ជាតិ
សេដ្ឋកិច្ច
តម្លៃអគ្គីសនីនៅភ្នំពេញនឹងចុះមកត្រឹម ៤៨០រៀលក្នុងគីឡូវ៉ាត់ នៅខែកុម្ភៈ
× ភ្នំពេញ៖ តម្លៃអគ្គិសនី ឬភ្លើងនៅទូទាំងរាជធានីភ្នំពេញ នឹងចុះមកត្រឹមថ្លៃ ៤៨០រៀលក្នុងមួយគីឡូវ៉ាត់ នាថ្ងៃទី៣១ ខែមករាឆ្នាំ២០១៩ ដើម្បីសម្រួលដល់ប្រជាពលរដ្ឋ។
លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គិសនីកម្ពុជា បាននិយាយថា ក្រុមការងារក្រោមការសហការ ពីអាជ្ញាធររាជធានី នឹងធ្វើឱ្យបានជោគជ័យពីបញ្ហាតម្លៃអគ្គិសនីឯកជនដែលមានតម្លៃថ្លៃ យ៉ាងយូរក្នុងសប្តាហ៍ទីបី ខែមករា ឆ្នាំ២០១៩ ដោយអគ្គិសនីនឹងបញ្ចុះតម្លៃទៅតាមការកំណត់ «៤៨០រៀលក្នុងមួយគីឡូវ៉ាត់»។ នេះបើយោងតាមទីភ្នាក់ងារព័ត៌មានជាតិ(AKP)។
លោកបានបញ្ជាក់ថា «នៅឆ្នាំ២០១៩ យើងកែទម្រង់វិក្កយបត្រថ្មី ដើម្បីឱ្យសេវាខិតជិតប្រជាពលរដ្ឋ បង្កភាពងាយស្រួលជូនប្រជាពលរដ្ឋ»។
ចំណែក លោក ឃួង ស្រេង អភិបាលរាជធានីភ្នំពេញ ក៏បានជំរុញឱ្យផ្នែកជំនាញ អាជ្ញាធរខណ្ឌទាំងអស់ ធ្វើការងារពាក់ព័ន្ធនឹងការតបណ្តាញភ្លើងរដ្ឋចូលផ្សារនេះឱ្យបានលឿន ពោលគឺអាចឱ្យ អាជីវករបានប្រើប្រាស់ភ្លើងរដ្ឋបានយ៉ាងយូរ នៅថ្ងៃទី៣១ ខែមករា ឆ្នាំ២០១៩ផងដែរ។ បច្ចុប្បន្នតម្លៃអគ្គិសនីរដ្ឋនៅទីក្រុងភ្នំពេញថ្លៃ ៧២០រៀល ក្នុងមួយគីឡូវ៉ាត់។
សូមរម្លឹក កាលពីថ្ងៃទី១៩ធ្នូ ឆ្នាំ២១០៨ ក្នុងពិធីប្រជុំមហាសន្និបាតគណៈកម្មាធិការកណ្តាលគណបក្សប្រជាជនកម្ពុជា សម្ដេចនាយករដ្ឋមន្ត្រី ហ៊ុន សែន បានបញ្ជាយ៉ាងកំហិតដល់មន្ត្រីពាក់ព័ន្ធ និងអគ្គិសនី ឲ្យចុះជាបន្ទាន់ដោះស្រាយនូវបញ្ហាតម្លៃភ្លើងនៅតាមទីផ្សារ ឲ្យមានតម្លៃដូចរាជរដ្ឋាភិបាលបានកំណត់។
បើតាមលោក ម៉េត មាសភក្តី អ្នកនាំពាក្យសាលារាជធានីភ្នំពេញ អគ្គិសនីនៅតាមផ្សារក្នុងរាជធានីភ្នំពេញ នឹងចុះពីប្រមាណ១៥០០រៀលមកនៅត្រឹម៧៤០រៀលក្នុងមួយគីឡូវ៉ាត់៕
Tag:
សេដ្ឋកិច្ច
អគ្គីសនី
© រក្សាសិទ្ធិដោយ thmeythmey.com