ក្នុងឆ្នាំ ២០១៨ ព្រឹត្តិការណ៍ជាច្រើនបានកើតឡើងដែលធ្វើឲ្យពិភពលោកភ្ញាក់ផ្អើល និងប្រែប្រួលនយោបាយពិភពលោក។ ព្រឹត្តិការណ៍ធំៗនោះមានទាំងការបញ្ជាដកអាមេរិកចេញពីកិច្ចព្រមព្រៀងនុយក្លេអ៊ែអ៊ីរ៉ង់ ជំនួបប្រវត្តិសាស្ត្រវវាងមេដឹកនាំអាមេរិក និងកូរ៉េខាងជើងដើម្បីឈានទៅរំសាយនុយក្លេអ៊ែរ សង្គ្រាមពាណិជ្ជកម្មរវាងអាមេរិកនិងចិន និងការកើនឡើងនៃឧស្ម័នកាបូនិចក្នុងកម្រិតខ្ពស់បំផុតមិនធ្លាប់មានផង។ សារព័ត៌មានថ្មីៗសូមលើកយកព្រឹត្តិការណ៍សំខាន់ៗពិភពលោកដែលកើតឡើងក្នុងឆ្នាំ ២០១៨នេះដូចខាងក្រោយ៖
១. បក្សប្រជាធិបតេយ្យដណ្តើមសភាតំណាងរាស្ត្រត្រឡប់ទៅកាន់កាប់វិញក្នុងការបោះឆ្នោត
ការបោះឆ្នោតពាក់កណ្តាលអាណត្តិនៅអាមេរិកខែវិច្ឆិកានាំមកនូវការផ្លាស់ប្តូរមួយដ៏ធំ។ នោះគឺ បក្សប្រជាធិបតេយ្យដណ្តើមយកសភាតំណាងត្រឡប់មកកាន់កាប់វិញ ប៉ុន្តែព្រឹទ្ធសភានៅតែស្ថិតក្រោមកាន់គ្រប់គ្រង។ បក្សប្រជាធិបតេយ្យដណ្តើមបានអាសនៈ២៣៥នៅសភាតំណាង និងបានអាសនៈ ៤៧ នៅសភាជាន់ខ្ពស់ឬព្រឹទ្ធសភា ដែលវាបង្កើតឲ្យមានតុល្យភាពអំណាចក្នុងស្ថាប័ននីតិបញ្ញាត្តិឡើងវិញដែរ។
២. កិច្ចព្រមព្រៀងសន្តិភាពបញ្ចប់ជម្លោះរ៉ាំរ៉ៃអេរីត្រេ និងអេត្យូពី
ខែមិថុនា នាយករដ្ឋមន្ត្រីអេត្យូពីថ្មីលោក Abiy Ahmed បានធ្វើឲ្យពិភពលោកភ្ញាក់ផ្អើលដោយលោកបានប្រកាសទទួលយកកិច្ចព្រមព្រៀងសន្តិភាពជាមួយអេរីត្រ ក្នុងគោលដៅបញ្ចប់ជម្លោះព្រំដែនអាយុកាល ១៨ ឆ្នាំ។
អេរីត្រេ និងអេត្យូពីបានប្រយុទ្ធគ្នាក្នុងសង្គ្រាមស៊ីសាច់ហុតឈាមគ្នាមួយពីឆ្នាំ ១៩៩៨ដល់ឆ្នាំ ២០០០។ មនុស្សប្រហែល ប្រាំបីម៉ឺននាក់បានស្លាប់។ ថ្វីដ្បិតតែចប់សង្គ្រាមមែន ជម្លោះព្រំដែននៅតែបន្ត។ ប៉ុន្តែដល់ខែកក្កដាឆ្នាំ ២០១៨ នាយករដ្ឋមន្ត្រី Ahmed បានធ្វើដំណើរទៅរដ្ឋធានី Asmara អេរីត្រេ ដើម្បីជួបជាមួយប្រធានាធិបតី Isaias Afwerki និងបានចុះហត្ថលេខាលើកិច្ចព្រមព្រៀងសន្តិភាពផងដោយមានវត្តមានអគ្គលេខាធិការអង្គការសហប្រជាជាតិលោក Antonio Guterres។ប៉ុន្តែគេនៅរងចាំមើលថា តើអនាគតនៃកិច្ចព្រមព្រៀងនឹងមានការប្រែប្រួលបែបណាទៀតនៅពេលអនាគតនោះ។
៣. លោក ត្រាំ ដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់
