វិទ្យាសាស្រ្ត និង បច្ចេកវិទ្យា
អន្តរជាតិ
ភ្នំភ្លើងឥណ្ឌូណេស៊ី Ana Krakatoa បាត់កម្ពស់ពីរភាគបីក្រោយបង្កើតរលកយក្សស៊ូណាមិ
× ភ្នំភ្លើងដែលបានបង្កឲ្យមានគ្រោះមហន្តរាយធម្មជាតិស៊ូណាមិកាលពីប៉ុន្មានថ្ងៃមុននេះនៅប្រទេសឥណ្ឌូណេស៊ីមានកម្ពសទាបជាងមុនពីរភាគបីដោយសារការជះធូលី កំអែភ្នំភ្លើង និងដីមកខាងក្រៅវិញ។ ហេតុការណ៍មួយនេះបានធ្វើឲ្យប្រជាជនដែលរស់នៅក្នុងតំបន់បាត់បង់ជីវិតជាង៤០០នាក់ និងខាតបង់ហេដ្ឋារចនាសម្ព័ន្ធជាច្រើនទៀត។
ភ្នំភ្លើង Anak Krakatoa ដែលជាភ្នំភ្លើងសកម្មមួយក្នុងចំណោមភ្នំភ្លើងសកម្មផ្សេងៗទៀតក្នុងប្រទេសឥណ្ឌូណេស៊ីបាន បាត់បង់កម្ពស់របស់ខ្លួនពី ៣៣៨ម៉ែត្រមកត្រឹមតែ១១០ម៉ែត្រប៉ុណ្ណោះក្រោយពេលផ្ទុះនៅខែមុន។ នេះបើតាមអ្នកក្រុមអ្នកស្រាវជ្រាវខាងភ្នំភ្លើងវិទ្យាឥណ្ឌូណេស៊ីដកស្រង់ដោយទូរទស្សន៍សិង្ហបុរី Channel News Asia ។
តាមយោបល់របស់អ្នកជំនាញ ធូលីដី និងឧស្ម័នប្រមាណជាង ១៥០ លានម៉ែត្រគូបបានហូរចូលទៅក្នុងសមុទ្រ ឬភាយទៅក្នុងបរិយាកាសតាមចរន្តខ្យល់។ លោក Wawan Irawan ដែលជាអ្នកស្រាវជ្រាវភ្នំភ្លើងបានថ្លែងថា៖«កាលពីមុន កំពូលភ្នំភ្លើងនេះត្រូវបានមនុស្សមើលឃើញពីចម្ងាយយ៉ាងងាយស្រួល ប៉ុន្តែឥឡូវនេះយើងមិនអាចមើលឃើញកំពូលវាពីកន្លែងដដែលនោះទេ»។
តាមទិន្នន័យពីផ្កាយរណបរបស់ទីភ្នាក់ងារអវកាសជប៉ុនបានឲ្យដឹងថា បរិមាណសារធាតុដែលបំភាយពីភ្នំភ្លើងនោះបានចាក់ចូលទៅក្នុងសមុទ្រក្នុងចំងាយជាងពីរគីឡូម៉ែត្រ។ «Anak Krakatoa» មានន័យជាភាសាខ្មែរថា «កូនរបស់ Krakatoa»។ ភ្នំនេះត្រូវបានគេដាក់ឈ្មោះដូចច្នេះ គឺដោយសារវាបានកើតពីភ្នំភ្លើងធំមួយទៀតមានឈ្នោះថា «Krakatoa»។ Krakatoa ជាភ្នំភ្លើងដែលបានផ្ទុះនៅក្នុងឆ្នាំ១៨៨៣និងបានឆក់យកជីវិតប្រជាជនប្រមាណជា៣៦០០០នាក់៕
Tag:
Anak Krakatoa
ឥណ្ឌូណេស៊ី
© រក្សាសិទ្ធិដោយ thmeythmey.com