ជាតិ
សេដ្ឋកិច្ច
មន្ទីរទេសចរណ៍ខេត្តស្ទឹងត្រែង បង្កើតកសិ-ទេសចរណ៍ ដើម្បីទាក់ទាញភ្ញៀវ រូបពីហ្វេសប៊ុកក្រសួងព័ត៌មាន
× ភ្នំពេញ៖ មន្ទីរទេសចរណ៍ខេត្តស្ទឹងត្រែង បានបង្កើតកសិ-ទេសចរណ៍ថ្មីមួយ នៅតំបន់ខេ ដែលស្ថិតនៅសង្កាត់សាមគ្គី ក្រុងស្ទឹងត្រែង។ កសិ-ទេសចរណ៍ថ្មីនេះ មានរៀបចំកម្មវិធី(ដុតពោត)ជូនភ្ញៀវ ដើម្បីទាក់ទាញភ្ញៀវទេសចរមកលេងកាន់តែច្រើន។ នេះបើតាមគេហទំព័រក្រសួងព័ត៌មាន។
កសិ-ទេសចរណ៍ ជាការផ្សារភ្ជាប់កសិកម្មទៅនឹងទេសចរណ៍ តាមរយៈការដាំដំណាំ ដើម្បីទាក់ទាញភ្ញៀវទេសចរឲ្យទៅលេងកម្សាន្ត។ មន្ទីរទេសចរណ៍ខេត្តស្ទឹងត្រែង បានបង្កើតកសិ-ទេសចរណ៍ថ្មី ដែលមានរៀបចំកម្មវិធី(ដុតពោត) ដើម្បីទាក់ទាញភ្ញៀវទេសចរ។
លោក អ៊ន ប៉ោ សឿន ប្រធានមន្ទីរទេសចរណ៍ខេត្តស្ទឹងត្រែង បានបញ្ជាក់ថា៖ «ខ្សែសង្វាក់នេះ ប្រជាសហគមន៍ត្រូវតែរួមគ្នាធ្វើឲ្យបានជាប្រចាំ ដើម្បីបង្ហាញពីកសិ-ទេសចរណ៍ថ្មីមួយទៀត ស្របទៅតាមគោលនយោបាយរបស់ក្រសួងទេសចរណ៍។ ហើយនេះជាការល្អសម្រាប់ការទាក់ទាញ និងទទួលបានផលទាំងអស់គ្នា ដោយផ្ទាល់និងប្រយោល តាមរយៈការលក់ផលិតផលភូមិមួយផលិតផលមួយ»។ នេះបើតាមការស្រង់សម្ដីរបស់គេហទំព័រក្រសួងព័ត៌មាន។
ចំណែកឯលោក ឈីវ សុគន្ធថាល កសិករដាំពោត នៅភូមិខាំផាន់ចំណុចខេ បានចាប់អារម្មណ៍នឹងការផ្តួចផ្តើមឲ្យមានកសិ-ទេសចរណ៍នេះឡើង ព្រោះងាយស្រួលរកប្រាក់ចំណូល។ បើតាមលោក អន ជួន មេភូមិខាំផាន់ ចំណុចខេ ប្រជាកសិករ មានការទទួលខុសត្រូវខ្ពស់ចំពោះការដាំដុះដំណាំកសិកម្មនេះ ដោយបានចងក្រងជាសហគមន៍ ដែលមានសមាជិកចំនួន៣៥គ្រួសារ។ លោកមេភូមិ អន ជួន បន្តថា ដំណាំពោតនេះ ត្រូវបានកសិករដាំលើផ្ទៃដីប្រមាណ៣០ហិកតា ដោយទទួលបានផលជាប្រចាំ៕
Tag:
កសិកម្ម
ទេសចរណ៍
ស្ទឹងត្រែង
© រក្សាសិទ្ធិដោយ thmeythmey.com