ប្រធានាធិបតី ដូណាល់ ត្រាំ បានប្រកាសដើរចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ (JCPOA) នៅថ្ងៃ ៨ខែឧសភា ហើយមេដឹកនាំនៃប្រទេសមហាអំណាចលេខមួយរូបនេះសន្យាដាក់ទណ្ឌកម្មសេដ្ឋកិច្ចកម្រិតខ្ពស់បំផុតប្រឆាំងអ៊ីរ៉ង់ផងដែរ។ លោក ត្រាំ មិនដែលពេញចិត្តកិច្ចព្រមព្រៀងអ៊ីរ៉ង់ដែលមហាអំណាចប្រាំសមាជិកអចិន្ត្រៃយ៍ក្រុមប្រឹក្សាសន្តិសុខ UN បូកអាល្លឺម៉ង់បង្កើតឡើងឆ្នាំ ២០១៥ ជាមួយអ៊ីរ៉ង់ ឡើយ ដ្បិតថា កិច្ចព្រមព្រៀងនេះមានសុពលភាពត្រឹមឆ្នាំ ២០២៥ និងមិនផ្តោតសំខាន់លើមីស៊ីលបាលីស្ទិកឡើយ។
៤.សង្គ្រាមពាណិជ្ជកម្មរវាងអាមេរិកនិងចិនផ្ទុះឡើង
ថ្ងៃ ៦ ខែកក្កដាឆ្នាំ ២០១៨ អាមេរិក និងចិនចាប់ផ្តើមសង្គ្រាមពាណិជ្ជកម្មជាផ្លូវការ ដោយអាមេរិកផ្តើមដំឡើងពន្ធ ២៥ ភាគរយប្រឆាំងទំនិញចិនទំហំ ៥០ ពាន់លានដុល្លារអាមេរិក។ តមកដល់ខែកញ្ញា លោក ត្រាំ ក៏បានបញ្ជាឲ្យគេដំឡើងពន្ធ ១០ ភាគរយលើទំនិញចិនផ្សេងទៀតដែលមានទំហំ ២០០ពាន់លានដុល្លារទៀត។ចំណែកចិនវិញ បានដាក់ដំឡើងពន្ធប្រឆាំងទំនិញអាមេរិកមានទំហំ ១១០ពាន់លានដុល្លារដែរចាប់ពីសង្គ្រាមផ្ទុះឡើងមក។
យ៉ាងណាក៏ដោយ សង្គ្រាមនេះត្រូវបានផ្អាកបណ្តោះអាសន្នរយៈពេល ៩០ថ្ងៃដើម្បីស្វែងរកដំណោះស្រាយជាអចិន្ត្រៃយ៍ ក្រោយមានជំនួបទ្វេភាគីរវាងលោក ដូណាល់ ត្រាំ និងលោក ស៊ី ជិនភីង នៅប៊ុយណូស៊ែរ អាហ្សង់ទីចុងខែវិច្ឆិកា។
៥. ជំនួបប្រវត្តិសាស្ត្រត្រាំ-គីម នៅសិង្ហបុរី
ជំនួបប្រវត្តិសាស្ត្ររវាងមេដឹកនាំអាមេរិក និងកូរ៉េខាងជើងដែលគ្រប់គ្នាទន្ទឹងរង់ចាំ បានចាប់ផ្ដើមឡើងនៅព្រឹកថ្ងៃទី១២ ខែមិថុនា ឯសណ្ឋាគារ Capella លើកោះសេនតូសា បុរីរដ្ឋសិង្ហបុរី។ ជំនួបប្រជុំធំទល់មុខគ្នារយៈពេល ៩០ នាទីជាលើកដំបូងក្នុងប្រវត្តិសាស្ត្ររវាងមេដឹកនាំទាំងពីរនេះហើយបានត្រួសត្រាយផ្លូវសម្រាប់ការកសាងទំនុកចិត្ត និងភាពជឿជាក់រវាងគ្នាដើម្បីសម្រេចគោលដៅរំសាយនុយក្លេអ៊ែរនិងបញ្ចប់សង្គ្រាមកូរ៉េផងដែរ។
ប៉ុន្តែកូរ៉េខាងជើងនឹងរំសាយអាវុធនុយក្លេអ៊ែរទាំងស្រុងតាមការសន្យាដែរឬអត់នោះ នៅតែជារឿងស្រពេចស្រពិលនៅឡើយ ខណៈដែលដំណើរការចរចារវាងអាមេរិកនិងកូរ៉េខាងជើងហាក់នៅជាប់ទ្រឹងនៅឡើយ។
