អន្តរជាតិ
អាមេរិក-កូឡុំប៊ី រិះរកវិធានការស្តារលទ្ធិប្រជាធិបតេយ្យឡើងវិញនៅវេណេស៊ុយអេឡា
ប្រធានាធិបតីកូឡុំប៊ី Ivan Duque ជួបជាមួយរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ (គណនី Twitter ផ្លូវការរបស់លោក ប៉ុមប៉េអូ)
×![]()
រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានជួបពិភាក្សាជាមួយប្រធានាធិបតីកូឡុំប៊ីដើម្បីស្វែងរកដំណោះស្រាយជួយស្តារលទ្ធិប្រជាធិបតេយ្យនៅក្នុងប្រទេសវេណេស៊ុយអេឡា។ ប៉ុន្តែគ្មានការបញ្ជាក់ច្បាស់ឡើយថា អាមេរិក និងកូឡុំប៊ីប្រើវីធីសាស្ត្រឬវិធានការបែបណាដើម្បីស្តារប្រជាធិបតេយ្យ និងបញ្ចប់វិបត្តិនៅរដ្ឋអាមេរិកឡាទីននេះឡើយ។
ជំនួបរវាងលោក ប៉ុមប៉េអូ ជាមួយប្រធានាធិបតីកូឡុំប៊ីលោក Ivan Duque កើតឡើងនៅថ្ងៃពុធទី ២ ខែមករា បន្ទាប់ពីប្រមុខការទូតអាមេរិករូបនេះត្រឡប់ពីចូលរួមក្នុងកម្មវិធីស្បថចូលកាន់តំណែងរបស់ប្រធានាធិបតីប្រេស៊ីល ជែរ បុលសូណារ៉ូ។
ក្នុងកិច្ចពិភាក្សាទ្វេភាគីនេះ លោក ប៊ុមប៉េអូ និងលោក Ivan Duque ជជែកគ្នារកដំណោះស្រាយលើបញ្ហាវិបត្តិជនភៀសខ្លួនពីវេណេស៊ុយអេឡា រិះរកវិធានការធ្វើយ៉ាងណាស្តារឡើងវិញនូវលទ្ធិប្រជាធិបតេយ្យ ហើយអ្នកទាំងពីរក៏ច្រានចោលប្រព័ន្ធដឹកនាំផ្តាច់ការនៅវេណេស៊ុយអេឡាថែមទៀត។
បើតាមទីភ្នាក់ងារព័ត៌មាន AFP ប្រមុខការបរទេសអាមេរិកលោក ប៉ុមប៉េអូ បានថ្លែងពីទីក្រុង Cartagena ដូច្នេះ៖«កិច្ចសន្ទនារបស់យើងថ្ងៃនេះគឺផ្តោតសំខាន់លើរបៀបដែលយើងអាចសហការគ្នាបានជាមួយដៃគូក្នុងក្របខណ្ឌតំបន់ និងអន្តរជាតិដើម្បីជួយអ្នកដែលរត់ភៀសខ្លួន និងជួយវេណេស៊ុយអេឡាស្តារមរតកប្រជាធិបតេយ្យឡើងវិញដែរ។
រដ្ឋមន្ត្រីការបរទេសអាមេរិក និយាយឥតលាក់លៀមថា ក្រៅពីជាអ្នកជិតខាងវេណេស៊ុយអេឡា កូឡុំប៊ីជាមេដឹកនាំក្នុងតំបន់ដែលអាចដឹកនាំកិច្ចសហប្រតិបត្តិការគាំទ្រប្រជាធិបតេយ្យ និងនីតិរដ្ឋផងដែរ។
តាមពិតទៅ ក្រោយជំនួបពិភាក្សាទ្វេភាគីនេះ មិនមានការប្រកាសឲ្យដឹងពីចំណាត់ការដែលអាចប្រើប្រាស់ដើម្បីស្តារលទ្ធិប្រជាធិបតេយ្យនៅវេណេស៊ុយអេឡាឡើយ។ ប៉ុន្តែប្រមុខរដ្ឋកូឡុំប៊ីលោក Duque ដែលទើបជំនួសតំណែងអតីតប្រធានាធិបតី Juan Manuel Santos កាលពីខែសីហានោះ បានបញ្ជាក់ច្បាស់ថា គេគួរបដិសេធភាពស្របច្បាប់នៃរបបដឹកនាំវេណេស៊ុយអេឡា និងធ្វើគ្រប់យ៉ាងតាមដែលអាចធ្វើបានដើម្បីស្តារលទ្ធិប្រជាធិបតេយ្យ និងសណ្តាប់ធ្នាប់។
