អន្តរជាតិ
លោក ម៉ាឌុយរ៉ូ ស្បថចូលកាន់តំណែងប្រធានាធិបតីអាណត្តិទីពីរ ទាំងអន្តរជាតិមិនទទួលស្គាល់
× លោក នីកូឡាស់ ម៉ាឌុយរ៉ូ នៅថ្ងៃទី១០ ខែមករា បានស្បថចូលកាន់តំណែងប្រធានាធិបតីវ៉េណេស៊ុយអេឡាសម្រាប់អាណត្តិទីពីររយៈពេល៦ឆ្នាំទៀត។ ប៉ុន្តែសហគមន៍អន្តរជាតិមាន អាមេរិក អឺរ៉ុប កាណាដា និងរដ្ឋសមាជិកអង្គការទ្វីបអាមេរិក មិនទទួលស្គាល់ភាពស្របច្បាប់របស់លោកប្រធានាធិបតី ម៉ាឌុយរ៉ូ ឡើយ។ ទោះបរទេសភាគច្រើនមិនរាប់រក លោក ម៉ាឌុយរ៉ូ ក៏នៅតែមានមិត្តសេសសល់ដែរដូចជាគុយបាយ នីការ៉ាហ្កា និងបូលីវីជាដើម។
អាណត្តិទីពីរ ឆ្នាំ២០១៩-២០២៥ របស់ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ ចាប់ផ្ដើមដោយឱនភាពសេដ្ឋកិច្ច ភាពឯកោផ្នែកការទូត និងការចោទប្រកាន់របស់អន្តរជាតិ។ លោក ម៉ាឌុយរ៉ូ បានស្បថចូលកាន់តំណែងនៅថ្ងៃទី១០ ខែមករា បន្ទាប់ពីទទួលជោគជ័យក្នុងការឆ្នោតខែឧសភា ឆ្នាំ២០១៨ មកម្ល៉េះ។ ការបោះឆ្នោតនោះ ពោរពេញដោយបញ្ហា អន្តរជាតិមិនទទួលស្គាល់ ហើយបក្សប្រឆាំងធ្វើពហិការទៅទៀត។
លោក ម៉ាឌុយរ៉ូ ដែលបន្តតំណែងពីលោក ហ៊ូហ្គោ ឆាវេស ធ្វើសច្ចាប្រណិធានចំពោះមុខប្រធានតុលាការកំពូល ដែលតាមច្បាប់តម្រូវឲ្យធ្វើនៅចំពោះមុខសភា។ មិនមែនចម្លែកទេដែលរឿងនេះកើតឡើងបែបនេះ ដ្បិតលោកបានសភាវេណេស៊ុយអេឡាបានបង្កើតសភាធម្មនុញ្ញមួយដើម្បីប្រជែងនឹងសភាសព្វថ្ងៃត្រូវដឹកនាំដោយតំណាងរាស្ត្របក្សប្រឆាំង។ ការណ៍នេះក៏នាំឲ្យមានវិបត្តិធម្មនុញ្ញផង ព្រោះស្ថាប័ននីតិបញ្ញត្តិមានដល់ទៅពីរ។
អាមេរិក អឺរ៉ុប ក្រុមប្រទេសតំបន់ឡាទីន និងអង្គការរដ្ឋអាមេរិក មិនទទួលស្គាល់លទ្ធផលឆ្នោតឡើយ ហើយក៏មិនទទួលស្គាល់លោក ម៉ាឌុយរ៉ូ ជាប្រធានាធិបតីស្របច្បាប់របស់វ៉េណេស៊ុយអេឡាដែរ។ ទីប្រឹក្សាសន្តិសុខជាតិអាមេរិក ចន ប៊ូលតុន បានអំពាវនាវតាម Twitter ឲ្យបង្កើនការដាក់សម្ពាធលើក្រុងការ៉ាកាស់ដើម្បីស្ដារប្រជាធិបតេយ្យឡើងវិញ។ ឯអឺរ៉ុបចាត់ទុកការឡើងកាន់តំណែងរបស់លោក ម៉ាឌុយរ៉ូ ជារឿងមិនស្របប្រជាធិបតេយ្យ និងគំរាមដាក់ទណ្ឌកម្មផង។
ចំណែកក្រុមប្រទេស Lima ដែលមានសមាជិកភាគច្រើនជារដ្ឋនៅអាមេរិកឡាទីន ក៏ទាត់ចោលភាពស្របច្បាប់របស់លោក ម៉ាឌុយរ៉ូ ដែរ។ លើកលែងតែម៉ិកស៊ីកចេញ សមាជិកដទៃទៀតបានទទូចឲ្យលោក ម៉ាឌុយរ៉ូ បោះបង់តំណែងប្រធានាធិបតី និងប្រគល់អំណាចឲ្យសភាវិញ។ ក្រោយកិច្ចប្រជុំរបស់ខ្លួន ប៉ារ៉ាហ្កាយក៏ប្រកាសផ្ដាច់ទំនាក់ទំនងជាមួយវ៉េណេស៊ុយអេឡា ខណៈប៉េរូហៅរបបក្រុងការ៉ាកាស់ ជារបបផ្ដាច់ការ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ទោះសហគមន៍អន្តរជាតិមានលោកខាងលិចមិនទទួលស្គាល់ក្ដី រដ្ឋាភិបាលលោក ម៉ាឌុយរ៉ូ ក៏មិនឯកោពេកដែរ។ ក្នុងពិធីស្បថចូលកាន់តំណែងក្នុងទីក្រុងការ៉ាកាស់ មេដឹកនាំបរទេស និងប្រតិភូប្រទេសជាមិត្តមួយចំនួនក៏ចូលរួមដែរដូចជាប្រធានាធិបតីគុយបា Miguel Diaz-Canel, ប្រធានាធិបតីបូលីវី Evo Morales, មេដឹកនាំអែលសាល់វ៉ាឌ័រ Sanchez Ceren និងសមភាគីហីការ៉ាហ្កា Daniel Ortega ព្រមទាំងតំណាងចិន រុស្ស៊ី និងម៉ិកស៊ិក។
សូមបញ្ជាក់ដែរថា វ៉េណេស៊ុយអេឡា ធ្លាប់មានឈ្មោះជាប្រទេសមានស្តុកស្តម្ភដោយសារសម្បូរធនធានប្រេង តែបានផុងខ្លួនក្នុងវិបត្តិយ៉ាងជ្រៅក្រោមការដឹកនាំរបស់លោក ម៉ាឌុយរ៉ូ ដែលជាអតីតអ្នកបើកឡានទៅវិញ។ ជម្លោះផ្នែកនយោបាយ និងអសមត្ថភាពគ្រប់គ្រងសេដ្ឋកិច្ច ធ្វើឲ្យរដ្ឋអាមេរិកឡាទីននេះឈានដល់ធ្លាក់ក្នុងស្ថានភាពចលាចល និងក្ស័យធន ហើយស្ថានភាពនេះបានបង្ខំឲ្យប្រជាជនរាប់លាននាក់ភៀសខ្លួនទៅកាន់ប្រទេសជិតខាងដែរ៕
Tag:
វ៉េណេស៊ុយអេឡា
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com