ជាតិ
ត្រឹម២០១៨ កម្ពុជា បញ្ជូនទ័ពជិត៦ពាន់នាក់ ទៅរក្សាសន្តិសុខពិភពជាមួយ UN
រូបភាពបានពីទំព័រហ្វេសប៊ុករបស់ លោក ឈុំ សុជាត អ្នកនាំពាក្យក្រសួងការពារជាតិ
×![]()
ភ្នំពេញ៖ មកដល់បច្ចុប្បន្ន កងកម្លាំងរក្សាសន្តិភាពរបស់កម្ពុជា ដែលបានបំពេញបេសកកម្មក្រៅប្រទេស ក្រោមឆត្ររបស់អង្គការសហប្រជាជាតិ (UN) មាន៥,៧៨៥នាក់។ ក្នុងនោះ មានអ្នកបាត់បង់ជីវិត៩នាក់ និងរងរបួស៩នាក់ នៅអាហ្វ្រិកកណ្តាល និងប្រទេសម៉ាលី។ បើតាមការបញ្ជាក់របស់លោក ឈុំ សុជាត អ្នកនាំពាក្យក្រសួងការពារជាតិ ក្នុងចំណោមទ័ពដែលបានស្លាប់ មាន២នាក់ស្លាប់ក្រៅក្របខណ្ឌUN និងអ្នកឯទៀតស្លាប់ដោយសារជំងឺគ្រុនចាញ់។ 
លោក ឈុំ សុជាត បានបញ្ជាក់ថា កម្ពុជា បានចាប់ផ្តើមបញ្ជូនកងកម្លាំងរបស់ខ្លួន ទៅឲ្យអង្គការសហប្រជាជាតិតាំងពីឆ្នាំ២០០៦មក។ ហើយចំនួនកងកម្លាំងទាំងអស់នេះ គឺមិនទាន់បូកបញ្ចូលទ័ពមួកខៀវទាំង១៨៤នាក់ ដែលត្រៀមបញ្ជូនទៅលីបង់នៅចុងខែមករានេះទេ ខណៈដែលកងកម្លាំងរក្សាសន្តិភាព៧៩៩នាក់ កំពុងបំពេញបេសកកម្ម នៅប្រទេសចំនួន៥ ក្នុងនោះមានកងកម្លាំងនារី ៦២នាក់។
កម្ពុជាបានជាប់ចំណាត់ថ្នាក់លេខ២៩ ក្នុងចំណោម១២៤ប្រទេសលើពិភពលោក ខាងបញ្ជូនកងកម្លាំងរក្សាសន្តិភាពទៅក្រៅប្រទេស ក្រោមឆ័ត្រអង្គការសហប្រជាជាតិ (UN) និងទទួលបានចំណាត់ថ្នាក់លេខ១៧ លើការបញ្ជូនកងកម្លាំងផ្នែកនារី។ ក្នុងតំបន់អាស៊ានវិញ កម្ពុជាជាប់លេខ៣ និងលេខ២ សម្រាប់ការបញ្ជូនកងកម្លាំងនារី ក្នុងការបញ្ជូនកងកម្លាំងរក្សាសន្តិភាពទៅក្រៅប្រទេស។ នេះបើតាម លោក ឈុំ សុជាត ដដែល។
សូមបញ្ជាក់ថា ទ័ពមួកខៀវកម្ពុជាដែលបានទៅបំពេញបេសកកម្មក្រៅប្រទេស មាន៨ប្រទេស ក្នុងនោះមាន សាធារណរដ្ឋស៊ូដង់ ស៊ូដង់ខាងត្បូង លីបង់ សាយប្រ៊ឹស ស៊ីរី ឆាដ ម៉ាលី និងអាហ្វ្រិកកណ្តាល៕
Tag:
ទ័ព
បេសកម្ម
ជំងឺគ្រុនចាញ់ UN
© រក្សាសិទ្ធិដោយ thmeythmey.com
