អន្តរជាតិ
បេក្ខជនបក្សប្រឆាំងកុងហ្គោ ឈ្នះការបោះឆ្នោតប្រធានាធិបតី លោក Felix Tshisekedi (អាវស) ប្រធានាធិបតីជាប់ឆ្នោតនៃសាធារណរដ្ឋប្រជាធិបតេយ្យកុងហ្គោ។ (រូបភាព AFP)
× បេក្ខជនប្រឆាំង Felix Tshisekedi បានឈ្នះការបោះឆ្នោតជ្រើសរើសប្រធានាធិបតីនៃសាធារណរដ្ឋប្រជាធិបតេយ្យកុងហ្គោ ដែលត្រូវបានពន្យារពេលជាយូរ។ បើតាមលទ្ធផលបឋមដែលប្រកាសគណៈកម្មការរៀបចំការបោះឆ្នោតនៅថ្ងៃទី៩ ខែមករា លោក Tshisekedi បានផ្ដួលបេក្ខជនផ្សេងទៀត រាប់ទាំងបេក្ខជនដែលគាំទ្រដោយប្រធានាធិបតីចប់អាណត្តិ Joseph Kabila ផង។ ជ័យជម្នះនេះ នាំទៅដល់ការផ្ទេរអំណាចតាមបែបប្រជាធិបតេយ្យលើកដំបូងក្នុងរដ្ឋអាហ្វ្រិកនេះតាំងពីឆ្នាំ១៩៦០ មក។
ដោយទទួលបានសំឡេងចំនួន៣៨,៥៧ភាគរយ លោក Felix Tshisekedi គឺជាប្រធានាធិបតីជាប់ឆ្នោតរបស់សាធារណរដ្ឋប្រជាធិបតេយ្យកុងហ្គោ។ នេះជាការប្រកាសលទ្ធផលបឋមរបស់លោក Corneille Nangaa ប្រធានគណៈកម្មការរៀបចំការបោះឆ្នោតជាតិនៅថ្ងៃទី៩ ខែមករា ។ សំឡេងហ៊ោកញ្ជ្រៀវបានផ្ទុះឡើងពេញបន្ទប់ប្រកាសលទ្ធផល ហើយការរីករាយអបអរក៏ផ្ទុះឡើងក្នុងរដ្ឋធានីគីនស្ហាសាភ្លាមៗដែរ។
ក្នុងលទ្ធផលដដែល លោក Tshisekedi បានផ្ដួលអ្នកជំនួញ Martin Fayulu ដែលស្ថិតនៅលេខរៀងទីពីរ និងបេក្ខជនបក្សកាន់អំណាចលោក Emmanuel Ramazani Shadary ។ លោក Shadary អតីតរដ្ឋមន្ត្រីមហាផ្ទៃ ត្រូវបានគាំទ្រដោយប្រធានាធិបតី Joseph Kabila ដែលចប់អាណត្តិពីរឆ្នាំមកហើយ។ គ្មាននរណារំពឹងថា បេក្ខជនបក្សប្រឆាំងអាចផ្ដួលបេក្ខជនបក្សកាន់អំណាចឡើយ ព្រោះការបោះឆ្នោតនេះពោរពេញដោយភាពមិនប្រក្រតីជាច្រើន។
បេក្ខជនចាញ់ឆ្នោត មានពេល១០ថ្ងៃដើម្បីតវ៉ាលទ្ធផលនេះទៅកាន់តុលាការធម្មនុញ្ញ។ ការបោះឆ្នោតប្រធានាធិបតីថ្មីនេះ ធ្វើឡើងតាំងពីថ្ងៃទី៣០ ខែធ្នូមកម្ល៉េះ ប៉ុន្តែការប្រកាសលទ្ធផលត្រូវបានពន្យារពេលដោយសារអំពើហិង្សា។ មុនពេលប្រកាសលទ្ធផល ប៉ូលិសកុងហ្គោ ត្រូវបានពង្រាយនៅទីស្នាក់ការគណៈកម្មការរៀបចំការបោះឆ្នោត ដើម្បីធានាសុវត្ថិភាព។ ទីភ្នាក់ងារព័ត៌មាន AFP ផ្សាយថា លទ្ធផលផ្លូវការនឹងប្រកាសនៅថ្ងៃទី១៥ ខែមករា ហើយការស្បថចូលកាន់តំណែងធ្វើនៅបីថ្ងៃក្រោយ។
លោក Kabila ត្រូវបានរំពឹងថា នឹងចាកចេញពីតំណែងក្នុងខែនេះ បន្ទាប់អង្គុយកៅអីប្រធានាធិបតីអស់រយៈពេល១៨ឆ្នាំមកហើយនោះ។ បើសិនគ្មានអ្វីប្រែប្រួលទេនោះ ការឡើងកាន់តំណែងរបស់លោក Tshisekedi នឹងក្លាយជាការផ្ទេរអំណាចលើកដំបូងក្នុងរយៈពេលជិតពីរទសវត្សរ៍ និងជាការផ្ទេអំណាចតាមផ្លូវប្រជាធិបតេយ្យលើកទីមួយដែរក្នុងប្រវត្តិសាស្ត្ររដ្ឋអាហ្វ្រិកមួយ គិតតាំងពីទទួលបានឯករាជ្យពីបែលហ្ស៊ិកក្នុងឆ្នាំ១៩៦០ មក។
ប្រធានាធិបតីជាប់ឆ្នោតថ្មី Tshisekedi វ័យ៥៥ឆ្នាំ គឺជាកូនប្រុសអ្នកនយោបាយប្រឆាំងដ៏លេចមុខមាត់មួយរូបរបស់ប្រទេស គឺលោក Etienne Tshisekedi ។ លោកត្រូវដឹកនាំប្រទេសអាហ្វ្រិកដែលសម្បូរទៅដោយធនធានរ៉ែក្នុងបរិបទថ្មី ចំណែកឯលោក Kabila ដែលធ្វើទុក្ខបុកម្នេញអ្នកនយោបាយប្រឆាំងជាច្រើនឆ្នាំមកហើយនោះ នឹងក្លាយជាសមាជិកព្រឹទ្ធសភាអស់មួយជីវិតតាមការកំណត់ច្បាប់រដ្ឋធម្មនុញ្ញសាធារណរដ្ឋប្រជាធិបតេយ្យកុងហ្គោ៕
Tag:
អាហ្វ្រិក
កុងហ្គោ
Joseph Kabila
Felix Tshisekedi
© រក្សាសិទ្ធិដោយ thmeythmey.com