មហាសេដ្ឋីលំដាប់លេខមួយពិភពលោក Jeff Bezos និង អ្នកស្រី MacKenzie បានប្រកាសលែងលះគ្នា កាលពីថ្ងៃពុធ ទី៩ ខែមករា ក្រោយចំណងអាពាហ៍ពិពាហ៍អស់រយៈពេល២៥ឆ្នាំ។ ករណីនេះ ត្រូវបានចាត់ទុកជាការបែកបាក់ដែលបន្សល់នូវទ្រព្យសម្បត្តិដ៏ច្រេីនជាងគេបំផុត ព្រោះលោក Bezos ដែលជាម្ចាស់ក្រុមហ៊ុន Amazon និងសារព័ត៌មាន The Washington Post មានទ្រព្យរហូតដល់ទៅ១៣៧ពាន់លានដុល្លារអាមេរិកឯណោះ។
បើទោះបីជាមិនទាន់មានការប្រកាសផ្លូវការក៏ដោយ តែការលែងលះនេះ នឹងនាំអ្នកស្រី MacKenzie ដែលមានកូន៤នាក់ជាមួយលោក Bezos អាចទទួលបានទ្រព្យបែងចែក ដែលមានជាង៦៨ពាន់លានដុល្លារអាមេរិក។ បើតាម Forbes ទ្រព្យនេះ នឹងនាំឲ្យគាត់ក្លាយជាអ្នកទ្រព្យសម្បត្តិច្រើនជាងគេលំដាប់ទី៥លើពិភពលោកផងដែរ។
កន្លងមក ការចែកផ្លូវគ្នារវាងលោក Rupert Murdoch មហាសេដ្ឋីអាមេរិកដើមកំណើតអូស្ត្រាលី និងអ្នកស្រី Anna Torv អ្នកកាសែតស្កុតឡែន ត្រូវបានចាត់ទុកជាការលែងលះដែលមានតម្លៃថ្លៃបំផុត។ អ្នកទាំងពីរបានរស់នៅជាមួយគ្នា៣២ឆ្នាំ និងមានកូន៣នាក់។ យោងតាមការផ្សាយរបស់ ABC News លោក Rupert ដែលជាម្ចាស់ទូរទស្សន៍ Fox News បានផ្តល់ប្រាក់ចំនួន១,៧ពាន់លានដុល្លារទៅអ្នកស្រី Torv ដែលក្នុងនោះ១១០លានដុល្លារជាសាច់ប្រាក់សុទ្ធ។
តារាភាពយន្តអាមេរិក Mel Gibson និងអ្នកស្រី Robyn Moore អតីតពេទ្យធ្មេញ បានបែកបាក់គ្នានៅឆ្នាំ២០០៦ ក្រោយចំណងអាពាហ៍ពិពាហ៍ជិត៣០ឆ្នាំ។ ក្រោយការលែងលះផ្លូវការនៅឆ្នាំ២០១១ អ្នកស្រី Moore ដែលមានកូន៧នាក់ជាមួយលោក Gibson ត្រូវបានរាយការណ៍ថា ទទួលបានទ្រព្យសម្បត្តិប្រមាណ៤២៥លានដុល្លារអាមេរិក។
ការបែកបាក់គ្នានៅឆ្នាំ២០០២ រវាងគ្រួសារអ្នកជំនួញអាមេរិក លោក Robert Johnson និងអ្នកស្រី Sheila Crump ក្រោយរៀបការអស់រយៈពេល៣៣ឆ្នាំ និងមានកូន២នាក់ ក៏បានបន្សល់នូវទ្រព្យសម្បត្តិប្រមាណ៤០០លានដុល្លារអាមេរិករៀងៗខ្លួនផងដែរ។
ករណីដ៏គួរឲ្យកត់សម្គាល់ផ្សេងទៀតរួមមាន អ្នកស្រី Juanita Vanoy ដែលទទួលបានប្រមាណ១៦៨លានដុល្លារអាមេរិក ក្រោយការលែងលះស្តេចបាល់បោះអាមេរិក Michael Jordan។ អ្នកស្រី Marcia Murphey ទទួលបានក្នុងរង្វង់១៥០លានដុល្លារអាមេរិក ក្រោយការបែកបាក់ពីតន្ត្រីករ និងជាអ្នកចម្រៀងអាមេរិក Neil Diamond។
Tiger Woods ក៏មានចំណងស្នេហ៍បែកបាក់ផងដែរ។ បើតាមការផ្សាយរបស់ New York Daily News ក្រោយការលែងលះនៅឆ្នាំ២០១០ ទ្រព្យសម្បត្តិរបស់កីឡាករវាយកូនគោលពិភពលោករូបនេះ ត្រូវបានបែងចែកទៅអ្នកស្រី Elin Nordegren ប្រមាណ១១០លានដុល្លារអាមេរិក។
ការបែកបាក់រវាងផលិតករភាពយន្តអាមេរិក Steven Spielberg និងតារាភាពយន្ត Amy Irving បន្សល់នូវទ្រព្យសម្បត្តិ ១០០លានដុល្លារអាមេរិក ខណៈទ្រព្យសម្បត្តិចន្លោះពី៨៥លាន ទៅ១១៨លានដុល្លារអាមេរិក ត្រូវបានបែងចែកគ្នា រវាងតារាភាពយន្តអាមេរិក Harrison Ford និងអ្នកសរសេរស្គ្រីនភាពយន្ត Melissa Mathison ក្រោយការលែងលះផ្លូវការ។
ផលិតករភាពយន្តអង់គ្លេស Guy Richie និងតារាចម្រៀងអាមេរិក Madonna លែងលះគ្នានៅឆ្នាំ២០០៨ ក្រោយរៀបការបានជិត៨ឆ្នាំ។ ក្នុងចំណងអាពាហ៍ពិពាហ៍ អ្នកទាំងពីរមានកូនប្រុសម្នាក់ និងកូនប្រុសចិញ្ចឹមដើមកំណើតម៉ាឡាវីម្នាក់ទៀត។ តាមការផ្សាយរបស់ AP ទ្រព្យសម្បត្តិដែលត្រូវបានបែងចែកចន្លោះពី៧៦លាន ទៅ៩២លានដុល្លារអាមេរិក។
តារាភាពយន្ត Kevin Costner និងភរិយា Cindy Silva បានបែកបាក់គ្នានៅឆ្នាំ១៩៩៤ ក្រោយចំណងអាពាហ៍ពិពាហ៍១៦ឆ្នាំ។ មុនលែងលះ អ្នកពីរមានកូន៣នាក់ និងមានទ្រព្យរួមប្រមាណ៨០លានដុល្លារអាមេរិក។ នេះបើតាមការផ្សាយរបស់ទស្សនាវដ្តី People៕