ភ្នំពេញ៖ សហគ្រិនវ័យក្មេង៣រូប នឹងបើកអាជីវកម្មជាផ្លូវការ នៅដើមឆ្នាំ២០១៩។ ក្រុមហ៊ុនអាជីវកម្មទាំងនោះ រួមមាន MotorGears ផ្នែកសេវាកម្ម និងសំភារម៉ូតូធំ, Malis សេវាកម្មសាឡន, ហាងនាឡិកាដៃម៉ាក«ពូ-PU» និង GoGo Taxi Cambodia គឺជាសេវាកម្មហៅរ៉ឺម៉កកង់បី និងតាក់ស៊ី តាមទូរសព្ទ។
ខណៈអាជីវកម្មជាច្រើន កំពុងរីកដុះដាលជាបន្តបន្ទាប់ ដោយពោរពេញទៅដោយការប្រកួតប្រជែងគ្នានោះ សហគ្រិនវ័យក្មេង ដែលបើកអាជីវកម្មជាផ្លូវការនៅឆ្នាំ២០១៩ បានរកមធ្យោបាយប្រជែងទីផ្សារ តាមរយៈការបង្កើត App ដើម្បីផ្ដល់សេវាកម្មរហ័សងាយស្រួល ដល់អតិថិជន។
GoGo Taxi Cambodia គឺជាសេវាកម្មហៅរ៉ឺម៉កកង់បី និងតាក់ស៊ី តាមកម្មវិធីទូរសព្ទ(Application)ថ្មីមួយទៀត ដែលទើបប្រឡូកក្នុងទីផ្សារប្រទេសកម្ពុជានៅដើមឆ្នាំ២០១៩នេះ។ GoGo Taxi Cambodia នឹងប្រកាសប្រតិបត្តិការ APP របស់ខ្លួនជាផ្លូវការនៅអំឡុងពាក់កណ្តាលខែមករា ឆ្នាំ២០១៩។ លោក ទូច ពិសិដ្ឋ សហស្ថាបនិក និងជាអ្នកគ្រប់គ្រងទីផ្សារនៃក្រុមហ៊ុន GoGo Taxi Cambodia បានបញ្ជាក់ប្រាប់សារព័ត៌មានថ្មីៗថា កម្មវិធីហៅរ៉ឺម៉កកង់បី និងតាក់ស៊ីតាមទូរសព្ទមួយនេះ នឹងបង្កើតជម្រើសកាន់តែល្អប្រសើសម្រាប់អតិថិជន។ ជាមួយគ្នានេះ GoGo Taxi Cambodia ចូលមកបំពេញភាពខ្វះចន្លោះនៃជំនួញមួយនេះ នៅក្នុងទីផ្សារបាន។
ចំណែកលោក មាស វុទ្ធី សហស្ថាបនិកក្រុមហ៊ុន MotorGears ដែលជាក្រុមហ៊ុនផ្គត់ផ្គងសម្ភារ និងសេវាថែទាំ និងជួសជុលម៉ូតូធំ បាននិយាយថា ក្រុមការងារលោកកំពុងរៀប app សម្រាប់ឲ្យអតិថិជន ហៅសេវាកម្មជួសជុលដល់ទីកន្លែង និងតុបតែងហាង។ លោក វុទ្ធី បានបញ្ជាក់ថា App ផ្ដល់សេវាកម្មដល់អតិថិជននេះ នឹងអាចឲ្យរួចរាល់ មុនពេលដែលអាជីវកម្មលោក បើកដំណើរការជាផ្លូវការ នៅដើមឆ្នាំ២០១៩។
