ជាតិ
កសិដ្ឋានសរីរាង្គចម្ការដំណាក់! ស្នាក់នៅបែបបុរាណ និងរីករាយកម្សាន្តបែបសម័យ
×![]()
ដោយ: ថ្មីៗ
ស្ថិតនៅចម្ងាយប្រមាណ១០គីឡូម៉ែត្រពីទីរួមខេត្តកែប កសិដ្ឋានសរីរាង្គចម្ការដំណាក់ (Chamkar Damnak Organic Farm) ជាទីតាំងបង្អួតសម្រស់ធម្មជាតិដ៏អស្ចារ្យនៅក្បែរជើងភ្នំវល្លិ៍ ក្នុងភូមិសាស្ត្រស្រុកដំណាក់ចង្អើរ។ ក្រៅពីដំណាំម្រេច ក្រូចវល្លិ៍ (Passion Fruit) និងដំណាំហូបផ្លែផ្សេងៗ ចម្ការដំណាក់ជាផ្ទះស្នាក់នៅបែបធម្មជាតិដែលមាន៦បន្ទប់។
ក្រុមសារព័ត៌មាន ThmeyThmey បានយកទីតាំងដ៏ស្រស់ស្អាតនៅតំបន់ភ្នំនេះ សម្រាប់ដំណើរកម្សាន្តប្រចាំឆ្នាំរបស់ខ្លួន។ ចម្ការដំណាក់ ស្ថិតក្បែរជើងភ្នំវល្លិ៍ដាច់តែឯង ដោយមានចម្ងាយប្រមាណពីរ២គីឡូម៉ែត្រពីទីប្រជុំជន។ ក្នុងដំណើរបែបផ្សេងព្រេងនេះ រថយន្តប៊ឺស៣៥កៅអី មិនអាចចូលទៅដល់ទីនោះដោយផ្ទាល់ឡើយ ប៉ុន្តែបុគ្គលិក កសិដ្ឋាន បានបើកត្រាក់ទ័រមកដឹកឥវ៉ាន់ ហើយក្រុមអ្នកទេសចរ ThmeyThmey បានដើរឆ្លងកាត់ភ្នំឆ្ពោះទៅកាន់កសិដ្ឋានដោយផ្ទាល់ ដោយដៃកាន់ទឹក និងភេសជ្ជៈដែលជាផលិតផលរបស់ក្រុមហ៊ុន Coca Cola។
ទោះបីជាយ៉ាងណាក៏ដោយ ស្ថានភាពផ្លូវខ្វាត់ខ្វែងក្នុងព្រៃ មិនចោទជាបញ្ហាសម្រាប់រថយន្ត V-Class នៃត្រកូល Mercedes-Benz ឡើយ។ រថយន្តដែលបញ្ជាដោយអគ្គនាយក ThmeyThmey បានលូនទៅដល់មុខកសិដ្ឋានចម្ការដំណាក់ដ៏ស្រស់ស្អាត។
យើងបានទៅដល់ទីតាំងកម្សាន្តនោះ រាងយប់បន្តិចទៅហើយ ប៉ុន្តែយើងអាចមើលគ្នាឃើញ ដោយសារពន្លឺអំពូលដែលប្រើថាមពលព្រះអាទិត្យ និងពន្លឺព្រះចន្ទរះចំពីលើខ្នងភ្នំ។ ក្រុមការងារខ្លះ បាននាំគ្នាបោះតង់ដែលផ្តល់ដោយ លោក អាង គីមអៀង ប្រធានទីភ្នាក់ងារទេសចរណ៍ Great Angkor Tours អ្នកខ្លះរៀបចំចាត់ចែងចំអិនអាហារ ឯអ្នកខ្លះរៀបចំកន្លែងដើម្បីចាក់ភ្លេងរាំកម្សាន្តជាមួយនឹងបទសប្បាយៗបែបប្រពៃណីខ្មែរ និងបរទេស។
ទោះបីជាមេឃភ្លៀងក៏ដោយ ប៉ុន្តែភាពសប្បាយរីករាយរបស់ក្រុមអ្នកសារព័ត៌មាន ThmeyThmey នៅតែបន្តរហូតដល់យប់ជ្រៅ ហើយក៏មិនបង្កការរំខានដល់អ្នកភូមិនោះដែរ ដោយសារទីតាំង កសិដ្ឋានសរីរាង្គចម្ការដំណាក់ ស្ថិតនៅដាច់តែឯង។
ក្នុងចំណោមបុគ្គលិកសារព័ត៌មាន ThmeyThmey ជាង៣០នាក់ អ្នកខ្លះសម្រាកក្នុងបន្ទប់ដែលមានរៀបចំជាដំណាក់ៗ ដោយមានកង្ហា អ្នកខ្លះសម្រាកក្នុងតង់ដោយគយគន់មើលពន្លឺព្រះចន្ទ រីឯបុគ្គលិកខ្លះដែលនៅរាំច្រៀងលេងដល់យប់ជ្រៅ គេងនៅក្រៅបន្ទប់ ប៉ុន្តែមិនមានមូសរំខាននោះឡើយ។
ការស្នាក់កម្សាន្តនៅផ្ទះស្នាក់ចម្ការដំណាក់ ប្រកបដោយសុខដុមរមនា ជាពិសេសដោយសារមានឆ្មាំយាមនៅមាត់ជណ្តើរ និងមុខបន្ទប់ ដោយឆ្មាំដែលច្នៃពីឈើប្រណីតទាំងនោះ ប្រៀបដូចជាវីរបុរសនាសម័យអេហ្ស៊ីបបុរាណ។
សូមទស្សនាទិដ្ឋភាពដូចខាងក្រោមដែលថតដោយ លោក ឈុត ឈាណា (Drone) លោក ប៉ាន់ បូនី និងលោក ទូច សុវណ្ណឌី៖
© រក្សាសិទ្ធិដោយ thmeythmey.com
