ឧកញ៉ាខ្មែរ ប្រាប់យុវជនថា គ្មានអ្នកណាក្លាយជាសេដ្ឋី ព្រោះដើរជាន់អំបែងកែវនិងរងើកភ្លើងទេ

ជាតិ

សង្គមជាតិ

ឧកញ៉ាខ្មែរ ប្រាប់យុវជនថា គ្មានអ្នកណាក្លាយជាសេដ្ឋី ព្រោះដើរជាន់អំបែងកែវនិងរងើកភ្លើងទេ

31, Dec 2018 , 11:11 am

រូបភាព

ឧកញ៉ា ម៉ុង ឫទ្ធី និង ឧកញ៉ា ស្រី ចាន់ថន

ដោយ: ថ្មីៗ

ឧកញ៉ា ម៉ុង ឫទ្ធី និង ឧកញ៉ា ស្រី ចាន់ថន បានរិះគន់និងសម្តែងការហួសចិត្តយ៉ាងខ្លាំង ចំពោះសិក្ខាសាលាមួយ ដែលឲ្យអ្នកចូលរួម ដើរជាន់អំបែងកែវ ដើម្បីទទួលបានជោគជ័យ។ ឧកញ៉ាទាំងពីរ បានហៅវិធីសាស្ត្រនេះ ថាជាការខុសឆ្គងដ៏ធំ។

តាមរយៈសារព័ត៌មានថ្មីៗ ឧកញ៉ា ម៉ុង ឫទ្ធី ដែលជាម្ចាស់ក្រុមហ៊ុន ម៉ុង ឫទ្ធីគ្រុប បានលើកឡើងបែបនេះថា៖«អ្នកមាននិងអ្នកជោគជ័យទាំងអស់លើពិភពលោក មិនដែលទៅជាន់អំបែងកែវនិងរងើកភ្លើងទេ....។ គេ អាចរកស៊ីមានបាន ដោយមិនចាំបាច់ទៅជាន់អំបែងកែង ជាន់រងើកភ្លើង»។

មិនត្រឹមតែរិះគន់នោះទេ ឧកញ៉ា ដែលល្បីខាងរកស៊ីផ្នែកកសិកម្មរូបនេះ នៅចង់ឲ្យមានចំណាត់ការផ្លូវច្បាប់លើអ្នកបង្កើតកម្មវិធីបង្រៀននេះថែមទៀត។ «ខ្ញុំមិនគាំទ្រនូវទង្វើនេះទេ និងសុំឲ្យសមត្ថកិច្ចចុះស្រាវជ្រាវរកអ្នកដែលនាំឲ្យប្រព្រឹត្តទង្វើនេះ យកមកសួរនាំផងដែរ ថា តើធ្វើនេះ ដើម្បីអ្វី»។

ចំណែក ឧកញ៉ា ស្រី ចាន់ថន ដែលទើបនឹងល្បីឈ្មោះខ្លាំងក្នុងវិស័យជំនួញ ហ៊ានអះអាងថា ការបង្រៀននេះ គឺខុសគោលការណ៍និងខុសលក្ខខណ្ឌ ហើយលោក បានដាស់តឿនគ្រូបង្វឹកនិងអ្នកចូលរួម ឲ្យគិតឡើងវិញ។ «អ្វីដែលខ្ញុំមើល គឺជាចិត្តសាស្ត្រនៃការអូសទាញ ដើម្បីបានផលប្រយោជន៍របស់ថ្នាក់ដឹកនាំរបស់គេ ដែលរៀបចំកម្មវិធីហ្នឹង។ តែសម្រាប់ខ្ញុំ ខ្ញុំអត់អាចទៅធ្វើអ៊ីចឹងបានទេ ព្រោះវាខុស។ វា ខុសលក្ខខណ្ឌនៃការបង្រៀនឲ្យគេជោគជ័យ»។

«តើលោក ធ្លាប់ឃើញការអប់រំបែបនេះតាមប្រទេសផ្សេងៗទេ?» ឧកញ៉ាវ័យក្មេងរូបនេះ បានឆ្លើយប្រាប់សារព័ត៌មានថ្មីៗយ៉ាងខ្លីនិងទាំងអស់សំណើចថា៖«ខ្ញុំ អត់ដែលឃើញផង»។

លោក ស្រី ចាន់ថន បានចែករំលែកបទពិសោធផ្ទាល់ខ្លួនថា បើចង់ជោគជ័យលើអ្វីមួយ ដូចជា ការរកស៊ី និងការធ្វើជំនួញ ជាដើម មនុស្សម្នាក់ៗ ត្រូវមានការតស៊ូនិងការអត់ធ្មត់ខ្ពស់។ លោក បន្ថែមថា ចំណុចសំខាន់មួយទៀត គឺមនុស្សម្នាក់ៗ ត្រូវឈ្វេងយល់ឲ្យច្បាស់លាស់ ពីការធ្វើជំនួញ ឬក៏ការបំពេញការងារឲ្យគេ។

