គ្រោះធម្មជាតិធ្វើឲ្យវៀតណាមខាតបង់ប្រាក់អស់ជាង៨០០លានដុល្លារក្នុងឆ្នាំនេះ

អន្តរជាតិ

គ្រោះធម្មជាតិធ្វើឲ្យវៀតណាមខាតបង់ប្រាក់អស់ជាង៨០០លានដុល្លារក្នុងឆ្នាំនេះ

24, Dec 2018 , 10:39 pm

រូបភាព

ដោយ:

គ្រោះធម្មជាតិនៅវៀតណាម បានបណ្តាលឲ្យមនុស្ស២១៨នាក់បាត់បង់ជីវិត និងធ្វើឲ្យខាតបង់ប្រាក់សរុបប្រមាណ ៨៦០លានដុល្លារក្នុងឆ្នាំ២០១៨នេះ។ នេះបើតាមការបញ្ជាក់របស់រដ្ឋាភិបាលវៀតណាម កាលពីចុងសប្តាហ៍មុន។

ទិន្នន័យមកពីក្រសួងអភិវឌ្ឍន៍ជនបទ និងកសិកម្មវៀតណាមបានបង្ហាញថា គ្រោះធម្មជាតិបានសម្លាប់មនុស្សប្រមាណ ៣៨៦នាក់ និងធ្វើឲ្យខាតបង់ប្រាក់ជិត ២,៥៨ពាន់លានដុល្លារក្នុងឆ្នាំ២០១៧។ រីឯក្នុងឆ្នាំ២០១៦វិញ មនុស្សចំនួន ២៦៤នាក់បានបាត់បង់ជីវិត និងប្រាក់ប្រមាណ១,៧២ពាន់លានដុល្លារក្នុងបញ្ហាគ្រោះធម្មជាតិក្នុងប្រទេសវៀតណាម។

ទោះបីជាចំនួនអ្នកស្លាប់និងការខូចខាតមានកម្រិតទាបជាង បើធៀបទៅនឹងឆ្នាំ២០១៧ និងឆ្នាំ២០១៦ក្តី ក៏គ្រោះធម្មជាតិបានបង្កជាការបំផ្លិចបំផ្លាញយ៉ាងធ្ងន់ធ្ងរ លើប្រទេសវៀតណាមក្នុងឆ្នាំនេះ។

យោងតាមការចុះផ្សាយរបស់សារព័ត៌មានវៀតណាម Vietnam News អនុប្រធានគណៈកម្មាធិការនៃមន្ទីរគ្រប់គ្រងគ្រោះធម្មជាតិវៀតណាម លោក Nguyễn Trường Sơn បានលើកឡើងកាលថ្ងៃសុក្រទី២១ ខែធ្នូថា គ្រោះធម្មជាតិជាច្រើនបានកើតឡើងក្នុងឆ្នាំ២០១៨នេះ ក្នុងនោះរួមមាន ព្យុះទីហ្វុងចំនួន ១៣លើក, ទឹកជំនន់ចំនួន ១៣លើក, រលកកម្តៅចំនួន ១១លើក និងអាកាសធាតុត្រជាក់ខ្លាំងចំនួន៤លើកជាដើម៕