ ផ្ដើមចេញពីការកែសម្រួលរចនាសម្ព័ន្ធហើយ គណបក្សប្រជាជនកម្ពុជា បានលើកយកសមិទ្ធផលដែលសម្រេចបានក្នុងផ្នែកសេដ្ឋកិច្ច និងការអភិវឌ្ឍក្នុងប្រទេស មកបរិយាយ មុននឹងឈានដល់ការរៀបចំពីយុទ្ធសាស្ត្រនយោបាយជាតិ និងត្រៀមខ្លួនទប់ទល់ជាមួយនយោបាយអន្តរជាតិ។
ដោយនិយាយពីបញ្ហានយោបាយអន្តរជាតិ គណបក្សប្រជាជន បានវាយតម្លៃថា សភាពការណ៍អន្តរជាតិ ដែលមានការវិវត្តន៍កាន់តែស្មុគស្មាញ និងប្រកបដោយគ្រោះថ្នាក់ទាំងខាងយោធា សេដ្ឋកិច្ច នយោបាយ និងច្បាប់។ ជាពិសេសការប្រព្រឹត្តរបស់ប្រទេសមហាអំណាច ដែលប្រកាន់នយោបាយឯកតោភាគីនិយម និងគាំពារនិយម តែងតែប្រើប្រាស់ទណ្ឌកម្មជាមធ្យោបាយគាបសង្កត់ប្រទេសអធីបតេយ្យដទៃឲ្យធ្វើតាមឆន្ទៈរបស់ខ្លួន។ ក្រោមមូលហេតុទាំងនេះហើយ ទើបគណបក្សប្រជាជន ហ៊ាននិយាយថា ប្រទេសទន់ខ្សោយនៅតែរងការបំពានសិទ្ធិស្វ័យសម្រេច ពីប្រទេសមហាអំណាច ដែលប្រើប្រាស់តម្លៃសិទ្ធិមនុស្ស និងប្រជាធិបតេយ្យ ដើម្បីជ្រៀតជ្រែកចូលកិច្ចការផ្ទៃក្នុងប្រទេសដទៃ។
តាមរយៈសេចក្តីជូនដំណឹងចំនួន៤សន្លឹក អំពីលទ្ធផលប្រជុំសន្និបាតគណៈកម្មាធិការកណ្ដាលបក្ស រយៈពេល៣ថ្ងៃមកនេះ គណបក្សប្រជាជន បានលើកឡើងដូច្នេះថា៖«ការប្រព្រឹត្តរបស់ប្រទេសអ្នកខ្លាំង ដែលប្រកាន់នយោបាយឯកតោភាគីនិយម និងគាំពារនិយម ប្រើប្រាស់ទណ្ឌកម្មជាមធ្យោបាយគាបសង្កត់ប្រទេសអធីបតេយ្យដទៃឲ្យធ្វើតាមឆន្ទៈរបស់ខ្លួន ហើយយកតម្លៃសិទ្ធមនុស្ស និងប្រជាធិបតេយ្យយកមកប្រើប្រាស់ ដើម្បីជ្រែកជ្រៀតចូលកិច្ចការផ្ទៃក្នុង បំពានអធិបតេយ្យ បំពានសិទ្ធិស្វ័យសម្រេចរបស់ប្រទេសទន់ខ្សោយជាង ធ្វើឲ្យពិភពលោកត្រូវជួបបញ្ហាប្រឈមនិងហានិភ័យកាន់តែច្រើនឡើង ក្នុងពេលដែលបណ្ដាប្រជាជាតិ កំពុងរួមគ្នាប្រឹងប្រែងឆ្ពោះទៅសម្រេចគោលដៅអភិវឌ្ឍដោយចីរភាពឆ្នាំ២០៣០ របស់អង្គការសហប្រជាជាតិ»។
