ភ្នំពេញ៖ ជំងឺបាក់ទឹកចិត្តងាយនឹងកើតមានលើមនុស្សស្ទើរគ្រប់វ័យរាប់តាំងពីកុមារ។ ជំងឺនេះកើតឡើងទៅលើមនុស្ស ដែលមានបញ្ហាផ្នែកសង្គមសាស្ត្រ ចិត្តសាស្ត្រ និងជីវសាស្ត្រ។ ជំងឺបាក់ទឹកចិត្តអាចសម្លាប់មនុស្សដោយមិនដឹងខ្លួន ប្រសិនបើគេមិនបានដឹងពីដើមហេតុនៃជំងឺ និងព្យាបាលបានទាន់ពេល។ វិធីបង្ការជំងឺបាក់ទឹកចិត្តដែលមានប្រសិទ្ធភាពល្អបំផុតនោះគឺ ម្ដាយឪពុកត្រូវតែអប់រំកូនឱ្យបានល្អតាំងតែពីតូច ពង្រឹងចិត្តសាស្ត្រពួកគេឱ្យបានរឹងប៉ឹង និងចេះដោះស្រាយបញ្ហាពីក្មេង។
លោកវេជ្ជបណ្ឌិត យឹម សុបុត្រា នាយកផ្នែកជំងឺផ្លូវចិត្ត និងការបំពានគ្រឿងញៀននៃមន្ទីរពេទ្យមិត្តភាពខ្មែរសូវៀត ឯកទេសវិកលវិទ្យា បានបញ្ជាក់ថា បច្ចុប្បន្នមនុស្សកាន់តែច្រើនមានជំងឺបាក់ទឹកចិត្តដោយមិនដឹងខ្លួន។ លោកថាមនុស្សដែលមានជំងឺផ្លូវកាយមួយចំនួន បណ្ដាលមកពីជំងឺបាក់ទឹកចិត្ត។ ទោះជាយ៉ាងណា ពេលខ្លះជំងឺផ្លូវកាយបណ្ដាលឱ្យមានជំងឺបាក់ទឹកចិត្ត ហើយជួនកាលជំងឺបាក់ទឹកចិត្ត ក៏បណ្ដាលឱ្យកើតជំងឺផ្លូវកាយដែរ។ អ្នកជំងឺទាំងនោះពេលទៅព្យាបាលនៅមន្ទីរពេទ្យចេះតែមិនជា ក៏ព្រោះតែមិនដឹងពីប្រភពដើមរបស់ជំងឺ។
លោកបានបញ្ជាក់យ៉ាងដូច្នេះ ៖« ដើមចមដែលបណ្ដាលឱ្យមានជំងឺបាក់ទឹកចិត្ត បង្ហាញដំបូងលើរាងកាយ ដូចជាការចុះទម្ងន់ ទទួលទានមិនបាន នាំឱ្យប្រដាប់រំលាយអាហាររលាក ប្រព័ន្ធការពារចុះខ្សោយ ឬដំបៅក្រពះជាដើម។ អ្នកដែលមានអាការបែបនេះ ពេលទៅព្យាបាលនៅមន្ទីរពេទ្យចេះតែមិនជា ក៏ព្រោះតែបញ្ហាដើមរបស់វា គឺមកពីជំងឺបាក់ទឹកចិត្ត»។
លោក យឹម សុបុត្រា ថាមនុស្សជួបបញ្ហាសង្គមសាស្ត្រ ចិត្តសាស្ត្រ និងជីវសាស្ត្រ ដូចជាវិបត្តិតិចតូចជាមួយគ្រួសារ ការបាក់បែកស្នេហា ខាតមុខជំនួញ ការងារបរាជ័យ សង្គ្រាម ការបាត់បង់សមាជិតគ្រួសារ ឬមនុស្សជាទីស្រឡាញ់ ការមានជំងឺប្រចាំកាយ ដំណងពូជពីម្ដាយឪពុកដែលបាក់ទឹកចិត្តតដល់កូន ជាដើម ជាកត្តានាំឱ្យមានជំងឺបាក់ទឹកចិត្ត។
ក្រោយពីមានជំងឺបាក់ទឹកចិត្ត មនុស្សនោះគេងតិចជាង៦ម៉ោង ឬច្រើនជាង៨ម៉ោង ដែលឧស្សាភ្ញាក់ ស្ត្រីរដូវមិនទៀង បុរសទាក់ទងនិងតម្រងនោម ការមិនមានទំនាក់ទំនងជាមួយអ្នកដទៃ ចូលចិត្តនៅតែម្នាក់ឯង ការប្រើប្រាស់គ្រឿងញៀន និងគ្រឿងស្រវឹង អ្នកខ្លះចង់សម្លាប់ខ្លួនផង។
លោកថាដើម្បីព្យាបាលជំងឺបាក់ទឹកចិត្ត អ្នកដែលមានបញ្ហាត្រូវតែចេះដោះស្រាយមុនបញ្ហាកាន់តែធ្ងន់ ឬរកជំនួយពីបុគ្គលផ្សេងឱ្យជួយដោះស្រាយ។ ពេលដែលមានបញ្ហាមិនត្រូវប្រើប្រាស់គ្រឿងញៀន ឬគ្រឿងស្រវឹងឡើយ។ ពួកគេត្រូវតែសម្រាកកាយចិត្តឱ្យបានល្អ ដោយមានពេលធ្វើការនិងកម្សាន្តឱ្យបានត្រឹមត្រូវ។ ត្រូវធ្វើសមាធិ និងធ្វើលំហាត់ប្រាណឱ្យបានទៀងទាត់។ ត្រូវចេះគ្រប់គ្រងបញ្ហាសង្គមឱ្យបានល្អ។ ត្រូវចេះផ្លាស់ប្ដូរស្ថានភាពរស់នៅឱ្យបានសមស្រប រួមទាំងរបបអាហារឱ្យបានត្រឹមត្រូវ មានត្រី សាច់ បន្លែ និងផ្លែឈើ។ បើមានបញ្ហាធ្ងន់ធ្ងរខ្លាំង ត្រូវតែរកអ្នកជំនាញផ្នែកផ្លូវចិត្តព្យាបាល ឬពិគ្រោះ។
លោកបានបញ្ជាក់យ៉ាងដូច្នេះ ៖«ជំងឺបាក់ទឹកចិត្តយើងអាចបង្ការនិងព្យាបាលខ្លួនឯង នៅពេលដែលអាការនៅស្រាល តែបើឈឺធ្ងន់ហើយ ត្រូវតែទៅព្យាបាល ឬពិគ្រោះជាមួយអ្នកជំនាញផ្លូវចិត្ត»។
លោក យឹម សុបុត្រា ថាវិធីបង្ការជំងឺបាក់ទឹកចិត្តដែលមានប្រសិទ្ធភាពល្អបំផុតនោះគឺ ម្ដាយឪពុកត្រូវតែអប់រំកូនឱ្យបានល្អតាំងតែពីតូច ពង្រឹងចិត្តសាស្ត្រពួកគេឱ្យបានរឹងប៉ឹង និងចេះដោះស្រាយបញ្ហាពីក្មេង នោះទោះមានរឿងហេតុកើតឡើងយ៉ាងណា ក៏ពួកគេមិនងាយ ឬមិនបាក់ទឹកចិត្តតែម្ដង៕