រដ្ឋអារ៉ាប់ផ្តើមងាកមកចាប់ដៃរបបដឹកនាំ អាសាដ ឡើងវិញ ខណៈភ្លើងសង្គ្រាមកាន់តែជិតរលត់

អន្តរជាតិ

រដ្ឋអារ៉ាប់ផ្តើមងាកមកចាប់ដៃរបបដឹកនាំ អាសាដ ឡើងវិញ ខណៈភ្លើងសង្គ្រាមកាន់តែជិតរលត់

28, Dec 2018 , 3:43 pm

រូបភាព

ទង់អេមីរ៉ាត់ អារ៉ាប់រួម ត្រូវបានបង្ហូតឡើងវិញនៅក្រុងដាម៉ាស នៅពេល ស្ថានទូតរដ្ឋអារ៉ាប់មួយនេះត្រូវបានបើកឡើងវិញជាផ្លូវការនៅថ្ងៃព្រហស្បតិ៍ ទី២៧ ខែធ្នូ (AFP)

ដោយ: សៅ ផលនិស្ស័យ (Sao Phal Niseiy)

អេមីរ៉ាត់ អារ៉ាប់រួម សម្រេចបើកស្ថានទូតរបស់ខ្លួនឡើងវិញនៅរដ្ឋធានីដាម៉ាសប្រទេសស៊ីរីនៅសប្តាហ៍នេះ ហើយបារ៉ែនប្រកាសថាខ្លួននឹងចាប់ផ្តើមបើកស្ថានទូតរបស់ខ្លួននៅស៊ីរីឆាប់ៗដែរ។ ការសម្រេចភ្ជាប់ទំនាក់ទំនងឡើងវិញនេះបង្ហាញឲ្យឃើញពីបំណងរបស់រដ្ឋឈូងសមុទ្រមួយនេះក្នុងការនាំស៊ីរីត្រឡប់ចូលសម្ព័ន្ធអារ៉ាប់ឡើងវិញ និងជាសញ្ញាមួយបញ្ជាក់ថា ភ្លើងសង្គ្រាមស៊ីរីដែលឆាបឆេះអស់ប្រាំពីរឆ្នាំមកនេះ កាន់តែជិតរលត់មែនទែនហើយ។

អេមីរ៉ាត់ អារ៉ាប់រួម បានផ្តាច់ទំនាក់ទំនងការទូតជាមួយស៊ីរីកាលពីខែកុម្ភៈឆ្នាំ ២០១២ បន្ទាប់ពីមានការបង្រា្កបចលនាប៉ះបោរប្រឆាំងនឹងរបបដឹកនាំស៊ីរីរបស់លោក បាសា អាល់អាសាដ និងបណ្តាលឲ្យសង្គ្រាមស៊ីវិលផ្ទុះឡើងជាផ្លូវការ។

ប៉ុន្តែជិតប្រាំពីរឆ្នាំក្រោយមក ទង់ជាតិអេមីរ៉ាត់ អារ៉ាប់រួម ត្រូវបង្ហូតឡើងជាថ្មីម្តងទៀតនៅស្ថានទូតរបស់ខ្លួនកណ្តាលរដ្ឋធានីដាម៉ាស។ នេះមានន័យថា អារ៉ាប់រួម សម្រេចត្រឡប់មករកចងសម្ព័ន្ធភាពជាមួយរបបដឹកនាំស៊ីរីឡើងវិញហើយ។

យោងតាមទីភ្នាក់ងារព័ត៌មាន AFP ក្រសួងការបរទេសអេមីរ៉ាត់ អារ៉ាប់រួម បានចេញសេចក្តីថ្លែងការណ៍ថា ខ្លួនមានបំណងបន្តទំនាក់ទំនងជាមួយស៊ីរី ហើយក៏ពង្រឹងតួនាទីរបស់រដ្ឋអារ៉ាប់ដែរ ជាពិសេសជំរុញការរក្សាឯករាជ្យ, អធិបតេយ្យ និងបូរណភាពដែនដីស៊ីរី។ ក្រសួងដដែលនេះក៏សង្កត់ធ្ងន់ថា ការស្តារទំនាក់ទំនងនេះជាការចូលរួមទប់ស្កាត់រាល់ការលូកលាន់ពីប្រទេសក្នុងតំបន់ក្នុងកិច្ចការផ្ទៃក្នុងរបស់ស៊ីរីតែម្តង។

តាមពិតទៅ អេមីរ៉ាត់ អារ៉ាប់រួម សម្រេចបើកស្ថានទូតនៅស៊ីរីឡើងវិញ ក្រោយមានការចែកចាយព័ត៌មានចរចាអារ៉ាមជាបន្តបន្ទាប់ប៉ុន្មានថ្ងៃចុងក្រោយជុំវិញការបើកស្ថានទូតនេះ ខណៈដែលគេឃើញមានការជួសជុលនិងតុបតែងលម្អនៅទីតាំងស្ថានទូតអារ៉ាប់រួមនោះបន្តធ្វើឡើងជាច្រើនថ្ងៃមកនេះ។

អ្វីដែលគួរឲ្យកត់សម្គាល់ដែរ ប៉ុន្មានម៉ោងក្រោយក្រុងអាប៊ូដាប៊ីប្រកាសបើកស្ថានទូតឡើងវិញ បារ៉ែនក៏បានប្រកាសស្តារទំនាក់ទំនងការទូត និងបើកស្ថានទូតឡើងវិញនៅស៊ីរីដូចគ្នាដែរ។ ដូចអារ៉ាប់រួមដែរ បារ៉ែនបានផ្តាច់ទំនាក់ទំនងជាមួយស៊ីរីនៅក្នុងឆ្នាំ ២០១២។

