អន្តរជាតិ
ទីប្រឹក្សារដ្ឋស៊ូជី៖ ដើម្បីអភិវឌ្ឍប្រទេសតាមប្រជាធិបតេយ្យ ប្រជាជន មិនត្រូវពឹងតែលើរដ្ឋាភិបាលនោះទេ
× ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានទទួលស្គាល់ថា រដ្ឋាភិបាលរបស់លោកស្រី នៅមិនទាន់អាចប្រែក្លាយមីយ៉ាន់ម៉ាឲ្យទៅជាប្រទេសប្រជាធិបតេយ្យនៅឡើយនោះទេ។ លោកស្រីទីប្រឹក្សារដ្ឋបានទទូចឲ្យប្រជាជនទាំងអស់ចូលរួមជាមួយនឹងរដ្ឋាភិបាល ដើម្បីប្រែក្លាយចក្ខុវិស័យនេះឲ្យក្លាយជាការពិត។
នាឱកាសនៃការចូលរួមពិធីបុណ្យជាតិមួយរបស់ប្រទេស នៅថ្ងៃ១០ មករា លោកស្រីទីប្រឹក្សារដ្ឋ អ៊ុងសាន ស៊ូជី បានអះអាងថា ប្រជាធិបតេយ្យពិតប្រាកដរបស់សហភាពមីយ៉ាន់ម៉ា ដែលប្រជាជនតែងតែចង់បាននៅមិនទាន់កើតឡើងនោះទេ ហើយដើម្បីឲ្យសង្គមមីយ៉ាន់ម៉ា មានប្រជាធិបតេយ្យពិតប្រាកដតម្រូវឲ្យប្រជាជនទាំងអស់ពុះពាររួមគ្នា។ នេះបើយោងតាមការចុះផ្សាយរបស់សារព័ត៌មាន Myanmar Times។
លោកស្រីទីប្រឹក្សារដ្ឋ និងជាប្រមុខបក្សកាន់អំណាចបច្ចុប្បន្ន បានសង្កត់ធ្ងន់ថា ការពឹងផ្អែកលើរដ្ឋាភិបាលតែម្ខាង មិនមែនជាប្រជាធិបតេយ្យនោះទេ។ លោកស្រី បន្ថែមថា ប្រជាធិបតេយ្យ ត្រូវពឹងផ្អែកលើប្រជាជន ហើយរដ្ឋាភិបាល ក៏ត្រូវការកម្លាំងរបស់ប្រជាជនផងដែរ។
ក្នុងកម្មវិធីសប្តាហ៍ដូចគ្នានេះ លោកស្រីទីប្រឹក្សា ក៏បានប្រាប់ប្រជាជន ថា រដ្ឋាភិបាលលោកស្រី បានព្យាយាមអស់ពីសមត្ថភាពហើយក្នុងការបំពេញតម្រូវការរបស់ប្រជាជនហើយ។ លោកស្រី លើកឡើងថា ការណ៍ដែលរដ្ឋាភិបាលលោកស្រី ប្រឹងប្រែងបែបនេះ មិនមានដើម្បីកសាងកេរ្តិ៍ឈ្មោះល្អនោះទេ ក៏ប៉ុន្តែ ចង់ឲ្យទំនាក់ទំនងរវាងរដ្ឋាភិបាល និងប្រជាជនកាន់តែមានអារម្មណ៍កក់ក្តៅ និងកាន់តែរឹងមាំ។
សូមជម្រាបរដ្ឋាភិបាលមីយ៉ាន់ម៉ាបច្ចុប្បន្ន ដែលកំពុងតែដឹកនាំដោយបក្សកាន់អំណាចរបស់លោកស្រី អ៊ុងសាន ស៊ូជី គឺជារដ្ឋាភិបាលស៊ីវិលលើកដំបូងហើយរបស់មីយ៉ាន់ម៉ាក្នុងរយៈពេលប៉ុន្មានទសវត្សរ៍ចុងក្រោយមកនេះ។ ការប្រែក្លាយមីយ៉ាន់ម៉ា ដែលធ្លាប់តែជាគ្រប់គ្រងដោយរបបយោធាផ្តាច់ការឲ្យទៅជាប្រទេសប្រជាធិបតេយ្យ គឺជាចក្ខុវិស័យអាទិភាពរបស់រដ្ឋាភិបាលលោកស្រី ស៊ូជី។
យ៉ាងណាមិញ គិតចាប់ពីការឡើងកាន់អំណាចក្នុងឆ្នាំ២០១៥មក មីយ៉ាន់ម៉ា នៅមិនទាន់មានការផ្លាស់ប្តូរប្រជាធិបតេយ្យជាដុំកុំភួនឡើយ។ សូម្បីតែការធ្វើវិសោធនកម្មរដ្ឋធម្មនុញ្ញដើម្បីកាត់បន្ថយឥទ្ធិពលយោធានៅក្នុងនយោបាយ ដែលជាការប្តេជ្ញាចិត្តអាទិភាពរបស់លោកស្រី ស៊ូជី ក៏មិនទាន់មានពន្លឺអ្វីឡើយ។ នេះ នៅមិនទាន់រាប់បញ្ចូលបញ្ហានៃការបង្រួបបង្រួមជាតិ ដែលជារឿងដ៏ចម្រូងចម្រាស់របស់សហភាពដែលមានជាតិសាសន៍ចម្រុះគ្នាមួយនេះផង៕
Tag:
មីយ៉ាន់ម៉ា
ប្រជាធិបតេយ្យ
អាស៊ាន
© រក្សាសិទ្ធិដោយ thmeythmey.com