កាលនៅប្រេស៊ីល លោក ប៉ុមប៉េអូ បានឯកភាពគ្នាជាមួយមេដឹកនាំប៉េរូ និង ប្រេស៊ីលថានឹងបន្តដាក់សម្ពាធលើរបបដឹកនាំវេណេស៊ុយអេឡាដែរ ដើម្បីធានាថា ការផ្លាស់ប្តូរអាចនឹងកើតមានឡើងឆាប់។ រដ្ឋ បាលលោក ដូណាល់ ត្រាំ បានបន្តបង្កើនសម្ពាធតាមរយៈការបន្ថែមទណ្ឌកម្មជាបន្តបន្ទាប់ប្រឆាំង
លោក នីកូឡា ម៉ាឌុយរ៉ូ និងបក្សពួកដែរ ហើយមិនត្រឹមតែប៉ុណ្ណោះលោក ត្រាំ ធ្លាប់គំរាមប្រើប្រាស់អន្តរាគមន៍យោធាថែមទៀតបើចាំបាច់។
លោក ម៉ាឌុយរ៉ូ ដែលដឹកនាំវេណេស៊ុយអេឡាបន្តពីលោក ហ៊ូហ្គោ ឆាវេសឆ្នាំ ២០១៣ នឹងបន្តអាណត្តិទីពីរជាប្រធានាធិបតីចាប់ពីថ្ងៃ ១០ខែមករា ថ្វីបើលទ្ធផលបោះឆ្នោតកាលពីឆ្នាំមុនមិនត្រូវបានអាមេរិក សហភាពអឺរ៉ុប រួមជាមួយអង្គការរដ្ឋអាមេរិក (OAS) ទទួលស្គាល់ឡើយ។
បុរសខ្លាំងវេណេស៊ុយអេឡាខាងលើ កន្លងមកក៏បានទិតៀនកូឡុំប៊ី និងប្រេស៊ីចំៗថា ចូលដៃចូលជើងជាមួយអាមេរិកដើម្បីត្រៀមផ្តួលរំលំរបបដឹកនាំខ្លួនដែរ ប៉ុន្តែប្រទេសជិតខាងទាំងពីរនេះបានទាត់ចោលការចោទប្រកាន់ជារឿយ។
ដោយឡែក លោក ប៉ុមប៉េអូ ក៏បានអរគុណ និងកោតសរសេរដល់កូឡុំប៊ីដែលបានរួមចំណែកយ៉ាងសកម្មក្នុងការដោះស្រាយបញ្ហាជនភៀសខ្លួនពីវេណេស៊ុយអេឡាដែលឆ្លងដែនចូលមករស់នៅក្នុងទឹកដីកូឡុំប៊ីមួយលាននាក់រួចទៅហើយនោះ។ ទន្ទឹមនឹងនោះ លោកបានរៀបរាប់ពីការប្រឹងប្រែងរបស់អាមេរិកក្នុងការជួយគាំទ្រជាហិរញ្ញវត្ថុចំពោះចំណាត់ការដោះស្រាយវិបត្តិមនុស្សធម៌នៅវេណេស៊ុយអេឡាតាមរយៈកូឡុំប៊ីដែរ។ តាមសម្តីលោក ប៉ុមប៉េអូ អាមេរិកជួយលុយជិត ៩២ លានដល់កូឡុំប៊ីដើម្បីដោះស្រាយបញ្ហានេះ។
មកដល់បច្ចុប្បន្ន ប្រជាជនវេណេស៊ុយអេឡាយ៉ាងហោចណាស់ ២,៣លាននាក់បានរត់ចាកចោលស្រុក និងទៅជ្រកកោននៅប្រទេសជិតខាង ដោយសារភាពក្រីក្រ វិបត្តិសេដ្ឋកិច្ច និងសង្គមដែលបានផ្ទុះឡើងចាប់ពីឆ្នាំ ២០១៤មកនោះ។ ប្រជាជនខ្វះខាតសព្វគ្រប់ទាំងស្បៀងអាហារ ថ្នាំសង្កូវ រួមទាំងសេវាសាធារណៈដូចជាទឹក ភ្លើង និងការដឹកជញ្ជូនផង។
Tag:
កូឡុំប៊ី
អាមេរិក
វេណេស៊ុយអេឡា
© រក្សាសិទ្ធិដោយ thmeythmey.com