តាមពិតទៅ អេមីរ៉ាត់ អារ៉ាប់រួម និងបារ៉ែនជារដ្ឋពីរក្នុងចំណោមសមាជិកក្រុមប្រឹក្សាកិច្ចសហប្រតិបត្តិការឈូងរដ្ឋឈូងសមុទ្រ (GCC) ទាំងប្រាំមួយដែលរក្សាជំហររឹងត្អឹងខ្លាំងជាងគេលើបញ្ហាសង្គ្រាមស៊ីរីចាប់ពីឆ្នាំ ២០១២មក។ រដ្ឋទាំងពីរថែមទាំងបានទទួលស្គាល់សម្ព័ន្ធក្រុមឧទ្ទាមប្រឆាំងរបបដឹកនាំស៊ីរីជាតំណាងស្របច្បាប់របស់ស៊ីរីថែមទៀត។

ប៉ុន្តែ ការប្តូរជំហរការទូតរបស់រដ្ឋអារ៉ាប់ទាំងពីរ នៅពេលនេះមិនមែនជារឿងសាមញ្ញឡើយ ហើយវាក៏ជាសារមួយដែលបញ្ជាក់យ៉ាងច្បាស់ថា សង្គ្រាមស៊ីរីដ៏រ៉ាំរ៉ៃក្បែរនឹងឈានដល់ទីបញ្ចប់ហើយ។ អេមីរ៉ាត់ អារ៉ាប់រួម ក៏ប្រហែលជាត្រៀមអូសទាញ ស៊ីរីត្រឡប់ចូលក្នុងសម្ព័ន្ធអារ៉ាប់ឡើងវិញដែរ ក្រោយត្រូវអង្គការតំបន់នេះបណ្តេញចេញអស់ប្រាំពីរឆ្នាំមកនេះ។.

សង្គ្រាមជិតចប់ ហើយរបបដឹកនាំលោក អាសាដ កាន់តែលែងឯកោ សង្គ្រាមស៊ីរីផ្ទុះឡើងនៅក្នុងឆ្នាំ ២០១១ បន្ទាប់ពីរបបដឹកនាំស៊ីរីបង្ក្រាបក្រុមបាតុករប្រឆាំងរដ្ឋាភិបាល។ មកដល់បច្ចុប្បន្នសង្គ្រាមនេះឆក់យកជីវិតជនស្លូតត្រង់អស់យ៉ាងហោចណាស់ ៣៦ម៉ឺននាក់ ហើយធ្វើឲ្យប្រទេសទាំងមូលខូចខាតស្ទើរទាំងស្រុង។ បច្ចុប្បន្នរបបដឹកនាំលោក អាសាដ កំពុងមានប្រៀបក្នុងសង្គ្រាមស៊ីវិលនេះ បន្ទាប់ពីរុស្ស៊ីចូលប្រឡូកក្នុងសង្គ្រាមដោយប្រើប្រាស់ទ័ពអាកាសសំពងក្រុមឧទ្ទាមស៊ីរីចាប់ពីឆ្នាំ ២០១៥ មកនោះ។

រុស្ស៊ីក៏កំពុងក្លាយជាតួឯកដែលចេញមុខជ្រោមជ្រែងការដឹកនាំចរចានយោបាយជាមួយក្រុមប្រឆាំងស៊ីរីថែមទៀតផង ស្របពេលដែលអាមេរិកដែលជាខ្នងបង្អែកដ៏ធំរបស់ក្រុមបះបោរនៅស៊ីរីនោះបានប្រកាសដកទ័ពថ្មើរជើងទាំងស្រុងពីរុស្ស៊ី។ អាមេរិកទំនងជាលែងពាក់ព័ន្ធនឹងបញ្ហាស៊ីរីខ្លាំងដូចមុនហើយ ហើយរបបដឹកនាំស៊ីរីនឹងមានលទ្ធភាពច្រើនជាងមុនក្នុងការបញ្ចបសង្គ្រាមស៊ីវិល និងកំណត់ជោគវាសនារបស់ខ្លួនពីថ្ងៃនេះទៅមុខក្រោមការជ្រោមជ្រែងរបស់រុស្ស៊ី និងអ៊ីរ៉ង់ផង។

គេអាចកត់សម្គាល់ឃើញហើយថា របបដឹកនាំស៊ីរីកាន់តែលែងឯកោទៀត ដោយចាប់ផ្តើមមានមិត្តរាប់អានឡើងវិញជាបន្តបន្ទាប់។ ដូចបានរៀបរាប់ខាងលើស្រាប់ អេមីរ៉ាត់ អារ៉ាប់រួម បានបើកស្ថានទូតឡើងវិញ ហើយប្រធានាធិបតីស៊ូដង់លោក អូម៉ា អាល់បាស៊ែរ (Omar al-Bashir) ដើមខែធ្នូ

ក្រៅពីមានការភ្ជាប់ទំនាក់ទំនងការទូតឡើងវិញជាមួយស៊ីរីជាបន្តបន្ទាប់ ប៉ុន្មានសប្តាហ៍មុន ហ្ស៊កដានីក៏ចាប់ផ្តើមបើកព្រំដែនឲ្យមានការឆ្លងកាត់ និងពាណិជ្ជកម្មទ្វេភាគីឡើងវិញដែរជាមួយស៊ីរី។ ហើយអ្វីដែលសំខាន់ ក្រុមហ៊ុនអាកាសចរណ៍ Sham Wings របស់ស៊ីរីចាប់ផ្តើមជើងហោះហើរដឹកអ្នកដំណើរឡើងវិញជាលើកដំបូងក្នុងរយៈពេលប្រាំពីរឆ្នាំ ពីស៊ីរីទៅទុយណេស៊ីដែរនៅសប្តាហ៍នេះ៕