កីឡាអន្តរជាតិ
អន្តរជាតិ
តើ Liverpool អាចបន្តកំណត់ត្រាមិនចាញ់ក្នុងលីគ នៅថ្ងៃ Boxing Day បានដែរឬទេ?
× Boxing Day ជាថ្ងៃសម្រាកបន្ទាប់ពីពិធីបុណ្យណូអែលមួយថ្ងៃ ពោលគឺថ្ងៃទី ២៦ ខែ ធ្នូដែលគេនិយមប្រារព្ធឡើងនៅប្រទេសលោកខាងលិច។ ពិធីដ៏រីករាយនេះ បានក្លាយជាថ្ងៃឈប់សម្រាកផងដែរសម្រាប់ប្រទេសមួយចំនួន ដោយយោងទៅតាមច្បាប់ជាតិ និងតំបន់នានា។ ប្រទេសទាំងនោះមានដូចជា ចក្រភពអង់គ្លេស ហុងកុង អូស្ត្រាលី កាណាដា នូវេលសេឡង់ និងប្រជាជាតិ Commonwealth មួយចំនួន។
ករណីពិសេសសម្រាប់អង់គ្លេស វេលស៍ និងអៀរឡង់ខាងជើង Boxing Day គឺជាថ្ងៃដែលមានកម្មវិធីប្រកួតកីឡាដ៏មមាញឹក និងសំខាន់បំផុត ពោលគឺ បាល់ទាត់ និងបាល់ឱប។ ការប្រកួតភាគច្រើនតែងតែមានការរៀបចំជំនួបរវាងក្រុមដែលស្ថិតនៅក្នុងទីក្រុង ឬតំបន់ដូចគ្នា ក្នុងទិសដៅជៀសវៀងកុំឲ្យក្រុម និងអ្នកគាំទ្ររបស់ពួកគេដើរលេងភ្លេចខ្លួនបន្ទាប់ពីពិធីបុណ្យណូអែល។
Boxing Day ជាថ្ងៃពិសេស សម្រាប់ប្រជាជននៅអង់គ្លេស ប៉ុន្តែការប្រកួតកីឡាបាល់ទាត់នៅអង់គ្លេសគ្រប់លីគទាំងអស់មិនបានសម្រាកទេ ដោយតម្រូវឲ្យពួកគេមានការប្រកួតចំថ្ងៃនោះតែម្តង។
ក្នុងក្របខណ្ឌ Premier League នឹងមានការប្រកួតរហូតដល់៩គូ នៅយប់ថ្ងៃ Boxing Day នេះតែម្តង។ Fulham នឹងត្រូវស្វាគមន៍ Wolverhampton នៅម៉ោង៧:៣០នាទីយប់ [ម៉ោងនៅកម្ពុជា] ខណៈ៨គូទៀតលេងនៅម៉ោងបន្តបន្ទាប់។
Newcastle United ដែលត្រូវធ្វើដំណើរទៅកាន់ទឹកដី Anfeld ដើម្បីតទល់ជាមួយក្រុមមិនទាន់ស្គាល់ចាញ់ Liverpool (ម៉ោង១០:០០នាទីយប់) ជាជំនួបគួរឲ្យចាប់អារម្មណ៍បំផុត។ Leicester City ទទួលភ្ញៀវ Manchester City ហើយ Manchester United ប៉ះ Huddersfield Town រីឯ Tottenham Hotspur ទទួល AFC Bournemouth និងជំនួបផ្សេងទៀត។
ដោយឡែកការប្រជែងគ្នានៅក្របខណ្ឌទីពីរអង់គ្លេស Championship ក៏មានការប្រកួតចំនួន ១២គូផងដែរនៅថ្ងៃ Boxing Day នេះ។ ក្រុមកំពុងឈរកំពូលតារាង Leeds United ដែលរំពឹងថានឹងឡើងទៅកាន់លីគកំពូលនៅរដូវកាលក្រោយត្រូវទទួលស្វាគមន៍ Blackburn Rovers ហើយ១១គូទៀតត្រូវលេងនៅម៉ោង ១០:០០នាទីដំណាលគ្នា៕
Tag:
បាល់ទាត់
Boxing Day
Premier League
© រក្សាសិទ្ធិដោយ thmeythmey.com