៦. ករណីសម្លាប់អ្នកកាសែតអារ៉ាប៊ីសាអូឌីតដ៏ចម្រូងចម្រាស
លោក Jamal Khashoggi អ្នកកាសែតអារ៉ាប៊ីសាអូឌីតជើងចាស់ ត្រូវបានសម្លាប់ក្នុងកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ុលដើមខែតុលា ហើយសាកសពក៏ត្រូវកាត់ជាចំណែក ដែលរហូតមកដល់ពេលនេះមិនទាន់រកឃើញសាកសពនៅឡើយ។ ក្រោមសម្ពាធអន្តរជាតិ ក្រុងរីយ៉ាដបានចាប់ខ្លួនមនុស្សមួយចំនួនផងដែរ ប៉ុន្តែគេចោទប្រកាន់ថា ករណីឃាតកម្មនេះពាក់ព័ន្ធនឹងរជ្ជទាយាទ Mohammed bin Salman (MBS) ។
៧. កំណើនឧស្ម័នផ្ទះកញ្ចក់កើនខ្ពស់គួរឲ្យបារម្ភ
របាយការណ៍វិទ្យាសាស្ត្រថ្មីមួយបានបង្ហាញឲ្យឃើញថា កម្រិតឧស្ម័នកាបូនិចដែលត្រូវបានបំភាយចេញទៅបរិយាកាសនៅទូទាំងពិភពលោកមានការកើនឡើងខ្លាំងក្នុងឆ្នាំ ២០១៨ នេះ។ ទិន្នន័យនេះអាចបញ្ជាក់ឲ្យឃើញថា ពិភពលោកកំពុងខិតចាកឆ្ងាយពីគោលដៅឈានទៅដោះស្រាយបញ្ហាប្រែប្រួលអាកាសធាតុសាកល។
៨. Brexit ដល់ចំណុចទាល់ច្រក
ច្រើនជាងពីរឆ្នាំក្រោយសម្រេចចិត្តដើរចេញពីសហភាពអឺរ៉ុប ចក្រភពអង់គ្លេសនៅតែមិនទាន់ច្បាស់ថា អាចចាកចេញពីសហភាពអឺរ៉ុបដោយស្រួលដូចការគ្រោងទុកនៅថ្ងៃទី២៩ ខែមីនា ឆ្នាំ២០១៩ ឬយ៉ាងណាឡើយ។ ចុងឆ្នាំ ២០១៨ នាយករដ្ឋមន្ត្រីអង់គ្លេស សម្រេចបានកិច្ចព្រមព្រៀង Brexit ជាមួយសហភាពអឺរ៉ុបហើយ ប៉ុន្តែកិច្ចព្រមព្រៀងមិនត្រូវបានអ្នកនយោបាយអង់គ្លេសគាំទ្រទេ។
គេមិនគាំទ្រដោយសារបញ្ហាច្រើន។ ព្រំដែនរវាងអង់គ្លេស និងអៀឡង់ខាងជើងនៅតែមិនដាច់ស្រេចក្នុងសេចក្ដីព្រាងកិច្ចព្រមព្រៀងនេះ។ អ្នកខ្លះបារម្ភថា ការលែងលះនេះនឹងមិនដាច់ស្រេចឡើយព្រោះអង់គ្លេសអាចបន្តជាប់ជំពាក់ជាមួយសហភាពពន្ធគយរបស់អឺរ៉ុប ឯខ្លះទៀតចោទលោកស្រី ម៉េយ៍ ថា ធ្វើសម្បទានច្រើនពេកឲ្យអឺរ៉ុបដើម្បីគោលដៅចាកចេញនោះ។ វាក៏មានក្រុមអ្នកគាំទ្រឲ្យអង់គ្លេសបន្ដស្ថិតនៅក្នុងអឺរ៉ុបវិញ ដោយទាមទារឲ្យមានការបោះឆ្នោតប្រជាមតិម្ដងទៀតផង។ តើអនាគត Brexit នឹងទៅជាបែបណា? រង់ចាំមើលឆ្នាំ ២០១៩ទៀត។
៩. ចលនាអាវក្រៅលឿងផ្ទុះឡើងកក្រើកប្រទេសបារាំង
