កាំជ្រួច 3D សម្រាប់អបអរសាទរវិមានឈ្នះ-ឈ្នះ ទិញមកពីចិន

ជាតិ

សង្គមជាតិ

កាំជ្រួច 3D សម្រាប់អបអរសាទរវិមានឈ្នះ-ឈ្នះ ទិញមកពីចិន

27, Dec 2018 , 9:59 pm

រូបភាព

រូបពីហ្វេសប៊ុករបស់លោក ឈុំ សុជាតិ

ដោយ: ភួង វ៉ាន់ថា

វិមានឈ្នះ-ឈ្នះ នឹងត្រូវសម្ពោធជាផ្លូវការ នៅថ្ងៃទី២៩-៣០-៣១ ខែធ្នូ ឆ្នាំ២០១៨ ក្រោមវត្តមានសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ក្នុងពិធីសម្ពោធវិមានឈ្នះ-ឈ្នះ នឹងមានការបាញ់កាំជ្រួចអបអរសាទរបែប3D ដែលមានលក្ខណៈទំនើប និងមានរូបភាពប្លែកៗ រយៈ៣យប់ផងដែរ។

លោក ឈុំ សុជាត អ្នកនាំពាក្យក្រសួងការពារជាតិ បានប្រាប់សារព័ត៌មានថ្មីៗថា កាំជ្រួចទាំងនោះ ទិញមកពីប្រទេសចិន។ ចំពោះការចំណាយ លោកមិនបានដឹងនោះទេ។ ក្នុងកម្មវិធីនោះក៏មានការអញ្ជើញចូលរួមពីសំណាក់មន្ត្រីការពារជាតិមកពីប្រទេសចិន វៀតណាម ថៃ និង ឡាវ ផងដែរ។

កម្មវិធីរយៈពេល៣ថ្ងៃនោះ មានកម្មវិធីកម្សាន្តជាច្រើន ដូចជាការតាំងពិព័រណ៍ផលិតផលជាតិ និងអន្តរជាតិប្រមាណ៨០០ស្តង់, ប្រដាល់គុណខ្មែរ, ជិះកង, វាយកូនហ្គោល, អុកចត្រង្គ, ប្រណាំងរទេះគោ រទេះក្របី រទេះសេះ និងសិល្បៈផ្សេងៗទៀត។

យោងតាមគេហទំព័រហ្វេសប៊ុករបស់សម្ដេចតេជោ ហ៊ុន សែន វិមានឈ្នះ-ឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៅកម្ពុជាទាំងមូល។

គួររម្លឹកថា វិមានឈ្នះ-ឈ្នះ ត្រូវបានសាងសង់ឡើង កាលពីខែកុម្ភៈ ឆ្នាំ២០១៦ ក្នុងទំហំផ្ទៃដី៨ហិចតា នៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ៕