ជាតិ
ប្រជានេសាទចាប់បានត្រីតូចៗ នៅក្នុងថ្ងៃខ្នើត ចាប់បានត្រីធំៗ នៅក្នុងថ្ងៃរនោច ប្រជានេសាទប្រើប្រាស់ឧបករណ៍មងទំហំក្រឡា ២សង់ទីម៉ែត្រ នៅតាមដងទន្លេសាប។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
× ភ្នំពេញ៖ លោក ហ៊ី សារុន និស្សិតនៃសាកលវិទ្យល័យភ្នំពេញ ផ្នែកអភិរក្សជីវចម្រុះ បានចុះធ្វើកម្មសិក្សា ដើម្បីបញ្ចប់ថា្នក់អនុបណ្ឌិតរបស់ខ្លួនមួយ នៅតាមដងទន្លេសាប។ កម្មសិក្សានេះ មានរយៈពេលបីខែ ចាប់ពីខែវិច្ឆិកា ឆ្នាំ២០១៨ ដល់ខែមករា ឆ្នាំ២០១៩ លើប្រធានបទ «ការវាយតម្លៃផលចាប់ធនធានជលផលទឹកសាប ដោយឧបករណ៍មង»។
លោក ហ៊ី សារុន (រូបខាងធ្វេង) និងលោក ថាច់ ផាណារ៉ា (រូបខាងស្តាំ) កំពុងត្រួតពិនិត្យប្រភេទ និងទម្ងន់ត្រី ដែលអ្នកនេសាទចាប់បានដោយឧបករណ៍មងនៅតាមដងទន្លេសាប។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
លោក ហ៊ី សារុន បានឲ្យដឹងថា «កម្មសិក្សានេះ អាចប្រព្រឹត្តទៅបាន ដោយមានការឧបត្ថម្ភផ្នែកថវិកា ដោយគម្រោងអច្ឆរិយភាពនៃទន្លេមេគង្គ (Wonders of the Mekong) និងបច្ចេកទេស ដោយវិទ្យាស្ថានស្រាវជ្រាវជលផលទឹកសាប នៃរដ្ឋបាលជលផល។ វត្ថុបំណងរបស់យើង គឺចង់ដឹងអំពីផលចាប់និងប្រភេទត្រីទឹកសាបនៅតាមដងទន្លេសាប ដែលចាប់បានដោយឧបករណ៍មង»។
ការសិក្សានេះ ត្រូវបានបែងចែកជាពីរយៈពេល ក្នុងមួយខែ គឺថ្ងៃខ្នើត និងថ្ងៃរនោច «ថ្ងៃមានពន្លឺព្រះចន្ទ និងគ្មានពន្លឺព្រះចន្ទ»។ ថ្ងៃខ្នើត គិតចាប់ពីថ្ងៃទី៦ ដល់១៤កើត ជាថ្ងៃមានពន្លឺព្រះចន្ទ ដែលប្រជានេសាទចាប់បានត្រីច្រើន។ ថ្ងៃរនោច ជាថ្ងៃពុំមានពន្លឺព្រះចន្ទ ពុំសូវមានត្រី មានរយៈពេលវែងជាងថ្ងៃខ្នើត។ លទ្ធផលបឋម យើងសង្កេតឃើញថា ក្នុងថ្ងៃខ្នើត ប្រជានេសាទប្រមាណ៩៩% នៃប្រជានេសាទសរុប បានប្រើប្រាស់ឧបករណ៍មង ដែលមានទំហំក្រឡា ២ ទៅ ៣.៥ សង់ទីម៉ែត្រ ប្រវែងពី ១០០ ទៅ ៣០០ម៉ែត្រ និងកម្ពស់ ១.៨ ទៅ ៥ម៉ែត្រ។
ក្នុងចំណោមទំហំក្រឡាមងទាំងអស់ ផលចាប់ត្រីដោយមងទំហំក្រឡា ២សង់ទីម៉ែត្រ បានច្រើនជាងគេ។ ជាធម្យម រយៈពេល ២ម៉ោង លើកមងម្តង ប្រជានេសាទអាចចាប់ត្រីបានពី ២០គីឡូក្រាម ទៅ៣៥គីឡូក្រាម។ ក្នុងមួយថ្ងៃ ពួកគាត់អាចលើកបានពី ៥ ទៅ ៧ដង។ ត្រីភាគច្រើន ដែលប្រជានេសាទចាប់បាន គឺប្រភេទត្រីស្លឹកឬស្សីធំ (Paralaubuca typus) និងត្រីរៀលអង្កាម (Henicorhynchus lobatus)។ ចំណែកក្នុងថ្ងៃរនោច អ្នកនេសាទភាគច្រើន ប្រើមងក្រឡាធំ ដែលមានទំហំចាប់ពី ៥-៨សង់ទីម៉ែត្រ ប្រវែងពី២៥-៥០ម៉ែត្រ និងជម្រៅពី៥-១០ម៉ែត្រ។
ពួកគាត់លើកច្រើនដងមិនកំណត់ ក្នុងមួយថ្ងៃ អាចចាប់បានត្រីពី ២-៥ គីឡូក្រាម ដែលជាប្រភេទត្រីធំ ដូចជា ត្រីពោ (Pangasius larnaudii) ត្រីច្រកែង (Puntioplites spp.) ត្រីឆ្ពិន (Barbonymus spp.) ត្រីឆ្កោក (Cyclocheilos enoplos) ត្រីក្អែក (Labeo chrysophekadion) ត្រីគ្រុំ (Osteochilus melanopleura)។ល។»
ទាំងនេះ គឺជាលទ្ធផលបណ្តោះអាសន្ន នៃការសិក្សាស្រាវជ្រាវ របស់លោក ហ៊ី សារុន ក្នុងរយៈពេលពីរខែក្នុងឆ្នាំ២០១៨ ប៉ុណ្ណោះ។ លោក នឹងបន្តធ្វើកម្មសិក្សានេះបន្តទៀត រហូតដល់ចុងរដូវត្រីត្រូវ ក្នុងខែមករា ឆ្នាំ ២០១៩។
© រក្សាសិទ្ធិដោយ thmeythmey.com