«អ្វីដែលខ្ញុំជោគជ័យមកដល់ថ្ងៃនេះ ចំណុចមួយ គឺអត់ធ្មត់។ ការងារអ្វីក៏ដោយ បើយើង មិនអត់ធ្មត់ទេ កុំធ្វើវា។ ហើយការងារទាំងអស់ មិនមែនសុទ្ធតែជោគជ័យទាំងអស់ទេ តែយើង ត្រូវព្យាយាមយកការបរាជ័យនោះ មកធ្វើឲ្យវាជោគជ័យវិញ។ អត់ធ្មត់ បានន័យថា ធ្វើចិត្តយើងឲ្យធ្ងន់ មិនមែនយើងទៅជាន់អំបែងឲ្យមុតជើងទេ អាហ្នឹងគឺខុសហើយ»។

នៅថ្ងៃទី២៥ ខែធ្នូ ឆ្នាំ២០១៨ ក្រុមហ៊ុន Master Star Land Property Co.,LTD. (MSL) ដែលរកស៊ីខាងទិញ-លក់អចលនទ្រព្យ បានចាប់ផ្តើមបើកវគ្គបណ្តុះបណ្តាលមួយស្តីពី «អាថ៌កំបាំង២១យ៉ាងរបស់មហាសេដ្ឋី» ដោយអ្នកចូលរួមភាគច្រើនជាយុវជន។ លោក សិង្ហ អធិការ អគ្គនាយកក្រុមហ៊ុន និង លោក វឿន សីហា អគ្គនាយករង ធ្វើជាគ្រូបង្វឹកដោយផ្ទាល់តែម្តងក្នុងវគ្គបណ្តុះបណ្តាលនេះ។

ក្រោយរងការរិះគន់ជាហូរហែ លោក វឿន សីហា ក៏ចេញមកផ្សាយផ្ទាល់ (Live) តាមគណនីហ្វេសប៊ុកឈ្មោះ Seiha Voeurn ដើម្បីបកស្រាយ។ លោក វឿន សីហា ដែលអះអាងថាធ្លាប់ជាសិក្ខាកាមម្នាក់ ដែលបានឆ្លងកាត់វគ្គដើរលើអំបែងកែវនិងដើរលើរងើកភ្លើង បានចាត់ទុកការរិះគន់ទាំងនោះ ថាជាទស្សនៈនិងជាការយល់ឃើញផ្សេងពីគ្នារបស់បុគ្គលម្នាក់ៗ។

លោក លើកឡើងថា តាមពិត វគ្គបណ្តុះបណ្តាលបែបនេះ មិនមែនជារឿងថ្មីនោះទេ ពោលគឺធ្លាប់កើតមានតាំងពីឆ្នាំ២០០៨ មកម្ល៉េះ ហើយកាលនោះ មានគ្រូល្បីៗនិងខ្លាំងៗ ដែលចូលរួមបណ្តុះបណ្តាល។ លោក បន្តថា អ្នកដែលបានឆ្លងកាត់វគ្គនេះ ភាគច្រើន បានក្លាយជាអ្នកដឹកនាំ។

បើតាមគ្រូបង្វឹកខាងលើ វគ្គបណ្តុះបណ្តាលរបៀបនេះ ក៏មាននៅប្រទេសដទៃដែរ។ លោក លើកយកប្រទេសមួយចំនួន ដូចជា អាមេរិក ថៃ និងម៉ាឡេស៊ី ជាដើម មកធ្វើជាឧទាហរណ៍ ដោយលោកអះអាងថា គ្រូនៅតាមប្រទេសនោះ បានឲ្យសិក្ខាកាមធ្វើអ្វីដែលប្លែក ដែលវគ្គបណ្តុះបណ្តាលនៅស្រុកខ្មែរមិនដែលធ្វើថែមទៀត ដូចជា ការហក់ឆត្រយោង និងការលីអង្ករឡើងភ្នំជាដើម ហើយអ្នកចូលរួមភាគច្រើន ទទួលបានលទ្ធផលល្អ និងអ្នកខ្លះ បានក្លាយជាសេដ្ឋីក៏មាន។

បន្ទាប់ពីលើកយកបទពិសោធពីក្រៅប្រទេសមកធ្វើជាឧទាហរណ៍រួចហើយ លោក វឿន សីហា ក៏បានងាកមកនិយាយពីវគ្គបណ្តុះបណ្តាលរបស់ខ្លួនឯងវិញម្តង។ លោក បកស្រាយយ៉ាងដូច្នេះថា៖«អ្វីដែលខ្ញុំបណ្តុះបណ្តាលនេះ គោលដៅធំបំផុតគឺផ្លាស់ប្តូរឲ្យមនុស្សជម្នះនូវភាពភ័យខ្លាច»។

