ដោយ៖ Matias Andres
ONE Championship បានប្រកាសដាក់គូប្រកួតពិសេសថែមជាច្រើនគូទៀតនៅសង្វៀនធំក្នុងព្រឹត្តិការណ៍ ONE: HERO’S ASCENT ក្នុងប្រទេសហ្វីលីពីន នាថ្ងៃទី២៥ ខែមករាខាងមុខ ប៉ុន្តែមិនមានវត្តមានកីឡាករកម្ពុជាចូលរួមឡើយ។
ថ្វីបើសង្វៀនក្បាច់គុនដែលប្រព្រឹត្តិទៅនៅផ្សារទំនើប Asia Arena ទីក្រុងម៉ានីល ប្រទេសហ្វីលីពីនមួយនេះ មិនមានកីឡាករកម្ពុជាចូលរួមក្តី ប៉ុន្តែក៏សំខាន់សម្រាប់អ្នកប្រដាល់កម្ពុជាទាំងអស់ដើម្បីផ្ទៀងមើលលទ្ធផលផងដែរ។
គូសំខាន់ប្រចាំកម្មវិធី គឺម្ចាស់ផ្ទះហ្វីលីពីន Geje Eustaquio នឹងត្រូវការពារខ្សែក្រវាត់ ONE Flyweight World Title របស់ខ្លួនពីសំណាក់ជើងខ្លាំងពីប្រស៊ីល Adriano "Mikinho" Moraes និងជាការដណ្តើមខ្សែក្រវាត់គ្នាជាលើកទី៣ផងដែរ។
កីឡាករ Geje Eustaquio របស់ហ្វីលីពីន
Eustaquio និង Moraes ធ្លាប់ប៉ះគ្នាម្តងជាកាលពីខែកញ្ញា ឆ្នាំ២០១៤ នៅពេលដែលស្ថាប័នប្រដាល់ពិភពលោក មករៀបសង្វៀនធំនៅកម្ពុជាជាលើកដំបូងនៅសាលមហោស្រពកោះពេជ្យដែល កាលនោះមានគូប្រកួតសរុបចំនួន ១០គូពីប្រទេសនានា។
នាព្រឹត្តិការណ៍ ONE: RISE OF THE KINGDOM ដែលប្រារព្ធនៅកោះពេជ្យនោះក៏ មានវត្តមានកីឡាករប្រដាល់កម្ពុជាខ្លាំងៗជាច្រើនរូប ក្នុងនោះរួមមានតារាជើងចាស់ប្រចាំដួងចិត្តទស្សនិកជនទូទាំងប្រទេស ចាន់ រតនា ផងដែរ។
តែយ៉ាងណាក្នុងរាត្រីនោះ អ្វីដែលអស្ចារ្យគឺ Moraes បានផ្តួល Eustaquio ត្រឹមទឹកទី២ និងលើកខ្សែក្រវាត់ ONE Flyweight World Champion លើកដំបូង។
ថ្វីបើ Eustaquio បានចាញ់ក្នុងដៃ Moraes ពិតមែន រូបគេមិនបានបាក់ទឹកចិត្តទេ ប៉ុន្តែរឹតតែប្រឹងជំរុញខ្លួនឯងឲ្យហាត់ស្នៀតវាយប្រហារកាន់តែពិសេសថែមទៀតដើម្បីស្តារកេរ្តិ៍ឈ្មោះខ្លួនមកវិញ។
Eustaquio បន្ទាប់ពីបានយកឈ្នះការប្រកួតជាមួយ Kairat Akhmetov
ដោយបានដណ្តើមខ្សែក្រវាត់បណ្តោះអាសន្នរបស់កីឡាកររូបនេះកាលពីខែ មករា ២០១៨រួចមក រូបគេតាំងចិត្តថានឹងយកខ្សែក្រវាត់ពី Moraes មកវិញឲ្យបានសម្រាប់ការប្រកួតម្តងទៀតនៅខែ មិថុនា។
Eustaquio ព្យាយាមតទល់ជាលើកទីពីរជាមួយ Moraes នៅទីក្រុងម៉ាកាវ យ៉ាងលំបាកបំផុតដល់ទឹកទី៥ រហូតចុងក្រោយភាគីខាងហ្វីលីពីននេះ ពិតជាបានសម្រេចបំណងសងសឹករបស់ខ្លួន ហើយក្លាយជាជើងឯងម្ចាស់ខ្សែក្រវាត់ពិភពលោក។
រីឯ ខាងកម្ពុជា ចាន់ រតនា ក៏ត្រូវតែតាមដានមើលការប្រកួតចុងក្រោយឆាប់ៗរបស់មួយគូនេះដែរ ខណៈដែលរតនា អាចនឹងជាកីឡាករបន្ទាប់ដែលត្រូវដណ្តើមខ្សែក្រវាត់មួយនេះ ដោយសារគាត់ទើបសាងកំណត់ត្រាផ្តួលជើងខ្លាំង Abro Fernandes កក្រើកសង្វៀនធំ ONE: DESTINY OF CHAMPIONS នៅទីក្រុងកូឡាឡាំពួ ប្រទេសម៉ាឡេស៊ី ខែមុន។
ក្រៅពីនេះ នៅមានមួយគូទៀតដែលនឹងបញ្ចេញថ្វីដៃនៅទីក្រុងម៉ានីលដែរគឺ Danny Kingad មានឆន្ទកាត់មុខកីឡាករប្រចាំប្រទេសជប៉ុន Tatsumitsu Wada ដែលកំពុងសំលៀងភ្នែកចង់បានខ្សែក្រវាត់ពិភពលោក ONE World Title ដូចគ្នា។
នៅមានការប្រកួតជម្រុះជើងឯកសម្រាប់ពានរង្វាន់ ONE Lightweight World Grand Prix ផងដែរ ដែលកីឡាករម្ចាស់ផ្ទះ Honorio Banario ត្រូវចាប់គូជាមួយ Lowen Tynanes អតីតជើងឯក King Of The Cage Junior Welterweight Champion ផងដែរ។
ដូច្នេះកុំភ្លេចតាមដានមើលការប្រកួតគុនចម្រុះ និងក្បាច់គុន Muay Thai នៅព្រឹត្តិការណ៍ ONE: HERO’S ASCENT ទាំងអស់គ្នា។
ខាងក្រោមជាតារាងឈ្មោះអ្នកប្រដាល់ក្បាច់គុនដែលត្រូវបញ្ចេញសមត្ថភាពនៅហ្វីលីពីន។
• Flyweight (គុនចម្រុះ): Geje Eustaquio vs. Adriano Moraes
• Lightweight (គុនចម្រុះ): Honorio Banario vs. Lowen Tynanes
• Flyweight (គុនចម្រុះ): Danny Kingad vs. Tatsumitsu Wada
• Flyweight (ONE Super Series Muay Thai): Rodtang Jitmuangnon vs. Fahdi Khaled
• Featherweight (ONE Super Series Muay Thai): Brown Pinas vs. Bangpleenoi Petchyindee Academy
• Flyweight (ONE Super Series Muay Thai): Elias Mahmoudi vs. Yukinori Ogasawara
• Featherweight (គុនចម្រុះ): Sung Jong Lee vs. Tang Kai
• Bantamweight (ONE Super Series Muay Thai): Mohammed Bin Mahmoud vs. Hiroaki Suzuki
• Strawweight (គុនចម្រុះ): Egi Rozten vs. Himanshu Kaushik