ព្រឹត្តិការណ៍«ថ្មើរជើងប្រវត្តិសាស្ត្រ» ជាឱកាសសិក្សាឲ្យស៊ីជម្រៅពីរបបខ្មែរក្រហម

កីឡាជាតិ

ជាតិ

ព្រឹត្តិការណ៍«ថ្មើរជើងប្រវត្តិសាស្ត្រ» ជាឱកាសសិក្សាឲ្យស៊ីជម្រៅពីរបបខ្មែរក្រហម

03, Jan 2019 , 10:39 pm

រូបភាព

ដោយ:

គិតត្រឹមថ្ងៃទី៣ ខែមករា ឆ្នាំ២០១៩ មានមនុស្សជាង១ពាន់នាក់ហើយ បានចុះឈ្មោះចូលរួមរត់ និងដើរក្នុងព្រឹត្តិការណ៍«ថ្មើរជើងប្រវត្តិសាស្ត្រ»ទៅកាន់តំបន់តស៊ូចុងក្រោយនៃរបបប្រជាធិបតេយ្យ ឬរបបខ្មែរក្រហមនៅស្រុកអន្លង់វែងខេត្តឧត្តរមានជ័យ។ ក្រៅពីទាក់ទាញភ្ញៀវទេសចរឲ្យទៅទស្សនាតំបន់ទេសចរណ៍ទីនោះ ការអប់រំ និងបញ្ជ្រាបការយល់ដឹងពីប្រវត្តិសាស្ត្រនៃរបបនេះដល់ពលរដ្ឋ និងយុវជន ក៏ស្ថិតក្នុងគោលបំណងនៃព្រឹត្តិការណ៍នេះដែរ។

អត្ថបទទាក់ទង

អន្លង់វែង តំបន់ទេសចរណ៍បង្កប់រឿងរ៉ាវប្រវត្តិសាស្ដ្រខ្មែរក្រហម និងទីសម្រាប់ផ្សះផ្សាសង្គមនៅកម្ពុជា

អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានបញ្ជាក់ថា មកទល់ពេលនេះមានភ្ញៀវទេសចរជាតិ និងអន្តរជាតិពិសេសថៃ ជាង១ពាន់នាក់ហើយ បានចុះឈ្មោះចូលរួមព្រឹត្តិការណ៍កីឡា«ថ្មើរប្រវត្តិសាស្ត្រ» ទៅកាន់តំបន់តស៊ូចុងក្រោយនៃរបបខ្មែរក្រហម។ នេះជាឱកាសដ៏សំខាន់សម្រាប់សាធារណជនក្នុងការសិក្សាឲ្យបានស៊ីជម្រៅពីអតីតកាលនៃរបបនេះ ព្រោះអន្លង់វែងជាតំបន់ប្រវត្តិសាស្ត្រនៃការបញ្ចប់សង្គ្រាមស៊ីវិលនៅកម្ពុជា។

«យើងសហការជាមួយមជ្ឈមណ្ឌលឯកសារកម្ពុជា ដែលស្រាវជ្រាវពីប្រវត្តិរបបខ្មែរក្រហម គាត់នឹងនៅចាំទីនោះ ហើយគាត់នឹងផ្សព្វផ្សាយ អប់រំដល់ភ្ញៀវទេសចរជាតិនិងអន្តរជាតិ ជាមួយមន្ទីរទេសចរណ៍ខេត្តឧត្តរមានជ័យ ដែលកាន់កាប់នៅទីនោះ។ យើងនឹងប្រាប់ពីការបញ្ចប់សង្គ្រាមចុងក្រោយរបស់ខ្មែរក្រហម ការបែកបាក់ និងបញ្ចប់អង្គការចាត់តាំងរបស់ខ្មែរក្រហម និងមូលហេតុនៃបញ្ហាជាដើម»។ នេះជាការលើកឡើងរបស់លោក វ៉ាត់ ចំរើន។

ក្រៅពីអបអរខួប២០ឆ្នាំនៃសន្តិភាពក្រោយបញ្ចប់សង្គ្រាមស៊ីវិលនៅកម្ពុជាឆ្នាំ១៩៩៨ ព្រឹត្តិការណ៍«ថ្មើរជើងប្រវត្តិសាស្ត្រ» ក៏ដើម្បីទាក់ភ្ញៀវទេសចរជាតិនិងអន្តរជាតិឲ្យទស្សនាតំបន់ទេសចរណ៍ប្រវត្តិសាស្ត្រខេត្តឧត្តរមានជ័យ អប់រំ និងបញ្ជ្រាបការយល់ដឹងពីអនុស្សាវរីយ៍ដ៏ជូរចត់នៃរបបខ្មែរក្រហម និងបង្កើតភាពអ៊ូអរដល់តំបន់ព្រំដែនកម្ពុជា-ថៃ ដ៏ស្ងប់ស្ងាត់នេះផងដែរ។

ម្យ៉ាងវិញទៀត គឺដើម្បីផ្សព្វផ្សាយនិងបំផុសចលនាកីឡាឲ្យមហាជន ប្រជាពលរដ្ឋ និងយុវជននៅខេត្តនោះឲ្យងាកមកលេងកីឡា ដើម្បីបង្កើនសុខភាព មិត្តភាព និងសាមគ្គីភាព។ អ្វីកាន់តែពិសេសនោះ គឺការផ្តល់ទំនុកចិត្តផ្នែកសន្តិភាព និងបន្សាបភាពភ័យខ្លាចនៃរបបខ្មែរដល់ប្រជាពលរដ្ឋ ដែលមានចិត្តដិបដាមជាមួយរបបនេះ។ បើតាមលោក វ៉ាត់ ចំរើន បច្ចុប្បន្នមានអតីតកម្មាភិបាលនៃរបបខ្មែរមួយចំនួនកំពុងរស់នៅតំបន់អន្លង់វែង។

ព្រឹត្តិការណ៍នេះរៀបចំនៅថ្ងៃទី៥ ខែមករា ឆ្នាំ២០១៩ លើជួរភ្នំដងរ៉ែក ក្នុងស្រុងអន្លង់វែង ខេត្តឧត្តរមានជ័យ។ ព្រឹត្តិការណ៍ដែលបង្កើតឡើងដោយក្រសួងទេសចរណ៍ សហការជាមួយគណៈកម្មាធិការជាតិអូឡាំពិកកម្ពុជា និងរដ្ឋបាលខេត្តឧត្តរមានជ័យនេះ ចែកចេញជាពីរផ្នែក គឺរត់ចម្ងាយ៣គីឡូម៉ែត្រ និងដើរ៥គីឡូម៉ែត្រលើភ្នំដងរ៉ែក។ ការរត់៣គីឡូម៉ែត្រ គឺចេញដំណើរពីរមណីយដ្ឋានផ្ទះតាម៉ុកទៅកាន់រង្វង់មូលអន្លង់វែងរួចត្រឡប់មកបញ្ចប់នៅកន្លែងចេញដំណើរវិញ។ ចំណែកដើរ៥គីឡូម៉ែត្រចេញដំណើរពីច្រកអន្តរជាតិជាំឆ្ពោះទៅកាន់តំបន់ប៉ូយតាម៉ុក និងបញ្ចប់នៅតំបន់ប្រវត្តិសាស្ត្រចុងក្រោយនៃរបបខ្មែរក្រហម៕