កីឡាអន្តរជាតិ
អន្តរជាតិ
Juventus ត្រៀមប្រមាញ់ Lukaku ពី Man Utd អំឡុងទីផ្សារដោះដូរកីឡាករខាងមុខនេះ
× Juventus បានកំណត់គោលដៅរបស់ខ្លួនក្នុងការនាំយកខ្សែប្រយុទ្ធ Romelu Lukaku ពី Manchester United នៅពេលទីផ្សារដោះដូរកីឡាករបើកទ្វារនាខែមករាខាងមុខ។
បើយោងតាមកាសែតអ៊ីតាលី CalcioMercato ក្រុមកំពុងឈរនៅកំពូលតារាង Serie A បច្ចុប្បន កំពុងស្វែងរកខ្សែប្រយុទ្ធឆ្នើមមួយរូបដើម្បីយកទៅជំនួសតំណែង Mario Mandzukic ដែលមានវ័យចំណាស់បន្តិចទៅហើយ។
Lukaku ខ្សែប្រយុទ្ធអន្តរជាតិបែលហ្ស៊ិក វ័យ២៥ឆ្នាំ ទើបតែស៊ុតបញ្ចូលទីបាន ៦ គ្រាប់ប៉ុណ្ណោះក្នុងការបង្ហាញខ្លួន ២២ប្រកួតឲ្យបិសាចក្រហមសម្រាប់រដូវកាល ២០១៨-២០១៩នេះ។
ស្របពេលដែលខកខានសម្រាប់ការបង្ហាញខ្លួន នៅក្រោមការដឹកនាំដំបូងរបស់អ្នកចាត់ការថ្មីលោក Ole Gunnar Solskjaer នាការប្រកួតដែល Man Utd យកឈ្នះ Cardiff City ៥-១ ក្នុងក្របខណ្ឌ Premier League កាលពីចុងសប្តាហ៍កន្លងទៅ Lukaku ត្រូវបានក្លិបការពារជើងឯកអ៊ីតាលី Juventus ដាក់គោលដៅនាំរូបគេទៅជួយក្រុមនៅខែមករា ឆ្នាំ២០១៩នេះ។
ក្រៅពីអតីតខ្សែប្រយុទ្ធ Chelsea និង Everton រូបនេះ កាសែត Sportsmail បានរាយការណ៍កាលពីសប្តាហ៍មុនដែរថាភ្នាក់ងាររបស់ Paulo Pogba លោក Mino Raiola ក៏បានពិភាក្សាជាមួយ Juventus លើការផ្ទេរខ្សែបម្រើសញ្ជាតិបារាំងនេះត្រឡប់ទៅវិញផងដែរ ប៉ុន្តែ Man United មិនចង់លក់រូបគេទេ។
Raiola ជាអ្នកបញ្ចុះបញ្ចូលឲ្យ Pogba ផ្លាស់ទៅ Old Trafford កាលពីឆ្នាំ២០១៦ ក្នុងតម្លៃកំណត់ត្រា ៨៩លានផោន (១១០លានដុល្លារអាមេរិក)។
Anthony Martial និង Matteo Darmian ក៏ស្ថិតក្នុងការចាប់អារម្មណ៍របស់ក្រុមរហស្សនាម សេះបង្កង់ផងដែរ៕
Tag:
បាល់ទាត់
Romelu Lukaku
Manchester United
Juventus
© រក្សាសិទ្ធិដោយ thmeythmey.com