ស្ថិតក្នុងស្ថានភាពបែបនេះ គណបក្សប្រជាជន បានប្រកាសជាថ្មីថា កម្ពុជានៅតែប្រកាន់ខ្ជាប់នយោបាយការបរទេស អព្យាក្រឹត្យមិនចូលបក្សសម្ព័ន្ធ និងសន្តិសហវិជ្ជមាន ដោយខិតខំពង្រឹងកិច្ចសហប្រតិបត្តិការល្អជាមួយបណ្ដាប្រទេសទាំងអស់ក្នុងពិភពលោក ។ ជាពិសេសការចូលរួមវិភាគទានកាន់តែសកម្មដល់បុព្វហេតុ ដើម្បីសន្តិភាព ស្ថិរភាព សន្តិសុខ វឌ្ឍនភាព និងវិបុលភាពតំបន់ និងពិភពលោក។ ប៉ុន្តែអ្វីដែលកម្ពុជាមិនអាចធ្វើបាននោះ គឺការឱនក្បាលចំពោះការដាក់សម្ពាធមកលើខ្លួនឡើយ។
«ការពារដាច់ខាតនូវឯករាជ្យ អធិបតេយ្យ និងបូរណភាពទឹកដី ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ការមួលបង្កាច់ភាពត្រឹមត្រូវនៃនយោបាយ និងសកម្មភាពរបស់កម្ពុជា ដោយមិនឱនក្បាលចំពោះការដាក់សម្ពាធណាមួយពីខាងក្រៅ» ។ នេះជាការប្រកាសជំហររបស់គណបក្សកាន់អំណាច។
បច្ចុប្បន្ននេះ កម្ពុជាកំពុងប្រឈមមុខនឹងបញ្ហាដកប្រព័ន្ធអនុគ្រោះពន្ធពីសំណាក់សហភាពអឺរ៉ុប ដោយសារបញ្ហានយោបាយកន្លងមក។ សហភាពអឺរ៉ុប កំពុងដំណើរការនីតិវិធីដក ឬមិនដកប្រព័ន្ធអនុគ្រោះពន្ធពីកម្ពុជា ដោយត្រូវប្រើពេល១ឆ្នាំ ដើម្បីប្រមូលព័ត៌មាន និងត្រួតពិនិត្យជុំវិញស្ថានការណ៍នយោបាយ និងសង្គមកម្ពុជា មុននឹងឈានដល់ការសម្រេចចុងក្រោយលើបញ្ហានេះ។ ហើយប្រសិនជារកឃើញថា កម្ពុជាគ្មានបញ្ហាអ្វីទេ កម្ពុជានឹងអាចទទួលបានការអនុគ្រោះពន្ធរហូតដល់ឆ្នាំ២០២៧ខាងមុខ។ នេះបើតាមលោក George Edgar អគ្គរដ្ឋទូតសហភាពអឺរ៉ុបប្រចាំកម្ពុជា។
តែយ៉ាងណាបញ្ហាប្រព័ន្ធអនុគ្រោះពន្ធនេះ ត្រូវបានប្រមុខរដ្ឋាភិបាលកម្ពុជា ធ្លាប់អះអាងថា ទោះជាសហភាពអឺរ៉ុបដកប្រព័ន្ធអនុគ្រោះពន្ធពីកម្ពុជា ក៏កម្ពុជាគ្មានបញ្ហាហានិភ័យសេដ្ឋកិច្ច ឬធ្វើឲ្យសេដ្ឋកិច្ចកម្ពុជា ដាំក្បាលចុះនោះដែរ ។ ប៉ុន្តែអ្វីដែលកម្ពុជាខាតបង់នោះ គឺថវិកាជាង៦០០លានដុល្លារ ដែលកម្ពុជាទទួលបានផលចំណេញពីការនាំចូលទំនិញទៅទីផ្សារអឺរ៉ុប តាមរយៈការអនុគ្រោះពន្ធប៉ុណ្ណោះ៕