កីឡាអន្តរជាតិ
អន្តរជាតិ
គ្រូ Spurs យកជ័យជម្នះ ២-៦ លើ Everton ធ្វើកាដូឲ្យភរិយាថ្ងៃខួបអាពាហ៍ពិពាហ៍ ២៦ឆ្នាំ
× លោក Mauricio Pochettino បានឧទ្ទិសជ័យជម្នះដែល Tottenham Hotspur ឈ្នះ Everton ៦ទល់នឹង២ ដើម្បីនាំក្រុមបន្តការប្រជែងដណ្តើមពាន Premier League ទៅឲ្យប្រពន្ធរបស់លោកគឺអ្នកស្រី Karina សម្រាប់ថ្ងៃខួបអាពាហ៍ពិពាហ៍គម្រប់ ២៦ឆ្នាំ។
បុរសសញ្ជាតិអាហ្សង់ទីន ដែលជាអ្នកចាត់ការទូទៅរបស់ Spurs បានដឹកនាំក្រុមនេះដេញតាមពីក្រោយក្រុមកំពូលតារាង Liverpool ចំនួន ៦ពិន្ទុ បន្ទាប់ពីឆ្លងកាត់ការប្រកួត១៨លើក មាន៤២ពិន្ទុ។
ជារឿងចៃដន្យមួយ ដែលក្រុម Tottenham និង Everton បានបញ្ចប់ទៅក្នុងលទ្ធផល ២-៦ នាជំនួបក្នុងលីគសប្តាហ៍ទី១៨ ចំថ្ងៃរៀបការរវាងលោក Pochettino និងភរិយាអ្នកស្រី Karina កាលពី២៦ឆ្នាំមុន។
លោក Mauricio Pochettino និងភរិយារបស់លោក អ្នកស្រី Karina
នៅក្នុងបទសម្ភាសមួយក្រោយការប្រកួតចប់ Pochettino បាននិយាយថា៖«បាទ! លទ្ធផលនេះវាពិតជាអស្ចារ្យណាស់។ ខ្ញុំចង់ផ្ញើជ័យជម្នះនេះ រួមទាំងសេចក្តីស្រឡាញ់របស់ខ្ញុំទាំងអស់ទៅឲ្យភរិយាខ្ញុំ»។
«២-៦! នេះគឺជាកាដូ! ដែលមិនគួរឲ្យជឿ សម្រាប់ប្រពន្ធខ្ញុំនៅថ្ងៃខួបអាពាហ៍ពិពាហ៍គម្រប់ ២៦ឆ្នាំរបស់យើងទាំងពីរ។ វាជាការចៃដន្យមួយ ប៉ុន្តែជួនកាលវាមិនមែនជារឿងចៃដន្យទេ»។ អតីតអ្នកចាត់ការ Southampton បន្ថែមដូច្នេះ។
ក្រុមមាន់ខ្នាយមាសដែលស្ថិតនៅចំណាត់ថ្នាក់ទី៣ក្នុងតារាង Premier League បណ្តោះអាសន្ន ត្រូវទទួលភ្ញៀវ AFC Bournemouth នាជំនួប Boxing day នៅយប់ថ្ងៃទី២៦ ខែធ្នូ វេលាម៉ោង ១០:០០យប់ [ម៉ោងនៅកម្ពុជា]។ Spurs ក៏ស្ថិតក្នុងចំណោមក្រុមទាំង៤ពីអង់គ្លេសដែលបានឆ្លងទៅកាន់ការប្រកួតវគ្គ១៦ក្រុមចុងក្រោយពានរង្វាន់ Champions League ដែរ ដោយពួកគេត្រូវប៉ះក្រុមកំពុងឡើងជើង Borussia Dortmund៕
Tag:
បាល់ទាត់
Tottenham Hotspur
Mauricio Pochettino
© រក្សាសិទ្ធិដោយ thmeythmey.com