ក្រុមកីឡាបាល់ទាត់ជម្រើសជាតិជប៉ុន អ៊ូសបេគីស្ថាន និងកាតាអាចរកបាន៣ពិន្ទុរៀងខ្លួនក្នុងជំនួបបើកឆាកតាមពូលនៃការប្រកួតពានរង្វាន់ AFC Asian Cup ឆ្នាំ២០១៩ ដែលធ្វើឡើងនៅថ្ងៃទី៩ ខែមករា។
ជប៉ុនបានយកឈ្នះតួកម៉េនីស្ថានដោយលទ្ធផល ៣-២ ក្នុងវគ្គសន្សំពិន្ទុពូល F ដែលជាពូលចុងក្រោយប្រចាំព្រឹត្តិការណ៍នៅតំបន់អាស៊ីលើកទី១៧នេះ។ ខ្សែប្រយុទ្ធ Yuya Osako នៃក្លិប Werder Bremen របស់អាល្លឺម៉ង់ ជាអ្នកស៊ុតបញ្ចូលទីឲ្យជប៉ុន២គ្រាប់ម្នាក់ឯង រួមទាំងខ្សែបម្រើ Ritsu Doan រកបាន១គ្រាប់។ ២គ្រាប់របស់តួកម៉េនីស្ថានធ្វើបានដោយកីឡាករ Arslanmyrat Amanov និង Ahmet Atayev ដោយការស៊ុតបាល់ពិន័យប៉េណាល់ទី១១ម៉ែត្រ។
ជ័យជម្នះនេះបាននាំឲ្យក្រុមរហស្សនាមសាម៉ូរ៉ៃឈរនៅកំពូលតារាងពូល F បណ្តោះអាសន្ន ខណៈ អ៊ូសបេគីស្ថានដែលបានយកឈ្នះអូម៉ង់ ២-១ នាជំនួបបើកឆាកក្នុងពូលជាមួយគ្នានេះស្ថិតនៅចំណាត់ថ្នាក់ទី២ ហើយតួកម៉េនីស្ថាននៅលេខរៀងទី៣។
ដោយឡែកកាតាដែលនឹងត្រៀមធ្វើម្ចាស់ផ្ទះ World Cup ឆ្នាំ២០២២ ក៏រកបានជ័យជម្នះសម្រាប់ប្រកួតដំបូងរបស់ខ្លួនក្នុងវគ្គសន្សំពិន្ទុពូល E ផងដែរបន្ទាប់ពីយកឈ្នះលីបង់ ២-០។ កាតាឡើងទៅឈរនៅចំណាត់ថ្នាក់ទី២ក្នុងតារាងពូល E រីឯអារ៉ាប៊ីសាអូឌីតនៅរក្សាតំណែងកំពូលតារាងបណ្តោះអាសន្នដដែលព្រោះមានគ្រាប់បាល់ស៊ុតចូលទីច្រើនជាង៕