លោក បន្ថែមថា៖«ការបណ្តុះបណ្តាលរបស់ខ្ញុំ មិនបានដាក់មនោគមវិទ្យា ឬមួយធ្វើឲ្យមនុស្សឆ្កួតលីលាទេ ហើយក៏មិនបង្ខំឲ្យអ្នកចូលរួម ដើរលើអំបែងកែវនោះដែរ។ ប៉ុន្តែគ្រាន់តែជាការធ្វើតេស្តសាកល្បងថាមនុស្សចង់ជោគជ័យពិតប្រាកដ ហ៊ានធ្វើរឿងដែលខ្លួនឯងមិនធ្លាប់ធ្វើឬអត់។ ហើយជាក់ស្តែង អ្នកចូលរួមកម្មវិធីរបស់ខ្ញុំ គ្មានអ្នកណាម្នាក់រងគ្រោះ ដោយសារតែបញ្ហាទាំងអស់នោះទេ ហើយពុំមានអ្នកណាម្នាក់ តវ៉ាប្រឆាំងនឹងកម្មវិធីហ្នឹងដែរ»។

គ្រូបង្វឹករូបនេះ បរិយាយទៀតថា៖«ផ្ទុយមកវិញ ពួកគេ រឹតតែពេញចិត្ត ក្នុងការដែលធ្វើឲ្យពួកគេស្គាល់ខ្លួនឯងច្បាស់។ ពួកគេ រឹតតែពេញចិត្តថា ពួកគេ ពីមុន មិនស្គាល់ខ្លួនឯង ថាជានរណា និងមិនស្គាល់ពីសក្តានុពលរបស់ខ្លួនឲ្យបានច្បាស់លាស់ តែក្រោយពួកគេ បានចូលរួមហើយ ពួកគេ ស្គាល់ខ្លួនឯងច្បាស់ ហើយតាំងចិត្តក្នុងការធ្វើការប្រកបមុខរបរ ឲ្យបានខ្លាំងជាងមុន និងដឹកនាំឲ្យបានមុតមាំជាងមុន។ ...បងប្អូន យល់ថា វា ជារឿងឡប់ៗ តែអ្នកបានចូលរួម យល់ថា ជារឿងអស្ចារ្យក្នុងជីវិតរបស់គេ។ គេ មានអារម្មណ៍ថា ហាក់ដូចជាបានកើតសារថ្មីម្តងទៀត...។

គ្រូបណ្តុះបណ្តាលដដែលនេះ បានប្រៀបធៀបការបណ្តុះបណ្តាលរបស់ខ្លួនទៅនឹងការហ្វឹកហាត់របស់ទាហាន។ «ទាហាន ត្រូវឆ្លងកាត់ការលត់ដំយ៉ាងខ្លាំក្លានិងមុះមុត ដោយទាហានខ្លះ ឱនក្រាបលើបន្លាលួស ខ្លះវារលើគ្រោះក្រហម ខ្លះវារលើថ្ម។ ពេលតស៊ូបាន គឺជាធនធានមនុស្សពិតប្រាកដតែម្តង ហើយច្បាំងគឺមិនខ្លាចគេ»។

ប្រដូចបែបនេះរួចហើយ លោក ក៏បានលើកមូលហេតុ ដែលធ្វើឲ្យអ្នករកស៊ី និងអ្នកជំនួញខ្លះ បរាជ័យ។ «អ្នកជំនួញធ្វើការស្រាលៗ ហើយខ្លាច មិនហ៊ានសម្រេចចិត្ត តើអាចនឹងជោគជ័យយ៉ាងម៉េច? មូលដ្ឋានគ្រឹះនៃការរកស៊ី ឬធ្វើអាជីវកម្ម អ្នកខ្លះយល់ថាទាល់តែមានលុយ តែអ្នកខ្លះមានលុយ តែខ្វះការការតាំងចិត្ត ខ្វះការតស៊ូ ខ្វះការប្រឹងប្រែង ខ្វះការលត់ដំផ្លូវចិត្ត ដែលធ្វើឲ្យពួកគេ ងាយនឹងបោះបង់អាជីវកម្ម ឬធុរកិច្ច»។

យ៉ាងណាក៏ដោយ ការបកស្រាយនេះ ទំនងជាមិនអាចក្លាយជាហេតុផលសមស្រប និងអាចទទួលយកបាន សម្រាប់អ្នកប្រើប្រាស់ហ្វេសប៊ុកនោះទេ។ មកដល់ពេលនេះ អ្នកលេងហ្វេសប៊ុក នៅតែបន្តរិះគន់ និងចំអកឲ្យវគ្គបណ្តុះបណ្តាលនេះ៕