ប្រជាជន​លើ​ពិភពលោក​ជាង​ពាក់កណ្តាល​មានលទ្ធភាព​ប្រើ​អ៊ីនធឺណិត
អន្តរជាតិ
ប្រជាជន​លើ​ពិភពលោក​ជាង​ពាក់កណ្តាល​មានលទ្ធភាព​ប្រើ​អ៊ីនធឺណិត
23, Dec 2018 , 10:59 pm        
រូបភាព
​ប្រជាជន​ចំនួន ៣,៩​ពាន់​លាន​នាក់​ដែល​ស្មើនឹង​ជាង​ពាក់កណ្តាល​នៃ​ប្រជាជន​សរុប​លើ​ពិភពលោក ទទួលបាន​សេវាកម្ម​អ៊ីនធឺណិត​ប្រើប្រាស់​នៅពេល​បច្ចុប្បន្ននេះ​។ វា​ជា​លើកដំបូង​ហើយ​ដែល​ចំនួន​អ្នកប្រើប្រាស់​ប្រព័ន្ធ​អ៊ីនធឺណិត​មាន​លក្ខណៈ​ទូលំទូលាយ​ដូច​ច្នេះ​។ នេះ​បើតាម​ការផ្សព្វផ្សាយ​រប​ស់​អង្គការសហប្រជាជាតិ​ដើមខែ​ធ្នូ​នេះ​។


 
​ភ្នាក់ងារ​ដែល​ទទួលបន្ទុក​ខាង​ទិន្នន័យ និង​ព័ត៌មាន​ផ្សព្វផ្សាយ​របស់​អង្គការសហប្រជាជាតិ ITU បាន​បញ្ជាក់ថា ដាច់​ឆ្នាំ​២០១៨​នេះ ប្រមាណ ៥១,២​ភាគរយ​នៃ​ប្រជាជន​ពិភពលោក​នឹងមាន​អ៊ីនធឺណិត​ប្រើប្រាស់​គ្រប់គ្រាន់​។​
 
 លោក Houlin Zhou ដែលជា​ប្រធាន​ទទួលបន្ទុក​របស់​ភ្នាក់ងារ ITC តំណាង​ឲ្យ​អង្គការសហប្រជាជាតិ​បាន​មានប្រសាសន៍ថា​៖ «​នេះ​បាន​ក្លាយជា​ជំហាន​មួយ​យ៉ាងសំខាន់​ក្នុងការ​ដឹកនាំ​មនុស្ស​ទៅរក​ជំនាន់​ព័ត៌មានវិទ្យា​។ ប៉ុន្តែ​វា​មិនទាន់​ចប់​នោះទេ ដ្បិតថា​នៅមាន​មនុស្ស​ច្រើន​លាន​នាក់​ទៀត​ដែល​កំពុងតែ​រងចាំ​ការផ្លាស់ប្តូរ​មួយ​នេះ​»​។​
 
 ការកើនឡើង​នៃ​ចំនួន​អ្នកប្រើប្រាស់​ប្រព័ន្ធ​អ៊ីនធឺណិត​នេះ​មិន​មែនមាន​សន្ទុះ​ខ្លាំង​ក្នុងប្រទេស​អភិវឌ្ឍ​នោះទេ​។ ផ្ទុយទៅវិញ​សន្ទុះ​នេះ​បាន​កើនឡើង​យ៉ាង​រហ័ស​ក្នុងប្រទេស​ដែល​កំពុង​អភិវឌ្ឍ ដូចជា​បណ្តា​ប្រទេស​ក្នុង​ទ្វីបអាស៊ី និង​អាហ្វ្រិក​ជាដើម​។​
 
 ស្ថិតិ​ខាងលើ​បាន​បង្ហាញថា ក្នុង​ឆ្នាំ​២០០៥ ចំនួន​អ្នកប្រើប្រាស់​អ៊ីនធឺណិត​នៅ​ប្រទេស​កំពុង​អភិវឌ្ឍ​មាន​ត្រឹមតែ​៧,៧​ភាគរយ​ប៉ុណ្ណោះ​បើ​ប្រៀបធៀប​ទៅនឹង​៤៥,៣​ភាគរយ​សព្វថ្ងៃ​។ ចំពោះ​អ្នក​ដែល​ប្រើប្រាស់​សេវាកម្ម​ទូរ​សព្ទ​ធម្មតា​សព្វថ្ងៃ​មាន​ចំនួន​៥,៣​ពាន់​លាន​នាក់ បើតាម​ការស្រាវជ្រាវរ​បស់​ភ្នាក់ងារ ITU ៕

Tag:
 អ៊ីនធឺណិត​
  ប្រជាជន
© រក្សាសិទ្ធិដោយ thmeythmey.com