ពីនេះ ពីនោះ
ព័ត៍មានសុខភាព
ចំណាយពេលដាំដំណាំក្នុងសួនច្បារក៏អាចជួយឲ្យអ្នកមានអាយុវែងដែរ
× មនុស្សភាគច្រើនចំណាំថា មនុស្សវ័យចំណាស់ៗពីអាយុ៩០ឆ្នាំទៅ១០០ឆ្នាំតែងមានទម្លាប់រួមមួយគឺថែទាំ ឬដាំដំណាំក្នុងសួនច្បារ។ តើការបន្ធូរអារម្មណ៍ជាមួយធម្មជាតិបែបនេះអាចជួយឲ្យមនុស្សមានអាយុកាន់តែច្រើនបានដែរឬទេ?
បើតាមការសង្កេតមើលរបស់ក្រុមប្រជាជនទាំងប្រាំតំបន់ក្នុងពិភពលោក ដែលមានអាយុរស់នៅយូរអង្វែងជាងគេ ដូចជានៅកោះ Okinawa នៅជប៉ុន, ទីក្រុង Nicoya នៅកូស្តារីកា, ក្រុង Sardinia នៅអ៊ីតាលី, Icaria នៅក្រិក និង Loma Linda នៅកាលីហ្វរញ៉ា បានបង្ហាញពីទម្លាប់រស់នៅមួយចំនួនដែលជួយរក្សាសុខភាពរបស់ពួកគេ។
នៅក្នុងសហគមន៍ទាំងនោះ ប្រជាជនជាច្រើននាំគ្នាធ្វើលំហាត់ប្រាណជាប្រចាំ ហើយក៏នាំគ្នាហូបអាហារសម្បូរជាតិសរសៃដូចជាបន្លែផ្លែឈើ និងចំណាយពេលដាំដំណាំក្នុងសួនច្បារជាដើម។ បើតាមការចុះផ្សាយដោយសារព័ត៌មានអង់គ្លេស BBC ដើមខែធ្នូ ការថែទាំដំណាំសួនច្បារជាសកម្មភាពមួយដែលជាលំនាំហាត់ប្រាណស្រាលៗ ដោយមានការចំណាយពេលវេលានៅខាងក្រៅផ្ទះ។
វាអាចជួយឲ្យមនុស្សគ្រប់គ្នាដកដង្ហើម និងមានអារម្មណ៍ល្អដោយសារភាពស្ងប់ស្ងាត់ក្នុងពេលតែមួយ។ ការសិក្សាផ្នែកវេជ្ជសាស្ត្រមួយចំនួនក៏បានបញ្ជាក់ផងដែរថា ទម្លាប់ល្អទាំងអស់នេះពិតជាអាចជួយកាត់បន្ថយជំងឺផ្លូវអារម្មណ៌ និងបង្កើនការចង់ចាំឲ្យកាន់តែប្រសើរនៅពេលអ្នកមានវ័យចាស់ជរា។
នៅកោះ Okinawa ប្រទេសជប៉ុន មានមនុស្សប្រមាណ៥០នាក់ក្នុងចំណោមមនុស្សមួយសែននាក់មានអាយុលើសពី១០០ឆ្នាំ។ នេះក៏គឺដោយសារការលំហែកាយរបស់ពួកគាត់គឺការចំណាយពេលវេលាជាមួយធម្មជាតិឲ្យបានច្រើន។
វេជ្ជបណ្ឌិតនៅមន្ទីរពេទ្យមួយចំនួននៅប្រទេស Scotland បានណែនាំអ្នកជំងឺដែលមានបញ្ហាផ្លូវអារម្មណ៍ ឬបញ្ហាស្រេស្តជាដើមចំណាយពេលខ្លះរបស់ខ្លួនក្នុងការដើរកំសាន្តនៅតំបន់ធម្មជាតិចៀសវាងការប្រើប្រាស់ថ្នាំ។ ក្រៅពីនេះទៅទៀត ការជ្រើសរើសចំណីអាហារជាប្រចាំក៏ជាចំណុចដ៏សំខាន់ណាស់ដែរ។ ការបរិភោគបន្លែផ្លែឈើ គ្រាប់ធញ្ញជាតិ ប្រេងអូលីវ ហូបអាហារដែលមានជាតិខ្លាញ់តិចសុទ្ធតែជារូបមន្តក្នុងការថែរទាំសុខភាពសម្រាប់ពេលអនាគត៕
© រក្សាសិទ្ធិដោយ thmeythmey.com