ជាតិ
សង្គមជាតិ
កសិករនៅស្រុកក្រឡាញ់មានជីវភាពល្អប្រសើរក្រោយបង្កើនផ្ទៃដីធ្វើស្រែប្រាំង
× សៀមរាប៖ កម្រិតជីវភាពរបស់ប្រជាកសិករនៅភូមិដំណាក់ខ្ចាស់ ឃុំសំបួរ ស្រុកក្រឡាញ់ មានភាពល្អប្រសើរ បន្ទាប់ពីសហគមន៍នេះ បានបង្កើនផ្ទៃដីស្រែវស្សាទៅស្រែប្រាំង មានន័យថា កសិករអាចធ្វើស្រែបានមួយឆ្នាំពីរដងនៅលើផ្ទៃដីតែមួយ។ ការពង្រីកផ្ទៃដីស្រែប្រាំងរបស់អ្នកភូមិដំណាក់ខ្ចាស់ បានកាត់បន្ថយភាពក្រីក្រ ពិសេសកាត់បន្ថយការចំណាកស្រុករបស់អ្នកភូមិបានមួយកម្រិតធំ។ ការពង្រីកផ្ទៃដីស្រែប្រាំង កើតឡើងដោយក្រុមកសិករប្រើប្រាស់ទឹកឃុំសំបួរ ដែលបានផ្តើមស្ដារអូរ និងទាញទឹកបង្ហូរដល់ផ្ទៃដីដែលមិនធ្លាប់មានទឹកស្រោចស្រពពីមុនមក។
ស្រុកក្រឡាញ់មានចម្ងាយប្រមាណ ៥០គីឡូម៉ែត្រពីទីរួមខេត្តសៀមរាប។ ចេញពីរង្វង់មូលនៃទីរួមស្រុកក្រឡាញ់ប្រមាណ ៧គីឡូម៉ែត្រ នោះគេនឹងទៅដល់ភូមិដំណាក់ខ្ចាស់។ អ្នកភូមិនេះភាគច្រើនមានរបរធ្វើស្រែចម្ការ និងនេសាទពេលរដូវវស្សា។ ក្នុងខែនេះ អ្នកភូមិកំពុងមមាញឹក និងចាំទទួលទិន្នផលស្រូវប្រាំងរបស់ពួកគេ ដែលអាចនឹងប្រមូលផលនៅចន្លោះពី១០ ទៅ២០ថ្ងៃខាងមុខ។
មេភូមិដំណាក់ខ្ចាស់ លោក ស៊ិន សុខា បានឱ្យដឹងថា កម្រិតជីវភាពរបស់កសិករនៅភូមិរបស់លោកបានប្រែប្រួល ក្រោយពីមានការពង្រីកផ្ទៃដីធ្វើស្រែបានមួយឆ្នាំ២ដង។ លោកបន្ថែមថា ក្រោយបង្កើតក្រុមកសិករប្រើប្រាស់ទឹកឃុំសំបួរនេះមក ស្រែរបស់កសិករដែលធ្លាប់តែគ្មានទឹកប្រើប្រាស់ និងគោកក្នុងខែប្រាំង មានទឹកហូរហៀរ និងអាចធ្វើស្រែប្រាំងដោយមិនមានការបារម្ភ។
កសិករ អ្នកស្រី ឡេន ឡុន ដែលនិយាយបណ្ដើរ ចង្អុលទៅវាលស្រែដ៏ល្វឹងល្វើយរបស់អ្នកស្រីបណ្ដើរនោះ បានបង្ហាញស្នាមញញឹមជាប់បបូរមាត់ ដ្បិតទិន្នផលស្រូវឆ្នាំនេះល្អប្រសើរ។ អ្នកស្រីបានចូលរួមជាមួយក្រុមកសិករប្រើប្រាស់ទឹកនេះរយៈពេល៣ឆ្នាំមកហើយ ហើយអ្នកស្រីអាចដាំដុះស្រូវបាន២ដងក្នុងមួយឆ្នាំ លើផ្ទៃដីស្រែចំនួន ៨ហិកតា។ «មុនៗ (មិនទាន់ចូលរួមជាមួយក្រុមប្រើប្រាស់ទឹក) គឺធ្វើស្រែបានតែខែវស្សា ឆ្នាំខ្លះបាន៧តោន ឆ្នាំខ្លះល្អបាន ១២តោន តែក្រោយបន្ថែមធ្វើខែប្រាំងម្ដងទៀត គឺទិន្នផលកើនទ្វេរ ធ្វើឱ្យកម្រិតជីវភាពរបស់យើងក៏ប្រសើរតាមនោះដែរ»។ នេះបើតាមសំដីអ្នកស្រី ឡេន ឡុន ដែលបញ្ជាក់ថា ស្រែអ្នកស្រីអាចប្រមូលផលនៅប្រមាណ ១០ថ្ងៃទៀតនេះហើយ។
ឯលោក ម៉ី តុង នោះវិញ ក៏រំពឹងថា ទិន្នផលស្រូវឆ្នាំនេះរបស់លោកក៏ល្អប្រសើរដូចឆ្នាំទៅដែរ។ លោកមានផ្ទៃដីធ្វើស្រែខ្លួនឯងចំនួន ៣ហិកតា ហើយឆ្នាំនេះលោកបានជួលដីពីគេ ៤ហិកតាបន្ថែមទៀត ដោយសារមានទឹកស្រោចស្រពហូរហៀរមិនបារម្ភ។ សម្រាប់លោក ម៉ី តុង ស្រែប្រាំងពិតជាបង្កើនចំណូលដល់គ្រួសារលោកមួយផ្នែកធំ ព្រោះថា ស្រែវស្សាទទួលផលមិនទៀងទាត់ ដោយសារឆ្នាំខ្លះទឹកធំ ឬតូច ពិបាកគ្រប់គ្រងផ្ទៃដី និងពេលវេលា។
ប្រធានក្រុមកសិករប្រើប្រាស់ទឹកសំបួរ លោក យ៉ិន យឺន បានឱ្យដឹងថា ក្រុមការងារនេះបង្កើតឡើងនៅចុងឆ្នាំ ២០១៥ ហើយបច្ចុប្បន្នមានសមាជិកចំនួន ១៥០គ្រួសារ ដែលមានផ្ទៃដីសរុបជាង ៣០០ហិកតា។ លោកបន្ថែមថា ក្រោយពង្រីកផ្ទៃដីស្រែប្រាំងមក កម្រិតជីវភាពរបស់កសិករមានភាពប្រសើរច្រើន ដែលខុសពីពេលមុន ដែលកសិករទុកដីស្រែចោលបន្ទាប់ពីធ្វើស្រែវស្សារួច។ លោកថា ក្រុមកសិកររបស់លោកបានចាប់ផ្តើមស្ដារអូរដែលមានស្រាប់ ដោយទាញទឹកពីប្រភពទឹកសំខាន់ៗដូចជា ស្ទឹងក្រឡាញ់ជាដើម ដើម្បីផ្គត់ផ្គង់ទឹកដល់ផ្ទៃដីធ្វើស្រែរបស់កសិករ។ លោកបន្ថែមថា កសិករដែលជាសមាជិកទាំងអស់ ត្រូវបង់ថវិកាដើម្បីទ្រទ្រង់សកម្មភាពនានា ដូចជាបូមទឹក ប្រេង ការស្ដារអូរ និងធ្វើផ្លូវជាដើម ដោយក្នុងមួយហិកតាមានចំនួន ៣០ម៉ឺនរៀលរៀងរាល់ឆ្នាំ៕
© រក្សាសិទ្ធិដោយ thmeythmey.com