ជាតិ
សង្គមជាតិ
សង្ឃក្លែងក្លាយ២អង្គ ត្រូវបានសមត្ថកិច្ចបញ្ជូនទៅតុលាការខេត្តសៀមរាប
× អាជ្ញាធរ បានឃាត់ខ្លួនសង្ឃក្លែងក្លាយ ២អង្គ កំពុងដើរបិណ្ឌបាត្រនៅក្នុងផ្សារក្រឡាញ់ សង្កាត់គោកចក តាមការស្នើរបស់ព្រះអនុគុណក្រុងសៀមរាប កាលពីថ្ងៃទី៤ ខែមករា នេះ។ សមត្ថកិច្ចកសាងសំណុំរឿងបញ្ជូនព្រះសង្ឃក្លែងក្លាយទាំងពីរនេះទៅតុលាការ ដើម្បីផ្តន្ទាទោសតាមច្បាប់។ នេះបើតាមគេហទំព័រអគ្គស្នងការដ្ឋាននគរបាលជាតិ ថ្ងៃទី៥ មករា ឆ្នាំ២០១៩។
នគរបាលជាតិដែលបានស្រង់សម្ដី លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌ នៃស្នងការដ្ឋានខេត្តសៀមរាបបានឲ្យដឹងថា ជនសង្ស័យទាំងពីរ ម្នាក់អាយុ២៨ មកពីខេត្តកំពង់ចាម និងម្នាក់ទៀតអាយុ ៣២ឆ្នាំ មកពីខេត្តតាកែវ។ បច្ចុប្បន្ន ជនសង្ស័យទាំងពីរ រស់នៅភូមិខ្វាវ ឃុំត្បែង ស្រុកបន្ទាយស្រី ខេត្តសៀមរាប។
បើតាមលោក ភឹង ចិន្តារ៉េត ជនសង្ស័យខាងលើបានសារភាពថា ខ្លួនពិតជាបានកោសក់ក្បាលខ្លួនឯង និងទិញស្បង់ចីវពរពណ៌ក្រហមរបស់ព្រះសង្ឃមកគ្រង ដោយមិនមានការបំបួសត្រឹមត្រូវ និងដើរបិណ្ឌបាតប្រាកដមែន។
ក្រោយបានចម្លើយសារភាពពីសង្ឃក្លែងក្លាយទាំងពីរ ព្រះអនុគុណក្រុងសៀមរាប បានធ្វើពិធីផ្សឹកនិងបញ្ជូនមកឱ្យសមត្ថកិច្ចផ្តន្ទាទោសទៅតាមច្បាប់។ បន្ទាប់មកសមត្ថកិច្ចបានធ្វើតេស្តរកសារធាតុញៀនខុសច្បាប់លើជនសង្ស័យខាងលើ អវិជ្ជ មានទាំងពីរ ។ នេះបើតាមនគរបាលជាតិ ដែលបានបន្ថែមថា អាជ្ញាធរមានសមត្ថកិច្ចក្រុងសៀមរាបកំពុងរៀបចំសំណុំរឿង ដើម្បីបញ្ជូនជនសង្ស័យទាំងពីរទៅតុលាការផ្តន្ទាទោសតាមច្បាប់៕
© រក្សាសិទ្ធិដោយ thmeythmey.com