ជាតិ
សង្គមជាតិ
សត្វក្រៀល១០២ក្បាល ត្រូវបានរកឃើញនៅក្នុងតំបន់ការពារខេត្តតាកែវ និងកំពត រូបពីអង្គការ BirdLife Cambodia
× សត្វក្រៀលចំនួន១០២ក្បាល ត្រូវបានគេធ្វើជំរឿនឃើញនៅតំបន់ការពារបឹងព្រែកល្ពៅ ខេត្តតាកែវ និងអន្លង់ព្រីង ខេត្តកំពត។ ដើម្បីអភិរក្សសត្វក្រៀលដែលជិតផុតពូជនៅកម្ពុជា អង្គការ BirdLife Cambodia នឹងបន្តអនុវត្តកិច្ចការធ្វើជំរឿនរកសត្វក្រៀលនេះ រហូតដល់ខែឧសភា ឆ្នាំ២០១៩។ គេប៉ាន់ស្មានថា សត្វក្រៀលនេះ អាចនឹងមានចំនួនកើនឡើងជាងឆ្នាំ២០១៧។
លោក ប៊ូ វរសក្ស នាយកកម្មវិធីនៃអង្គការសត្វស្លាបអន្តរជាតិប្រចាំកម្ពុជា(BirdLife Cambodia) បាននិយាយថា លទ្ធផលពីការធ្វើជំរឿនឃើញសត្វក្រៀលចំនួន១០២ក្បាល គឺជាភាពជោគជ័យដ៏ធំមួយនៃការពារសត្វក្រៀល។ លោក បានបន្ថែមថា ការអនុវត្តកិច្ចការងារជំរឿននេះ ត្រូវបានធ្វើជារៀងរាល់ឆ្នាំ ដើម្បីឲ្យដឹងពីចំនួនការកើនឡើង និងការធ្លាក់ចុះនៃចំនួនសត្វក្រៀល។
រូបពីអង្គការ BirdLife Cambodia
«ជារួមយើងបានរកឃើញសត្វក្រៀលចំនួន១០២ក្បាល ដែលវាហោះហើរពីខេត្តព្រះវិហារ មកធ្វើជម្រកដើម្បីបន្តពូជ នៅខេត្តតាកែវ និងកំពត។ នេះយើងគ្រាន់តែធ្វើជំរឿនឃើញតែនៅខេត្តពីរនេះប៉ុណ្ណោះ យើងសង្ឃឹមថា នឹងមានសត្វក្រៀលនៅតំបន់ផ្សេងៗទៀតផងដែរ»។ នេះជាការបញ្ជាក់របស់លោក ប៊ូ វរសក្ស ដែលបានប្រាប់ដល់អ្នកសារព័ត៌មានThmey Thmey តាមរយៈទូរសព្ទ ដែលបានបន្ថែមថា ការកើនឡើងចំនួនសត្វក្រៀល វាជាក្តីសង្ឃឹមនៃការអភិរក្សប្រភេទសត្វដ៌កម្រមួយនេះ។
បើតាមនាយកអង្គការ BirdLife Cambodia សត្វក្រៀលគឺជាសត្វដែលងាយនឹងផុតពូជបំផុត ដោយសារតែបាត់បង់ទីជម្រក និងការបរបាញ់សត្វក្រៀលខុសច្បាប់។ លោក ប៊ូ វរសក្ស បានបញ្ជាក់ដូច្នេះថា៖«យើងមានគម្រោងវែងឆ្ងាយ ដើម្បីបន្តការអភិរក្សសត្វក្រៀល រាល់ទីតាំងដែលមានវត្តមានសត្វក្រៀលរស់នៅទាំងអស់ យើងបានធ្វើការសហការគ្នាជាមួយក្រសួងបរិស្ថាន ដើម្បីដាក់តំបន់ទាំងនោះជាតំបន់ការពារ ដោយដាក់អ្នកល្បាតជាប្រចាំ ក្នុងការទប់ស្កាត់សកម្មភាពបរបាញ់ប្រភេទសត្វស្លាបនេះ។ ជាមួយគ្នាផងដែរ យើងក៏បានបង្កើតជាសេវាកម្មអេកូទេសចរណ៍នៅតំបន់អន្លង់ព្រីង ខេត្តកំពត សម្រាប់ឲ្យភ្ញៀវទេសចរមកទស្សនាសត្វក្រៀលផងដែរ»។
រូបពីអង្គការ BirdLife Cambodia
នាយកអង្គការ BirdLife Cambodia រូបនេះបន្តថា ការធ្វើជំរឿនរយៈពេល៥ឆ្នាំកន្លងទៅ បានបង្ហាញថា ចំនួនសត្វក្រៀលនៅកម្ពុជាកំពុងតែមានការកើនឡើង ចំណែកសត្វក្រៀលនៅប្រទេសថៃបានបាត់ផុតពូជអស់ទៅហើយ។ ចំនួនសត្វក្រៀលដែលរស់នៅច្រើនជាងគេ គឺមានតែនៅក្នុង ប្រទេសអូស្រា្តលី ឥណ្ឌា ភូមា វៀតណាម និងកម្ពុជា តែប៉ុណ្ណោះ។ ដោយឡែកកម្ពុជាមានចំនួនសត្វក្រៀលប្រមាណ៩០០ក្បាល ដែលគេចាត់ទុកថាកម្ពុជា មានការកើនឡើងចំនួនសត្វស្លាបប្រភេទនេះ។
ក្រៀល គឺជាសត្វស្លាបដែលមានកម្ពស់ខ្ពស់ជាងគេបង្អស់ រហូតដល់១,៦៥ម៉ែត្រ ហើយអាចហោះហើរបានខ្ពស់ជាងគេផងដែរ។ វាស្ថិតនៅក្នុងបញ្ជីក្រហមរបស់អង្គការ ICUN ជាប្រភេទសត្វដែលងាយនឹងរងគ្រោះ ដោយសារសកម្មភាពបរបាញ់ និងការបាត់បង់ជម្រកដីសើម។ តំបន់ការពារបឹងព្រែកល្ពៅ និងអន្លង់ព្រីង គឺជាជម្រកដ៏សំខាន់សម្រាប់ហ្វូងសត្វក្រៀលធ្វើសំបុក និងពងកូន៕
© រក្សាសិទ្ធិដោយ thmeythmey.com