កីឡាអន្តរជាតិ
អន្តរជាតិ
Mourinho នៅតែលេចមុខក្នុងតារាងបាល់ទាត់ បើទោះទំនេរពីការងារនៅ Man Utd
× លោក Jose Mourinho បានបង្ហាញមុខក្នុងទីលានបាល់ទាត់នៅឯប្រទេសកំណើតជាលើកដំបូង ចាប់តាំងពីលោកចាកចេញពីទឹកដី Old Trafford ក្រោយត្រូវ Manchester United បញ្ចប់តំណែងជាអ្នកចាត់ការទូទៅ។ បើទោះជាទំនេរពីការងារក្តី តែ Special One នៅតែភ្ជាប់ខ្លួនជាមួយនឹងបាល់ទាត់ដដែល។
ក្លិបបិសាចក្រហមបានបណ្តេញលោក Mourinho ពីតំណែងអ្នកចាត់ការបន្ទាប់ពីដឹកនាំក្រុមមិនបានល្អ ដោយតាមពីក្រោយ Liverpool ដែលឈរកំពូលតារាង Premier League ដល់ទៅ ១៩ ពិន្ទុ។
ប៉ុន្តែក្រោយការចាកចេញរបស់ Mourinho ក្រុម Man Utd បានទទួលលទ្ធផលគួរឲ្យភ្ញាក់ផ្អើលដោយយកឈ្នះ Cardiff City យ៉ាងចាស់ដៃក្នុងលទ្ធផល ៥-១ ដែលជាការស៊ុតបញ្ចូលទីច្រើនបំផុតក្នុងលីគចាប់តាំងពីការចាកចេញរបស់ Sir Alex Ferguson សម្រាប់ការប្រកួតដំបូងដែល Ole Gunnar Solskjaer ដឹកនាំនោះ។
ស្របពេលនោះដែរលោក Mourinho ក៏ត្រូវបានរាយការណ៍ថាបានលេចមុខក្នុងការប្រកួតដែល Vitoria de Setubal ចាញ់ Santa Clara ២-០ ដែរ។ អ្នកចាត់ការសញ្ជាតិព័រទុយហ្គាល់នេះ ជាអ្នកគាំទ្រក្រុម Vitoria នៃក្របខណ្ឌ Premierira Liga ដែលមានមូលដ្ឋាននៅស្រុកកំណើតរបស់លោក។
ជារឿងមួយគួរឲ្យកត់សម្គាល់ផងដែរ បើទោះជាអតីតអ្នកចាត់ការ Chelsea និង Real Madrid រូបនេះទើបត្រូវបានបញ្ចប់តំណែងពីការងារក្តី ប៉ុន្តែលោកនៅតែយកពេលវេលាសម្រាករបស់ខ្លួនទៅភ្ជាប់ជាមួយនឹងបាល់ទាត់ដដែរ។
អ្នកចាត់ការរហស្សនាម Special One វ័យ ៥៥ ឆ្នាំរួមទាំងកូនប្រុសរបស់លោក ត្រូវបានទទួលការស្វាគមន៍យ៉ាងកក់ក្តៅពីសំណាក់ក្រុមអ្នកគាំទ្ររបស់ក្រុមម្ចាស់ផ្ទះ Vitoria ក្នុងក្រុង Setubal នាកីឡដ្ឋាន Bonfim៕
Tag:
បាល់ទត់
Jose Mourinho
Manchester United
© រក្សាសិទ្ធិដោយ thmeythmey.com