កីឡាអន្តរជាតិ
អន្តរជាតិ
Man Utd រើឥវ៉ាន់ Mourinho ចេញពីការិយាល័យត្រឹម៥នាទីប៉ុណ្ណោះក្រោយបញ្ចប់តំណែង
× ក្លិប Manchester United មិនចំណាយពេលវេលាយូរឡើយក្នុងការលុបចោលការចងចាំលោក Jose Mourinho ក្នុងនាមអ្នកចាត់ការទូទៅ។ ពួកគេបានរើឥវ៉ាន់របស់ Mourinho ពីការិយាល័យក្នុងរយៈពេលត្រឹម៥នាទីប៉ុណ្ណោះនៅក្រោយពេលបញ្ចប់តំណែងលោកពីទឹកដី Old Trafford។
អ្នកចាត់ការសញ្ជាតិព័រទុយហ្គាល់រូបនេះបានអស់ភារកិច្ចជាមួយក្រុមបិសាចក្រហមកាលពីសប្តាហ៍មុន បន្ទាប់ពីចាប់ផ្តើមរដូវកាលដ៏អាក្រក់បំផុតនៅក្របខណ្ឌ Premier League មិនធ្លាប់មានពីមុនមក។
ព័ត៌មានផ្លូវការមួយបានបញ្ជាក់ថា Special One បានបង្ហាញស្នាមញញឹមជាមួយនឹងការទទួលបានប្រាក់សំណង៣០លានដុល្លារអាមេរិកពីក្លិប Man Utd នៅពេលចាកចេញពីទីលានហ្វឹកហាត់ Carrington។
នៅពេលនោះដែរ បុគ្គលិកដែលធ្វើការនៅទីលានហ្វឹកហាត់របស់ក្លិបហាក់ដូចជាមានការប្រញាប់ប្រញាល់ដើម្បីកម្ចាត់ Mourinho ឲ្យបានឆាប់តាមដែលអាចធ្វើទៅបាន ខណៈដែលកាសែត The Sun បានរាយការណ៍ថាការិយាល័យរបស់អ្នកចាត់ការវ័យ៥៥ឆ្នាំនេះ ត្រូវបានរុះរើចេញត្រឹមរយៈពេល៥នាទីប៉ុណ្ណោះបន្ទាប់លោកត្រូវបានបញ្ចប់តំណែង។
ទ្រព្យសម្បត្តិ ព្រមទាំងឥវែឥវ៉ាន់សំខាន់ៗដូចលិខិតឆ្លងដែន រូបថតជាដើមរបស់ Mourinho ក្នុងការិយាល័យនោះ ត្រូវបានប្រមូលដាក់ចូលក្នុងកេះហើយដឹកតាមឡានដឹកទំនិញ។
មានការអះអាងទៀតថា មុនទទួលដំណឹងពីការបណ្តេញនេះ អតីតអ្នកចាត់ការ Chelsea, Real Madrid និង Inter Milan បានជួបផ្ទាល់ជាមួយលោក Ed Woodward អនុប្រធានប្រតិបត្តិរបស់ក្លិប Man Utd៕
© រក្សាសិទ្ធិដោយ thmeythmey.com