ជាតិ
សង្គមជាតិ
ក្រសួងដែនដី ប្តេជ្ញាចុះបញ្ជីដីធ្លី ឲ្យបាន១០០ភាគរយ នៅត្រឹមឆ្នាំ២០២១ លោក ជា សុផារ៉ា ឡើងថ្លែងក្នុងសន្និបាតប្រចាំឆ្នាំ នៅថ្ងៃទី២៤ ខែធ្នូ ឆ្នាំ២០១៨។ រូបពីក្រសួងដែនដី
× ក្រសួងដែនដី នគរូបនីយកម្ម និងសំណង់ ដែលស្ថិតនៅក្រោមការដឹកនាំរបស់លោករដ្ឋមន្ត្រី ជា សុផារ៉ា បានបង្ហាញការប្តេជ្ញាថា នឹងចុះបញ្ជីដីធ្លីឲ្យបានសម្រេច១០០ភាគរយ នៅត្រឹមឆ្នាំ២០២១ ក្នុងចំនួនក្បាលដីប្រមាណ៧លាន។ នេះបើយោងតាមសេចក្ដីប្រកាសព័ត៌មាន ដែលត្រូវបានផ្សព្វផ្សាយនៅក្រោយសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ របស់ក្រសួងរៀបចំដែនដី កាលពីថ្ងៃទី២៤ ខែធ្នូ ឆ្នាំ២០១៨។
សេចក្ដីប្រកាសព័ត៌មាន បានសរសេរថា ក្រសួងដែនដី នឹងអនុវត្តផែនការចុះបញ្ជីដីឲ្យបាន៨៣ភាគរយ នៅឆ្នាំ២០១៩, ៩៤ភាគរយ នៅឆ្នាំ២០២០ និងឈានទៅសម្រេចឲ្យបាន១០០ភាគរយ នៅឆ្នាំ២០២១ ក្នុងចំនួនក្បាលដីសរុបប្រមាណ៧លានក្បាលដី។
ប្រភពដដែល បានឲ្យដឹងថា ក្រសួង បានចេញបណ្ណកម្មសិទ្ទិដីជាង៥លានបណ្ណ ដែលស្មើនឹង ៧២ភាគរយ នៃក្បាលដីប្រមាណ៧លាននេះ។ ការចុះបញ្ជីដីមានលក្ខណៈជាប្រព័ន្ធ សម្រេចបានជាង ៤,៤ លានបណ្ណ និងលក្ខណៈដាច់ដោយដុំ សម្រេចបានជាង៦សែនបណ្ណ។
ក្រសួង បានបង្ហាញតាមរយៈសេចក្តីប្រកាសព័ត៌មានថា ចាប់តាំងពីការអនុវត្តរហូតដល់ខែវិច្ឆិកា ឆ្នាំ២០១៨ ការចុះបញ្ជីដីរដ្ឋបានជាង១,៦ពាន់បណ្ណ លើទំហំផ្ទៃដីជាង៧,៣សែនហិកតា, ដីឯកជនបានជាង៦សែនបណ្ណ (មិនបញ្ជាក់ទំហំដី), និងដីសហគមន៍ជនជាតិដើមបានជិត៧០០បណ្ណ ដោយក្នុងនោះមាន២៤សហគមន៍ ដែលមានទំហំដីជាង២,២លានហិកតា។
ក្រសួង បានបង្ហាញទៀតថា ចាប់តាំងពីការអនុវត្តរហូតដល់ ខែវិច្ឆិកា ឆ្នាំ២០១៨ ក្រសួង បានចុះបញ្ជីសិទ្ធិជួលរយៈពេលវែងលើដីរដ្ឋបានជាង៤០០បណ្ណ ដែលមានទំហដីជាង៧ម៉ឺនហិកតា និងចុះបញ្ជីសិទ្ធិសម្បទានដីសេដ្ឋកិច្ចបានជាង៣០០បណ្ណ ដែលមានទំហំដីជាង២សែនហិកតា៕
Tag:
ក្រសួងដែនដី
កម្មសិទ្ធិដីធ្លី
© រក្សាសិទ្ធិដោយ thmeythmey.com