អ្នកបររទេះទេសចរណ៍នៅភ្នំបាក់មួយថ្ងៃរកចំណូលបានជិត១០ម៉ឺនរៀល

ជាតិ

រថយន្ត

សេដ្ឋកិច្ច

24, Dec 2018 , 11:39 pm

រូបភាព

ដោយ: ប៉ូ សាគុន

កំពត៖ មុខរបរដឹកភ្ញៀវទេសចរតាមរទេះសេះនៅភ្នំបាក់ ឬហៅថាភ្នំកំពង់ត្រាច អាចរកចំណូលបានក្នុងមួយថ្ងៃប្រមាណពី៨ម៉ឺនរៀល ទៅ១០ម៉ឺនរៀល។ ការជិះកម្សាន្តតាមរទេះសេះមើលភ្នំនិងវាលស្រែ មានពីរផ្លូវគឺចម្ងាយ៣០០ម៉ែត្រ និងចម្ងាយ៤គីឡូម៉ែត្រ។

ទៅដល់ភ្នំបាក់ដែលពីដើមអ្នកស្រុកហៅថាភ្នំកំពង់ត្រាចនោះ គេមិនត្រឹមតែទៅមើលរូងភ្នំ ដ៏ស្រស់ស្អាត ដែលមានផ្លូវបត់បែនជ្រៀតតាមផ្ទាំងថ្មនោះឡើយ តែភ្ញៀវទេសចរថែមទាំងអាចជិះរទេះសេះ មើលសម្រស់ដ៏ស្រស់ត្រកាលជុំវិញភ្នំ និងវាលស្រែខៀវស្រងាត់ថែមទៀតផង។

បើគេចង់ជិះរទេះសេះ នោះគេត្រូវធ្វើដំណើរឆ្លងកាត់តាមរូងភ្នំ រហូតដល់ខាងក្រោយភ្នំ នោះទើបគេអាចជិះបាន។ ចំណែកតម្លៃវិញ បើជិះចម្ងាយ៣០០ម៉ែត្រ ពីទីតាំងខាងក្រោយភ្នំមកខាងមុខភ្នំ ដែលជាទីតាំងដាក់ឡានព ថ្លៃ២,០០០រៀល គេអាចមើលសម្រស់ចម្រេះភ្នំ ដែលហ៊ុមព័ទ្ធដោយរុក្ខជាតិពណ៌បៃតងស្រស់ និងវាយស្រែខៀវស្រងាត់តាមផ្លូវធ្វើដំណើរ។ បើគេជិះរទេះសេះចម្ងាយ៤គីឡូម៉ែត្រ ពីទីតាំងខាងក្រោយភ្នំ មកខាងមុខភ្នំដូចគ្នា មានតម្លៃ៨,០០០រៀល ហើយគេអាចឃើញទាំងសម្រស់ភ្នំ វាលស្រែ ផ្លូវរថភ្លើង និងអាងទឹកទៀតផង។

លោក ឌឹម លីម អាយុ ១៨ឆ្នាំ គឺជាអ្នកបញ្ជារទេះសេះដែលមានបទពិសោធ៥ឆ្នាំ។ បុរសម្នាក់នេះអាចរកចំណូលបានប្រមាណពី៨០,០០០រៀល ទៅ១០០,០០០រៀល ក្នុងមួយថ្ងៃពីរបររត់រទេះសេះនេះ។ លោក លីម បញ្ជាក់ថា ចំណូលបានមិនទៀងទាត់ឡើង អាស្រ័យលើមានភ្ញៀវទេសចរច្រើនឬតិច។ ជាធម្មតានៅថ្ងៃសៅរ៍និងថ្ងៃអាទិត្យ រួមទាំងថ្ងៃបុណ្យទានផង គឺជាពេលដែលលោក ឌឹម លីម អាចរកចំណូលបានច្រើនគួរសម។ «បានមិនទៀងដែរហ្នឹង ថ្ងៃខ្លះក៏បានច្រើន ថ្ងៃខ្លះក៏មិនសូវបាន។ បានតែថ្ងៃសៅរ៍អាទិត្យដែរហ្នឹង»។ នេះជាការបញ្ជាក់បន្ថែមរបស់លោក លីម។

ក្រោយពីរករបរដឹកភ្ញៀវតាមរទេះសេះ ដែលត្រូវរត់ពីម៉ោងប្រមាណ៩ព្រឹក ដល់ម៉ោងប្រមាណ ៥ល្ងាច លោក លីម អះអាងថាជីវភាពគ្រួសារបានប្រសើរជាងមុនខ្លះដែរ។ ក្នុងរទេះសេះតូចល្មមរបស់លោក ឌឹម លីម អាចដាក់ភ្ញៀវបានពី៧ទៅ៨នាក់ ហើយតម្លៃភ្ញៀវជាតិនិងអន្តរជាតិ បុរសខ្ពស់ស្រឡះរូបនេះយកថ្លៃដូចគ្នា។ លោកបញ្ជាក់ ៖« ជីវភាពបានធូរធារជាងមុន។ ដឹកភ្ញៀវបរទេសនិងភ្ញៀវខ្មែរយកតម្លៃដូចគ្នា ហើយភ្ញៀវបរទេសជិះច្រើនជាងភ្ញៀវខ្មែរ»។

នៅរមណីយដ្ឋានភ្នំបាក់ ឬភ្នំកំពង់ត្រាច មានកន្លែងកម្សាន្តដូចជា ចូលមើលរូបភ្នំដែលមានផ្លូវបត់បែនតាមផ្ទាំងថ្មដ៏ស្រស់ស្អាត មើលចម្រេះភ្នំដែលមានដើមឈើនិងវល្លិដុះលាយឡំគ្នា មើលស្រះទឹកដែលជីកកាលពីសម័យអាណានិគមនិយមបារាំង មើលផ្លូវរថភ្លើង មើលល្អាងទឹក និងចូលលេងក្នុងវត្តគិរីសិលាជាដើម។ ក្រៅពីកន្លែងកម្សាន្ត នៅភ្នំបាក់ក៏មានរូបបដិមា ព្រះពុទ្ធទ្រង់ចូលបរិនិព្វាន រូបសំណាកឥសីជប់ រូបសំណាកយាយម៉ៅ និងមានរូបសំណាកជាច្រើនទៀត ដែលគេជឿថាស័ក្ដិសិទ្ធិ៕