កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
Mauricio Pochettino និយាយថាលោកសង្ឃឹមថានឹងក្លាយជាអ្នកចាត់ការទូទៅ Tottenham Hotspur ក្នុងរយៈពេល ២០ឆ្នាំទៅមុខទៀត និងមានគម្រោងបញ្ចប់អាជីពជាមួយក្លិបនេះតែម្តង។
អ្នកចាត់ការសញ្ជាតិអាហ្សង់ទីនវ័យ ៤៦ ឆ្នាំរូបនេះបានដឹកនាំ Spurs ទទួលបានចំណាត់ថ្នាក់ទី៥ ទី៣ ទី២ និងលេខ៣បណ្តោះអាសន្នក្នុងរដូវកាលនេះ ដែលជារដូវកាលទី ៤ ចាប់តាំងពីលោកចាកចេញពី Southampton កាលពីឆ្នាំ ២០១៤។
«ខ្ញុំសង្ឃឹមក៏ដូចជាមានបំណងប្រាថ្នានៅទីនេះ ២០ឆ្នាំ ហើយសម្រេចចាកចេញ ឬបញ្ចប់អាជីពរបស់ខ្ញុំនៅទីនេះតែម្តង។ ខ្ញុំកំពុងផ្តោតការយកចិត្តទុកដាក់ខ្លាំងនៅទីនេះហើយចង់ជួយក្លិបឲ្យសម្រេចបាននូវអ្វីដែលពួកគេចង់បាននៅក្នុងប្រវត្តិសាស្ត្របាល់ទាត់»។ Pochettino លើកឡើងដូច្នេះ។
លោកបន្ថែមថា៖«វាពិតជាអស្ចារ្យណាស់ ខ្ញុំសប្បាយចិត្តដែលបានមកទីនេះ។ ខ្ញុំរីករាយក្នុងការធ្វើការនៅក្នុងក្លិបដែលមានរបៀបដឹកនាំបែបនេះ»។
អតីតកីឡាករ Bordeaux PSG និង Espanyol រូបនេះ សង្ឃឹមថាបើខ្លួយមានលទ្ធភាពលោកនឹងដើរតាមគន្លងរបស់លោក Arsene Wenger ដែលជាអ្នកចាត់ការទូទៅ Arsenal នៅទីក្រុងឡុងដ៍រយៈពេល ២២ឆ្នាំ បើទោះលោកបានចាកចេញនៅបញ្ចប់រដូវកាលមុនក៏ដោយ។
Pochettino ដែលបានចុះហត្ថលេខាលើកិច្ចសន្យារយៈពេល៥ឆ្នាំទៀតកាលពីខែឧសភា ឆ្នាំមុន ត្រូវបានសារព័ត៌មានជុំវិញពិភពលោកផ្សព្វផ្សាយថាលោកមានទំនាក់ទំនងក្នុងការទៅដឹកនាំ Manchester United និង Real Madrid ខណៈក្រុមទាំងពីរកំពុងដឹកនាំដោយអ្នកចាត់ការបណ្តោះអាសន្ន៕
Tag:
បាល់ទាត់
Mauricio Pochettino
Arsene Wenger
© រក្សាសិទ្ធិដោយ thmeythmey.com
