កីឡាអន្តរជាតិ
អន្តរជាតិ
Sanchez ឈ្នះ២៥០០០ដុល្លារពី Rojo ដែលភ្នាល់ថា Man Utd បណ្តេញ Mourinho
× Alexis Sanchez បានឈ្នះការភ្នាល់ជាទឹកប្រាក់ ២ម៉ឺនផោន (២៥០០០ដុល្លារអាមេរិក) ជាមួយមិត្តរួមក្រុម Marcos Rojo ជុំវិញការបណ្តេញលោក Jose Mourinho ពីតំណែងអ្នកចាត់ការ Manchester United។ នេះបើយោងតាមកាសែត Metro។
ខ្សែបម្រើសញ្ជាតិស៊ីលី វ័យ៣១ឆ្នាំរូបនេះ បានផ្ញើរសារទៅក្នុង WhatApp នៃក្រុម (Group) កីឡាករ Man Utd ដោយអបអរពីការចាកចេញរបស់លោក Mourinho និងថែមទាំងបានអះអាងថាពេលនេះមានខ្សែការពារម្នាក់បានជំពាក់នេះលុយរូបគេហើយ។
យោងទៅតាមកាសែត The Sun សារនោះបានសរសេរដូច្នេះថា៖«ខ្ញុំបានប្រាប់អ្នកដូច្នេះ (Mourinho នឹងត្រូវបណ្តេញចេញ) !! ការអត់ធ្មត់គឺជាអ្វីដែលត្រូវធ្វើ។ Rojo អ្នកជំពាក់ខ្ញុំ 20k ផោន»។ Sanchez បានភ្នាល់ជាមួយ Rojo ខ្សែការពារអន្តរជាតិអាហ្សង់ទីនដោយដាក់លុយ២៥០០០ដុល្លារ ថាក្លិបនឹងបញ្ចប់ Mourinho ពីតំណែង។
Sanchez ត្រូវបានអ្នកចាត់ការរហស្សនាម Special One យកមករួមក្រុម កាលពីខែមករាឆ្នាំមុខ ដោយផ្តល់ប្រាក់ឈ្នួលច្រើនជាងគេនៅ Premier League រហូតដល់ជាង៦សែនដុល្លារក្នុងមួយសប្តាហ៍។ ប៉ុន្តែចាប់តាំងពីផ្លាស់មក ពីទឹកដី Old Trafford រូបគេនៅមិនទាន់បានបង្ហាញភាពលេចធ្លោណាមួយឲ្យសមនឹងតម្លៃខ្លួននៅឡើយទេ។
អតីតសមាជិក Arsenal រូបនេះ ក៏ជាកីឡាករម្នាក់ក្នុងចំណោមកីឡាករថ្លៃៗផ្សេងទៀតដែលបរាជ័យ និងធ្លាក់ទម្រង់លេងនៅក្រោមការដឹកនាំរបស់លោក Mourinho ក្នុងរយៈពេលចុងក្រោយនេះដរ៕
© រក្សាសិទ្ធិដោយ thmeythmey.com