ពាក់កណ្តាលខែវិច្ឆិកា ចលនាបាតុកម្មហិង្សា«ពាក់អាវក្រៅពណ៌លឿង» ឬ Yellow Vest ផ្ទុះឡើងផុសផុលនៅប្រទេសបារាំងប្រឆាំងនឹងចំណាត់ការដំឡើងពន្ធរបស់រដ្ឋាភិបាលបារាំង។ ថ្វីបើបាតុកម្មកើតឡើងដោយសារការដំឡើងពន្ធប្រេងក្តី ចលនានេះទាក់ទាញបានការចូលរួមច្រើនពីប្រជាពលរដ្ឋបារាំងផ្សេងទៀតដែលខ្លះទាមទារឲ្យរដ្ឋាភិបាលដោះស្រាយបញ្ហានិកម្មភាព ខ្លះតវ៉ារឿងពន្ធទំនិញ ខ្លះទារដំឡើងប្រាក់ខែ ខ្លះចោទថា រដ្ឋាភិបាលលម្អៀងទៅក្រុមអភិជន ហើយខ្លះទៀតទាមទារឲ្យរដ្ឋាភិបាលឈប់ចាយលុយខ្ជះខ្ជាយដែរ។
ដោយសារចលនាបាតុកម្មបន្តអូសបន្លាយ និងកាន់តែធ្ងន់ធ្ងរ ប្រធានាធិបតីបារាំងលោក អេម៉ានុយអែល ម៉ាក្រុង ចេញមុខអន្តរាគមន៍ និងសម្រេចដាក់ចេញសម្បទានមួយចំនួនដើម្បីរំងាប់កំហឹងបាតុករដែរ។ ចំណាត់ការរបស់រដ្ឋាភិបាលដែលត្រូវបានប្រកាសកាលពីដើមខែធ្នូកន្លងទៅមានដូចជា ការសម្រេចដំឡើងប្រាប់ឈ្នួលអប្បបរមាក្នុងទំហំ ៧ ភាគរយ ឬ ១០០ អឺរ៉ូក្នុងមួយខែពីឆ្នាំ ២០១៩, លុបចោលគម្រោងដាក់ពន្ធលើអ្នកដែលបានប្រាក់សោធនិវត្តន៍តិចជាង ២០០០ អឺរ៉ូ និង លុបចោលពន្ធលើប្រាក់ថែមម៉ោងផង។ ចុងក្រោយ បារាំងជំរុញលើកទឹកចិត្តឲ្យនិយោជកផ្តល់ប្រាក់រង្វាន់លើកទឹកចិត្តដោយនិយោជិកនៅចុងឆ្នាំដោយគ្មានបង់ពន្ធដែរ។ ប៉ុន្តែចំណាត់ការនេះមិនបានរំងាប់កំហឹងប្រជាជនទាំងស្រុងឡើយ។
១០. ត្រាំ បញ្ជាដកទ័ពថ្មើរជើងទាំងស្រុងពីស៊ីរី និងមួយចំនួនពីអាហ្វហ្គានីស្ថានធ្វើឲ្យផ្អើលពិភពលោក
ចុងឆ្នាំ ២០១៨ ពិភពលោកភ្ញាក់ផ្អើល ដោយសារប្រធានាធិបតីអាមេរិកលោក ដូណាល់ ត្រាំ ប្រកាសដកទ័ពពីសង្គ្រាមមជ្ឈិមបូព៌ានិង អាស៊ីកណ្តាល។ លោក ត្រាំ បានថា អាមេរិកនឹងដកទ័ពថ្មើស្រុងទាំងស្រុង ២០០០នាក់ពីស៊ីរី និងកងទ័ពយ៉ាងហោច ៥០០០ នាក់ក្នុងចំណោមទ័ព ១៤០០០នាក់ចេញពីអាហ្វហ្គានីស្ថានដែរ។ ការសម្រេចចិត្តរបស់លោក ត្រាំ មានការជំទាស់ពីសមាជិកគណៈរដ្ឋមន្ត្រីរបស់លោកផង និងមានការទិតៀនពីក្រុមអ្នកជំនាញសន្តិសុខដូចគ្នា។ គ្មានការប្រឹក្សាជាមួយគេឯងជាមុនឡើយ ហើយរដ្ឋមន្ត្រីការពារជាតិលោក ជេម ម៉ាធីស ក៏សុខចិត្តលាលែងពីតំណែងដែរក្រោយលោក ត្រាំ សម្រេចចិត្តបែបនេះ។ អ្នកជំនាញខ្លះចាត់ទុកថា វាជាកំហុសឆ្គងផ្នែកយុទ្ធសាស្ត្រដ៏ធំដែលប្រធានាធិបតីអាមេរិកបង្កើតឡើង និងប៉ះពាល់ដល់ជំហរគោលនយោបាយអាមេរិកនៅមជ្ឈិមបូព៌ាពេលនេះផង៕