ជាតិ
សង្គមជាតិ
សម្តេចក្រុមព្រះ នរោត្តម រណឫទ្ធិ ចម្រើនព្រះជន្ម៧៥វស្សា
× សម្តេចក្រុមព្រះនរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច និងជាប្រធានឧត្តមក្រុមប្រឹក្សាព្រះមហាក្សត្រដែលមានឋានៈស្មើនាយករដ្ឋមន្ត្រី ចម្រើនព្រះជន្ម៧៥វស្សា នាថ្ងៃទី២ ខែមករា នេះ ស្របពេលដែលព្រះអង្គនៅគង់សម្រាកព្យាបាលនៅប្រទេសថៃនៅឡើយ។
ថ្ងៃទី២ ខែមករានេះ គឺជាថ្ងៃចម្រើនព្រះជន្មសម្តេចក្រុមព្រះ នរោត្តម រណឫទ្ធិ។ សម្តេច ប៊ុន រ៉ានី ហ៊ុន សែន ប្រធានសមាគមជាតិកាកបាទក្រហមកម្ពុជា បានផ្ញើលិខិតថ្វាយព្រះពរសម្តេចក្រុមព្រះ និង បួងសួងឲ្យព្រះអង្គ ឆាប់ជាសះស្បើយ ខណៈ ព្រះអង្គ កំពុងគង់នៅក្រៅប្រទេស ដើម្បីបន្តព្យាបាលព្រះកាយ។
សម្តេច ប៊ុន រ៉ានី បានសរសេរក្នុងលិខិតថ្វាយព្រះពរយ៉ាងដូច្នេះថា៖«ខ្ញុំម្ចាស់ សូមថ្លែងអភិវន្ទថ្វាយសម្តេចក្រុមព្រះ ដែលបានខិតខំយកអស់ព្រះកាយពល ព្រះបញ្ញាញាណនិងបទពិសោធ ប្រកបដោយឆន្ទៈ មនសិការស្នេហាជាតិ ព្រះរាជបល្ល័ង្កនិងប្រជារាស្ត្រ រួមចំណែកពង្រឹងនីតិរដ្ឋ លទ្ធិប្រជាធិបតេយ្យ រួមចំណែកស្តារនិងអភិវឌ្ឍជាតិមាតុភូមិ ឲ្យរីកចម្រើន ក្នុងសុខសន្តិភាព និងស្ថិរភាព ក្រោមម្លប់ព្រះមហាក្សត្រ»។
លោក ណុប សុធារិទ្ធ អ្នកនាំពាក្យគណបក្សហ្វ៊ុនស៊ិនប៉ិច ប្រាប់សារព័ត៌មាន ThmeyThmey តាមទូរសព្ទថា ដោយសារតែព្រះអង្គ មិនគង់នៅក្នុងប្រទេស សមាជិក-សមាជិកា ពុំបានរៀបចំពិធីសម្រាប់ថ្ងៃចម្រើនព្រះជន្មព្រះអង្គទេ។ លោក លើកឡើងថា សមាជិក-សមាជិក បានត្រឹមសរសេរលិខិតថ្វាយព្រះពរប៉ុណ្ណោះ។
អ្នកនាំពាក្យរូបនេះ អះអាងថា បច្ចុប្បន្ន ព្រះអង្គ បានធូរស្បើយពីជំងឺច្រើនហើយ។ លោក បញ្ជាក់យ៉ាងដូច្នេះថា៖«ឥឡូវ ព្រះអង្គ អាចយាងបានហើយ។ យើង សង្ឃឹមថា ព្រះអង្គ នឹងយាងមកមាតុភូមិវិញ នៅពេលខាងមុខ»។
យ៉ាងណាក៏ដោយ មន្ត្រីគណបក្សហ្វ៊ុនស៊ិនប៉ិចខាងលើ ពុំអាចបញ្ជាក់ឲ្យច្បាស់ពីពេលវេលានៃការការយាងរបស់ព្រះអង្គឡើយ ដោយលោក គ្រាន់តែនិយាយថា ការយាងចេញពីមន្ទីរពេទ្យ គឺអាស្រ័យលើគ្រូពេទ្យ ជាអ្នកសម្រេច។
សូមរម្លឹកថា ក្រោយជួបគ្រោះថ្នាក់ចរាចរណ៍ កាលពីអំឡុងខែមិថុនា ឆ្នាំ២០១៨ សម្តេចក្រុមព្រះ ត្រូវបានបញ្ជូនទៅព្យាបាលនៅប្រទេសថៃ។ គ្រោះថ្នាក់ចរាចរណ៍នេះ បានបណ្តាលឲ្យអ្នកម្នាងរបស់ព្រះអង្គ គឺអ្នកម្នាង អ៊ុក ផល្លា ទទួលមរណភាព៕
© រក្សាសិទ្ធិដោយ thmeythmey.com