សហស្ថាបនិកក្រុមហ៊ុន MotorGears បានបញ្ជាក់ដូច្នេះថា៖« ឥឡូវនេះយើងកំពុងរៀបចំហាងបាន៩០ភាគរយហើយ យើងបានដំណើរការជាបណ្ដើៗហើយ យើងកំពុងតែសាកល្បង app ឲ្យមានដំណើរការល្អ ។ app មានមុខងារជួយដល់អតិថិជនអាចចូលមើលពីសម្ភារម៉ូតូដែលខ្លួនចង់បាន ទាំងពីតម្លៃ អ្វីដែលពិសេសនោះអាចហៅសេវាកម្មជួសជុល និងរកទីតាំងយើងតាមរយៈ app បានផងដែរ ហើយ app អាចកត់ត្រាអត្តសញ្ញាណអតិថិជនពេលដែលគាត់មករកសេវាកម្មពួកយើង»។
លោក សែត ពិទូរ្យ ស្ថាបនិកក្រុមហ៊ុននាឡិកាម៉ាកជាភាសាខ្មែរ «ពូ-PU» បានចាប់ផ្ដើមដំណើរការជាបណ្ដើរៗតាំងពីខែតុលា ឆ្នាំ២០១៨មកម្ល៉េះ ដើម្បីសាកស្បងនូវផលិតនាឡិការបស់ខ្លួន។ តាមរយៈការចរាចរផលិតផលនាឡិកាម៉ាកខ្មែរ រយៈពេលជាង៣ខែមកនេះ លោក ពិទូរ្យ សង្កេតឃើញថា អាជីវកម្មរបស់ខ្លួន អាចមានដំណើរការល្អទៅថ្ងៃអនាគត ក្រោយពីមានការគាំទ្រពីអតិថិជនជាតិ និងអន្តរជាតិផង ពោលគឺលោកបាននាំចេញទៅកាន់ប្រទេសកូរ៉េខាងត្បូង ប្រទេសអារ៉ាប់ សហរដ្ឋអាមេរិកជាដើម។
ដោយសារឃើញសក្ដានុពលផលិតផលខ្លួនបែបនេះ ទើបលោក ពិទូរ្យ គ្រោងសម្ពោធអាជីវកម្មជាផ្លូវការ នៅចុងខែមករាឆ្នាំ២០១៩ខាងមុខនេះ ព្រោះបច្ចុប្បន្នលោក កំពុងរៀបចំរចនាសម្ព័ន្ធបុគ្គលិក និងរៀបចំកន្លែងថ្មីឲ្យកាន់តែធំជាងមុន។
លោកនិយាយថា៖« ខ្ញុំកំពុងរៀបចំការិយាល័យថ្មី ព្រោះត្រូវការពង្រីកបន្ថែមធំជាងមុន ដែលមានកន្លែងតាំងបង្ហាញនាឡិកាដល់ភ្ញៀវ និងរៀបចំផ្នែកនីមួយៗឲ្យនៅជិតគ្នា ព្រោះពីមុនផ្នែក ដំឡើងនាឡិកា, ផ្លាកទិន និងផ្នែកផ្សេងៗទៀតនៅឆ្ងាយពីគ្នាដែលនាំឲ្យពិបាកធ្វើការ ដូច្នេះកន្លែងថ្មីនេះយើងប្រមូលមកជុំគ្នាតែម្ដង ឲ្យក្លាយជារោងចក្រមួយតែម្ដង ប្រហែលក្នុងកំឡុងខែមករាឆ្នាំក្រោយ ដូច្នេះយើងនឹងអាចសម្ពោធជាផ្ឡូវកានៅចុងខែមករា ឬដើមខែកុម្ភៈ»។
ចំណែកកញ្ញា ហួន ចាន់ដេវីផា សហស្ថាបនិក Malis ដែលជាក្រុមហ៊ុនផ្ដល់សេវាកម្មកក់សេវាកម្មសាឡនសម្រាប់សុភាពនារី ក៏ត្រៀមបើកដំណើរការអាជីវកម្មខ្លួនជាផ្លូវការនាដើមឆ្នាំ២០១៩ខាងមុខនេះផងដែរ។ ទាំងនេះគឺជាសកម្មភាពអាជីវកម្មថ្មីរបស់សហគ្រិនវ័យក្មេង៤រូប ក្នុងចំណោមសហគ្រិនជាច្រើនរូបទៀត ដែលសារព័ត៌មានថ្មីៗបានជួបសម្ភាស ពីគម្រោងអ្នកជំនួញវ័យក្មេងនៅកម្ពុជា៕